ତେନ୍ତୁଳିଖୁଣ୍ଟି, ୨୬।୮(ଡି.ଏନ୍.ଏ.): ନବରଙ୍ଗପୁର ଜିଲା ତେନ୍ତୁଲିଖୁଣ୍ଟି ବ୍ଲକ ପୁଜାରୀଗୁଡ଼ା ପଞ୍ଚାୟତରେ ଜାତୀୟ ଖାଦ୍ୟ ନିରାପତ୍ତା ଆଇନରେ ଚାଉଳ ବଣ୍ଟନରେ ଅନିୟମିତତା ହେଉଛି। ଉକ୍ତ ଯୋଜନାରେ ମୃତ ହିତାଧିକାରୀଙ୍କ ନାମରେ ମଧ୍ୟ ଚାଉଳ ଉଠୁଛି। ଏପରିକି କୋରନା ସମୟରେ ଆସିଥିବା ସହାୟତା ଟଙ୍କା ମଧ୍ୟ ଉଠାଯାଇଛି ବୋଲି ଜଣେ ମୃତ ହିତାଧିକାରୀଙ୍କ ପରିବର ଲୋକେ ଅଭିଯୋଗ କରିଛନ୍ତି। ୩ବର୍ଷ ହେବ ଏପରି କରାଯାଉଛି ବୋଲି ଅଭିଯୋଗ ହୋଇଛି। ବିନା ଆଧାରକାର୍ଡ ଓ ଫିଙ୍ଗର ପ୍ରିଣ୍ଟରେ ଚାଉଳ କିପରି ଉଠାଯାଇଛି ବୋଲି ଅଭିଯୋଗକାରୀମାନେ ପ୍ରଶ୍ନ କରିଛନ୍ତି।
ବିନା ଆଧାର କାର୍ଡ ଓ ଫିଙ୍ଗର ପ୍ରିଣ୍ଟ୍ରେ ଚାଉଳ ଦିଆ ଯାଉ ନ ଥିବାରୁ ବିିଭିନ୍ନ ପଞ୍ଚାୟତରେ ରୁଗ୍ଣ ତଥା ବୃଦ୍ଧାବୃଦ୍ଧ ହିତାଧିକାରୀ ନିଜ ହକ୍ ପାଇବାରୁ ବଞ୍ଚତ୍ତ ହେଉଥିବାବେଳେ ପୂଜାରୀଗୁଡ଼ାରେ ଏହାର ବ୍ୟତିକ୍ରମ ଘଟିଛି। ମୃତା ଜେଜେ ମା’ ଭାନୁମତି ବିଷୋୟୀଙ୍କ କାର୍ଡ ନଂ. ୨୩୦୯୧୪୧୦୫୪୯ରେ ୩ବର୍ଷ ହେବ ଚାଉଳ ଉଠାଯାଉଛି। ଏହା ସହ ସରକାର ଦେଇଥିବା କରୋନା ସହାୟତା ରାଶି ମଧ୍ୟ ଉଠାଯାଇଛି ବୋଲି ତାଙ୍କ ନାତି ଚୁଡ଼ା ବିଷୋୟୀ ଅଭିଯୋଗ କରିଛନ୍ତି। ଘଟଣା ସମ୍ପର୍କରେ ଯୋଗାଣ ସହାୟକଙ୍କୁ ପଚାରିବାରୁ ଭାନୁମତି ବିଷୋୟୀଙ୍କ ଚାଉଳ ପ୍ରତି ମାସରେ ପ୍ରଦାନ କରୁଛି ବୋଲି କହିଥିବା ଚୁଡା ପ୍ରକାଶ କରିଛନ୍ତି। ଜେଜେ ମା’ଙ୍କ ଚାଉଳ ଓ କରୋନା ପାଇଁ ଆସିଥିବା ସାହାଯ୍ୟ ଟଙ୍କାକୁ କିଭଳି ଅନ୍ୟ କେହି ଆସି ନେଉଛନ୍ତି ତାହା ଆଶ୍ଚର୍ଯ୍ୟକର ବୋଲି ଚୁଡା କହିଛନ୍ତି। ଘଟଣା ସମ୍ପର୍କରେ ଚୁଡା ସ୍ଥାନୀୟ ଅଞ୍ଚଳର କେତେଜଣ ସଚେତନ ଯୁବକଙ୍କୁ କହିଥିଲେ। ସେମାନେ ସମସ୍ତେ ଯୋଗାଣ ଅଧିକାରୀ ରୋହିତ ମାଝିଙ୍କୁ ଯୋଗାଯୋଗ କରିଥିଲେ। ଘଟଣାର ଯାଞ୍ଚ କରାଯାଉଛି ବୋଲି ସେ କହିଥିଲେ। ଯୋଗାଣ ସହାୟକଙ୍କୁ ମୃତକଙ୍କ ତାଲିକା ମାଗୁଛି କିନ୍ତୁ ସେ ଦେଇନାହାନ୍ତି। ଏ ନେଇ ତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି ବୋଲି ଯୋଗାଣ ଅଧିକାରୀ ରୋହିତ ମାଝି କହିଛନ୍ତି। ପଞ୍ଚାୟତରେ ମୃତ ହିତାଧିକାରୀଙ୍କ ନାମ ତାଲିକାରୁ ବାଦ ନ ହେବାର କାରଣ କ’ଣ ଓ ଏହାପାଇଁ କିଏ ଦାୟୀ ବୋଲି ବୁଦ୍ଧିଜୀବୀମାନେ ପ୍ରଶ୍ନ କରିଛନ୍ତି। ତେନ୍ତୁଳିଖୁଣ୍ଟି ପଞ୍ଚାୟତ ସମିତି ଅଁଳାଭଟ୍ଟାରେ ଚାଉଳ ହଡ଼ପ ଭଳି ଏହା ମଧ୍ୟ ଏକ ଦୁର୍ନୀତି। ଏଣୁ ତୁରନ୍ତ ସମଗ୍ର ପଞ୍ଚାୟତ ସମିତିର ଖାଦ୍ୟ ସୁରକ୍ଷା ଆଇନ ହିତାଧିକାରୀଙ୍କ ଫିଙ୍ଗର ପ୍ରିଣ୍ଟ ଯାଞ୍ଚ କରି ଗଡ଼ବଡ଼ କରିଥିବା ଦୋଷୀଙ୍କ ବିରୋଧର କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି।
