ଭୁବନେଶ୍ୱର,୭।୧୨(ବ୍ୟୁରୋ): ମମିତା ମେହେର ହତ୍ୟା ମାମଲାର ତଦନ୍ତ ଠିକ୍ ବାଟରେ ଯାଉ ନ ଥିବା ଓ ରାଜ୍ୟ ସରକାର ଏନେଇ ବିଧାନସଭାରେ ଆଲୋଚନା କରିବାକୁ ଚାହୁଁ ନ ଥିବା କଂଗ୍ରେସ ଅଭିଯୋଗ ପୁଣି ଆଣିଛି। ଏଥିସହ ହାଇକୋର୍ଟଙ୍କ ତତ୍ତ୍ୱାବଧାନରେ ଏସ୍ଆଇଟି ତଦନ୍ତ ଦାବିକୁ ମଧ୍ୟ ଦୋହରାଇଛି।
ସୋମବାର କଂଗ୍ରେସ ଭବନରେ ଆୟୋଜିତ ଖବରଦାତା ସମ୍ମିଳନୀରେ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି, ବିରୋଧୀଙ୍କୁ ଗୃହ ଅଚଳ ପାଇଁ ଦାୟୀ କରୁଥିବା ରାଜ୍ୟ ସରକାର ମମିତା ହତ୍ୟା ଘଟଣାରେ ଭାଜପା ଓ କଂଗ୍ରେସ ଆଣୁଥିବା ମୁଲତବୀ ପ୍ରସ୍ତାବ ଉପରେ ଆଲୋଚନା ପାଇଁ ଅମଙ୍ଗ ହେଉଛନ୍ତି। ଛାତ୍ରୀନିବାସରେ ଯୌନ ନିର୍ଯାତନା ହୋଇଥିବା ଓ ଗୁପ୍ତ କୋଠରି ନେଇ ପୋଲିସ ପକ୍ଷରୁ କୁହାଯାଇଥିଲେ ମଧ୍ୟ ଏହାର ତଦନ୍ତ କରାଯାଉନାହିଁ କାହିଁକି। କେବଳ ହତ୍ୟାର ତଦନ୍ତ କରାଯାଉଛି, ଯାହା ତାହା ମୂଳ ତଦନ୍ତଠାରୁ ବହୁ ଦୂରରେ। ସରକାର ଯେଉଁ ପ୍ରମାଣ କଥା କହୁଛନ୍ତି, ଏ ପର୍ଯ୍ୟନ୍ତ ଯେତିକି ପ୍ରମାଣ ମିଳିଛି ଓ ଗଣମାଧ୍ୟମରେ ଘୁରି ବୁଲୁଛି, ସେତିକି ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ହତ୍ୟାକାଣ୍ଡରେ ସମ୍ପୃକ୍ତି ଦର୍ଶାଇବା ପାଇଁ ଯଥେଷ୍ଟ ବୋଲି ସେ କହିଛନ୍ତି। ବର୍ତ୍ତମାନ ପର୍ଯ୍ୟନ୍ତ ବହୁ ପ୍ରମାଣ ନଷ୍ଟ ହୋଇଯାଇଛି। ଏବେ ଯେଉଁ ବାଟରେ ଅନୁସନ୍ଧାନ ଚାଲିଛି ସେଥିରେ ଗିରଫ ଅଭିଯୁକ୍ତ ସନ୍ସାଇନ ସ୍କୁଲ୍ ସଭାପତି ଗୋବିନ୍ଦ ସାହୁ ନିର୍ଦ୍ଦୋଷରେ ଖଲାସ ହୋଇଯିବେ। ସୁପ୍ରିମକୋର୍ଟଙ୍କ ରାୟ ଅନୁଯାୟୀ, ଯଦି କୌଣସି ତଦନ୍ତରେ ଲୋକେ ସନ୍ତୁଷ୍ଟ ନାହାନ୍ତି ତାହା ଗ୍ରହଣ କରାଯାଇପାରିବ ନାହିଁ। ଏଣୁ ହାଇକୋର୍ଟର ସିଟିଂ ଜଜ୍ଙ୍କ ତତ୍ତ୍ୱାବଧାନରେ ଏସ୍ଆଇଟି ଗଠନ କରି ତଦନ୍ତ କରାଯିବା ପାଇଁ ନରସିଂହ ଦାବି କରିଛନ୍ତି। ଖବରଦାତା ସମ୍ମିଳନୀରେ ପିସିସି ସଭାପତି ନିରଞ୍ଜନ ପଟ୍ଟନାୟକ, ବିଧାୟକ ମହମ୍ମଦ ମୋକିମ, ସନ୍ତୋଷ ସିଂ ସାଲୁଜା, ତାରାପ୍ରସାଦ ବାହିନୀପତି, ଅଧିରାଜ ପାଣିଗ୍ରାହୀ ପ୍ରମୁଖ ଉପସ୍ଥିତ ଥିଲେ।
ଅପରପକ୍ଷରେ କଂଗ୍ରେସର ଏଭଳି ବିବୃତିକୁ ଦୁର୍ଭାଗ୍ୟଜନକ କହିଛି ବିଜେଡି। ବିଜେଡି ରାଜ୍ୟ କାର୍ଯ୍ୟାଳୟଠାରେ ଖବରଦାତା ସମ୍ମିଳନୀରେ ବିଧାୟକ ଅତନୁ ସବ୍ୟସାଚୀ ନାୟକ କହିଛନ୍ତିି, ବିଧାନସଭା ଅଧିବେଶନର ପ୍ରଥମ ଦିନରୁ କଂଗ୍ରେସ ବିଧାୟକମାନେ ଭାଜପା ବିଧାୟକଙ୍କ ସହ ମିଶି ବିଧାନସଭା ଚଳାଇବାକୁ ଦେଉନାହାନ୍ତି। ରାଜ୍ୟ ସରକାରଙ୍କ ଅନୁରୋଧ ପରେ ଓଡ଼ିଶା ହାଇକୋର୍ଟ ଜଣେ ଅବସରପ୍ରାପ୍ତ ଜିଲା ଜଜ୍ଙ୍କୁ ନିଯୁକ୍ତ କରିଛନ୍ତି। ସମସ୍ତେ ହାଇକୋର୍ଟଙ୍କ ନିଷ୍ପତ୍ତିକୁ ସମ୍ମାନ ଦେବା ଉଚିତ। ନରସିଂହ ମିଶ୍ରଙ୍କୁ ଅନୁରୋଧ, ଯଦି ତାଙ୍କ ନିକଟରେ କୌଣସି ପ୍ରମାଣ ଅଛି ତେବେ ସେ କୋର୍ଟଙ୍କ ନିକଟକୁ ଯାଇପାରିବେ ବୋଲି ଅତନୁ କହିଛନ୍ତି।
