ନୂଆଦିଲ୍ଲୀ: ଆର୍ଥିକ ବର୍ଷ ୨୦୨୦-୨୧ର ଦ୍ୱିତୀୟାର୍ଦ୍ଧରେ କେନ୍ଦ୍ର ସରକାର ୪.୩୪ ଲକ୍ଷ କୋଟି ଟଙ୍କାର ଋଣ କରିବେ। କୋଭିଡ୍ ଯୋଗୁ ଦେଶର ଅର୍ଥ ବ୍ୟବସ୍ଥା ସଙ୍କଟ ଦେଇ ଗତି କରୁଛି। ସରକାରଙ୍କୁ ଅଧିକ ଖର୍ଚ୍ଚ କରିବାକୁ ପଡୁଥିବାରୁ ଏଭଳି ଋଣ କରାଯିବା ନେଇ ଯୋଜନା ରହିଛି ବୋଲି ଅର୍ଥ ମନ୍ତ୍ରଣାଳୟ ପକ୍ଷରୁ ବୁଧବାର ସୂଚନା ଦିଆଯାଇଛି। ଚଳିତ ଆର୍ଥତ୍କ ବର୍ଷରେ କେନ୍ଦ୍ର ସରକାର ମୋଟ ୧୨ ଲକ୍ଷ କୋଟି ଟଙ୍କା ଋଣ କରିବା ଲାଗି ଲକ୍ଷ୍ୟ ଧାର୍ଯ୍ୟ କରିଥିବା ଅର୍ଥନୈତିକ ବ୍ୟାପାର ସଚିବ ତରୁଣ ବଜାଜ କହିଛନ୍ତି। ସେପ୍ଟେମ୍ବର ସୁଦ୍ଧା ଚଳିତ ଆର୍ଥତ୍କ ବର୍ଷର ପ୍ରଥମ ୬ ମାସରେ ସରକାର ୭.୬୬ ଲକ୍ଷ କୋଟି ଟଙ୍କା ଋଣ କରିଛନ୍ତି। ଦ୍ୱିତୀୟାର୍ଦ୍ଧରେ ଆଉ ୪.୩୪ ଲକ୍ଷ କୋଟି ଟଙ୍କା ଋଣ କରିବାକୁ ଯୋଜନା ରଖାଯାଇଛି। ଚଳିତ ଆର୍ଥତ୍କ ବର୍ଷର ପ୍ରଥମ ୬ ମାସରେ ମୋଟ ଋଣର ୫୮% ଡେଟେଡ ସିକ୍ୟୁରିଟି ଦ୍ୱାରା ସଂଗ୍ରହ କରାଯାଇଛି। ଏପ୍ରିଲ-ସେପ୍ଟେମ୍ବର ସମୟରେ ସରକାରଙ୍କ ଋଣ ୭.୬୬ ଲକ୍ଷ କୋଟି ଟଙ୍କା ରହିଛି। କୋଭିଡ୍ ସଂକ୍ରମଣ ବଢିବା ଯୋଗୁ ସରକାର ଯୋଜନାରେ ମଧ୍ୟ ପରିବର୍ତ୍ତନ କରିଛନ୍ତି। ବଜାରରୁ ଋଣ ଉଠାଇବା ଯୋଜନାକୁ ୫୦%ରୁ ଊର୍ଦ୍ଧ୍ୱ କରାଯାଇ ମୋଟ ୧୨ ଲକ୍ଷ କୋଟି ଟଙ୍କା ଧାର୍ଯ୍ୟ କରାଯାଇଛି। ଚଳିତ ଆର୍ଥତ୍କ ବର୍ଷ ବିତ୍ତୀୟ ନିଅଣ୍ଟ ୭.୮୦ ଲକ୍ଷ କୋଟି ଟଙ୍କା ରହିବ ବୋଲି ବଜେଟରେ ନିର୍ମଳା ସୀତାରାମନ କହିଥିଲେ। ଏହା ୨୦୧୯-୨୦ରେ ୭.୧ଲକ୍ଷ କୋଟି ଟଙ୍କା ରହିଥିଲା। ସରକାର ବିତ୍ତୀୟ ନିଅଣ୍ଟକୁ ଭରଣାକରିବା ଲାଗି ଡେଟେଡ୍ ସିକ୍ୟୁରିଟି ଆଣ୍ଡ ଟ୍ରେଜେରି ବିଲ୍ ଦ୍ୱାରା ପୁଞ୍ଜି ଉଠାଣ କରୁଛନ୍ତି।
ଏପ୍ରିଲ-ଅଗଷ୍ଟ ବିତ୍ତୀୟ ନିଅଣ୍ଟ ବଜେଟ ଲକ୍ଷ୍ୟର ୧୦୯%
ଚଳିତ ଆର୍ଥତ୍କ ବର୍ଷ ଏପ୍ରିଲରୁ ଅଗଷ୍ଟ ମାସ ମଧ୍ୟରେ ବିତ୍ତୀୟ ନିଅଣ୍ଟ ବଜେଟ ଧାର୍ଯ୍ୟ ଲକ୍ଷ୍ୟର ୧୦୯% ଟପିଛି। ଏହି ସମୟରେ ବିତ୍ତୀୟ ନିଅଣ୍ଟ ୮.୭ ଲକ୍ଷ କୋଟି ଟଙ୍କା ରହିଥିବା ସରକାରୀ ଡାଟାରୁ ସାମ୍ନାକୁ ଆସିଛି। ସରକାରଙ୍କ ନେଟ୍ ଟିକସ ସଂଗ୍ରହ ୨.୮୪ ଲକ୍ଷ କୋଟି ଟଙ୍କା ରହିଥିବା ବେଳେ ମୋଟ ଖର୍ଚ୍ଚ ୧୨.୫ ଲକ୍ଷ କୋଟି ଟଙ୍କା ରହିଛି। କରୋନା ଯୋଗୁ ଟିକସ ସଂଗ୍ରହ କମିଥିବା ବେଳେ ସରକାରଙ୍କ ଖର୍ଚ୍ଚ ବଢିଛି। ୨୦୨୦-୨୧ରେ ବିତ୍ତୀୟ ନିଅଣ୍ଟ ମୋଟ ଜିଡିପିର ୮% ରହିବ ବୋଲି ଅର୍ଥ ବିଶେଷଜ୍ଞଙ୍କ ଦ୍ୱାରା ଆକଳନ କରାଯାଇଛି। ବିତ୍ତୀୟ ନିଅଣ୍ଟ ୩.୫% ରହିବ ବୋଲି ସରକାର ତାଙ୍କ ଆକଳନରେ କହିଛନ୍ତି।
