ଝୁମ୍ପୁରୀ,୫।୬(ଡି.ଏନ୍.ଏ.): ସରକାରୀ ଗୋଚର ଜମିକୁ କୌଣସି ବ୍ୟକ୍ତି ଜବରଦଖଲ କରିପାରିବେ ନାହିଁ ବୋଲି ସରକାରଙ୍କ ସ୍ପଷ୍ଟ ନିୟମ ରହିଛି। ହେଲେ ଯାଜପୁର ଜିଲା ଦଶରଥପୁର ବ୍ଲକ କୟଁା ପଞ୍ଚାୟତ ଦରବା ଗଁାର କେତେଜଣ ବ୍ୟକ୍ତି ଗଁାରେ ଥିବା ଏକର ଏକର ଗୋଚର ଜମିକୁ ଜବରଦଖଲ କରି ଘର କରିଛନ୍ତି। ଏହି ଜବରଦଖଲ ବିରୋଧରେ ଗଁାର କେତେଜଣ ହାଇକୋର୍ଟଙ୍କ ଆଶ୍ରୟ ନେଇଥିଲେ। ହାଇକୋର୍ଟ ଜବରଦଖଲ ଉଚ୍ଛେଦ କରିବାକୁ ଦଶରଥପୁର ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଶନିବାର ଦଶରଥପୁର ତହସିଲ ପକ୍ଷରୁ ଜବରଦଖଲ ଉଚ୍ଛେଦ କରିବାକୁ ଅତିରିକ୍ତ ତହସିଲଦାରଙ୍କ ସହ ଖାନନଗର ଆରଆଇ, ୨ରୁ ୩ ଜଣ ପୋଲିସ କର୍ମଚାରୀଙ୍କୁ ସାଙ୍ଗରେ ଧରି ଦରବା ଗଁାରେ ଏକ ଜେସିବି ମେଶିନ୍ ନେଇ ପହଞ୍ଚତ୍ ଥିଲେ। ଏକଥା ଜାଣିବା ପରେ ଗଁାର ସୁଦର୍ଶନ ବାରିକ, ପରୀକ୍ଷିତ ପଲେଇ, ପ୍ରକାଶ ସାହାଣୀ, ନବଘନ ସାହାଣୀ, ଜଗବନ୍ଧୁ ବାରିକ, ଧର୍ମେଶ ବାରିକ, ବସନ୍ତ ବାରିକ, ଗୁରୁଚରଣ ପଲେଇ ପ୍ରମୁଖଙ୍କ ସହ ଶତାଧିକ ମହିଳା ଏକତ୍ରିତ ହୋଇ ଅତିରିକ୍ତ ତହସିଲଦାରଙ୍କୁ ବିରୋଧ କରିଥିଲେ। ପ୍ରଥମେ ବ୍ୟକ୍ତିଗତ ଜମିରୁ ଜବରଦଖଲ ଉଚ୍ଛେଦ ପରେ ଓ ଗଢ଼ି ଉଠିଥିବା ମନ୍ଦିରକୁ ଭାଙ୍ଗିବାକୁ ଲୋକମାନେ କହିଥିଲେ। କିନ୍ତୁ ଅତିରିକ୍ତ ତହସିଲଦାର ଆଗେ ମନ୍ଦିରଗୁଡ଼ିକୁ ଭାଙ୍ଗିବାକୁ ଚେଷ୍ଟା କରିବାରୁ ଲୋକମାନଙ୍କ ପ୍ରବଳ ପ୍ରତିରୋଧର ସମ୍ମୁଖୀନ ହୋଇଥିଲେ। ଲୋକମାନେ ଅତିରିକ୍ତ ତହସିଲଦାରଙ୍କୁ ଘେରାଉ କରିବା ସହ ରାସ୍ତା ଉପରେ ନିଅଁା ଜାଳି ବିକ୍ଷୋଭ ପ୍ରଦର୍ଶନ କରିଥିଲେ। ଫଳରେ ଅତିରିକ୍ତ ତହସିଲଦାର ଲୋକମାନଙ୍କ ବିରୋଧ ଯୋଗୁ ଉଚ୍ଛେଦ କରି ନ ପାରି ହଟହଟା ହୋଇ ଫେରିଛନ୍ତି।
ସୂଚନାଯୋଗ୍ୟ, ଗୋଚର ଜମି ଉପର ୧୯୭୮ରୁ ଗୋପବନ୍ଧୁ ପୀଠ ନାମରେ ଏକ ଘର ସହ ଲୋକନାଥଙ୍କ ମନ୍ଦିର, ହନୁମାନ ମନ୍ଦିର, ଲକ୍ଷ୍ମୀନାରାୟଣ ମନ୍ଦିର ସହ ଅଲେଖ ବାବାଙ୍କର ଏକ ମଠ ରହିଛି। ମାତ୍ର ଅତିରିକ୍ତ ତହିସଲଦାର ଜବରଦଖଲ ଉଚ୍ଛେଦ କରିବା ପାଇଁ ଉକ୍ତ ଗ୍ରାମକୁ ଯାଇଥିବାବେଳେ ସାଙ୍ଗରେ ପୋଲିସ ଫୋର୍ସ ବଦଳରେ ୨ରୁ ୩ ଜଣ ପୋଲିସ କର୍ମଚାରୀଙ୍କୁ ସାଙ୍ଗରେ ନେଇଥିଲେ। ଫଳରେ ଏତେ ସଂଖ୍ୟକ ବିରୋଧକାରୀଙ୍କୁ ଆୟତ କରିବା ସମ୍ଭବ ହୋଇ ନ ଥିଲା। ଆଇନ ଅନୁଯାୟୀ ଜବରଦଖଲ ଉଚ୍ଛେଦକୁ ଯିବା ପୂର୍ବରୁ ସାଙ୍ଗରେ ପୋଲିସ ଫୋର୍ସ ନେବା କଥା। କିନ୍ତୁ ତହସିଲ ପ୍ରଶାସନ ପକ୍ଷରୁ ଫୋର୍ସ ପଠାଯାଇ ନ ଥିଲା। ଅଯଥାରେ ସରକାରୀ ତହବିଲରୁ ଅର୍ଥ ଅପଚୟ କରାଯାଉଥିବା ଅଭିଯୋଗ ହୋଇଛି। ତହସିଲଦାରଙ୍କ ଏପରି ଖାମଖିଆଲି ନୀତି ପାଇଁ ଜବରଦଖଲ ଉଚ୍ଛେଦ ହୋଇପାରିଲା ନାହିଁ ବୋଲି ଗଁାର ଉଦିତ ନାୟକ, ନଗେଶ ନାୟକ, ବ୍ରଜକାନ୍ତ ନାୟକ, ସୁନୀଲ କୁମାର ରାୟ, ଭୀମସେନ ନାୟକ, ବସନ୍ତ କୁମାର ନାୟକ ପ୍ରମୁଖ କହିଛନ୍ତି।
