ଦେବଗଡ,୩୦ା୩(ଶଶାଙ୍କ ଶେଖର ଝାଙ୍କର): ୨୦୨୫ ଜାନୁଆରୀ ୨୮ ତାରିଖରେ ରାଜ୍ୟ ସରକାରଙ୍କ ଦ୍ୱାରା ଗାଦିଚ୍ୟୁତ ହୋଇଥିବା ଦେବଗଡ ପୌର ପରିଷଦ ଅଧ୍ୟକ୍ଷା ଶାନ୍ତି ମଞ୍ଜରୀ ଦେଈଙ୍କୁ ଏହି ପଦବୀରେ ପୁନଃ ଅବସ୍ଥାପିତ କରିବା ପାଇଁ ମାନ୍ୟବର ଉଚ୍ଚ ନ୍ୟାୟାଳୟ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ମାନ୍ୟବାର ଉଚ୍ଚ ନ୍ୟାୟାଳୟ ରାଜ୍ୟ ସରକାର ଦେବଗଡ ପୌର ପରିଷଦ ଅଧ୍ୟକ୍ଷା ଶାନ୍ତି ମଞ୍ଜରୀ ଦେଈଙ୍କୁ ବେଆଇନ ଭାବେ ପଦବୀରୁ ଅପସାରିତ କରିଥିବା ତାଙ୍କ ଆଦେଶରେ ଦର୍ଶାଇବା ସହ ତାଙ୍କୁ ତୁରନ୍ତ ପୌରାଧ୍ୟକ୍ଷା ପଦବୀରେ ପୁନଃ ଅବସ୍ଥାପିତ କରିବାକୁ ପୌର ନିର୍ଦ୍ଦେଶକ ତଥା ରାଜ୍ୟ ଗୃହ ଏବଂ ନଗରଉନ୍ନୟନ ବିଭାଗର ସ୍ବତନ୍ତ୍ର ସଚିବଙ୍କୁ ଆଦେଶ ଦେଇଛନ୍ତି। ଏଥିସହ ପୌର ପରିଷଦ ଭାରପ୍ରାପ୍ତ ଅଧ୍ୟକ୍ଷ ପଦରେ ଥିବା ପୌର ପରିଷଦର ଉପାଧ୍ୟକ୍ଷ ପ୍ରଜିତ କୁମାର ଭୋଜଙ୍କୁ ଏହି ପଦବୀରୁ ଦାୟିତ୍ୱମୁକ୍ତ କରିବାକୁ ତାଙ୍କ ଆଦେଶରେ ଉଲ୍ଲେଖ କରିଛନ୍ତି । ଏଠାରେ ସୂଚନା ଯୋଗ୍ୟ ଯେ, ପୌରାଧ୍ୟକ୍ଷା ଶ୍ରୀମତି ଦେଈଙ୍କ ବିରୁଦ୍ଧରେ ନିୟମିତ ମାସିକ ବୈଠକ ଡାକୁନଥବା , ମାର୍କେଟ ଟେଣ୍ଡର ଓ ମୁକ୍ତା ଯୋଜନାରେ ଅନିୟମିତା କରିଥିବା ଅଭିଯୋଗ ହୋଇଥିଲା । ସରକାରଙ୍କ ନିର୍ଦ୍ଦେଶ ଅନୁଯାୟୀ ଜିଲାପାଳ ଏ ଅଭିଯୋଗର ତଦନ୍ତ କରି ତଦନ୍ତ ରିପୋର୍ଟ ଦାଖଲ କଲା ପରେ ରାଜ୍ୟ ସରକାର ପୌରାଧ୍ୟକ୍ଷାଙ୍କ ଶ୍ରୀମତି ଦେଈଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ତାଙ୍କୁ ପୌରାଧ୍ୟକ୍ଷା ପଦବୀରୁ ଅପସାରଣ କରିଥିଲେ। ଫଳରେ ୨୦୨୫ ଜାନୁୟାରୀ ୩୧ ତାରିଖରେ ଦେବଗଡ ପୌର ପରିଷଦର ଉପାଧ୍ୟକ୍ଷ ପ୍ରଜିତ କୁମାର ଭୋଜ ଭାରପ୍ରାପ୍ତ ଅଧ୍ୟକ୍ଷ ଭାବେ କାର୍ଯ୍ୟ ତୁଲାଉଥିଲେ। ଅପସାରିତ ହେବାପରେ ପୌରାଧ୍ୟକ୍ଷା ଶ୍ରୀମତି ଦେଈ ରାଜନୈତିକ ଆକ୍ରୋଶ ରଖି ସରକାର ଏଭଳି ପଦକ୍ଷେପ ନେଇଥିବାସେହି ସମୟରେ ଅଭିଯୋଗ କରିଥିଲେ। ସେହିପରି ଏନେଇ ସେ ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଥିବାବେଳେ ଏହା ମାନ୍ୟବର ଓଡ଼ିଶା ଉଚ୍ଚ ନ୍ୟାୟଳୟରେ ବିଚାରାଧିନ ରହିଥିଲା । ମାନ୍ୟବର ଉଚ୍ଚ ନ୍ୟାୟାଳୟର ଏହି ଆଦେଶ ପରେ ଶ୍ରୀମତି ଦେଈଙ୍କ ଅନୁଗତ ଓ ସମର୍ଥକସଙ୍କ ସମେତ ଜିଲା ବିଜେଡି ମହଲରେ ଖୁସିର ଲହରୀ ଦେଖିବାକୁ ମିଳିଛି ।
