ଥୁଆମୂଳ ରାମପୁର,୨୪ା୧(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅନ୍ତର୍ଗତ କାଣିଗୁମା ପଞ୍ଚାୟତର ଧୂଳିଗୁଡ଼ା ଛକ ନିକଟରେ ଶନିବାର ଅପରାହ୍ନରେ ଏକ ସଡ଼କ ଦୁର୍ଘଟଣା ଘଟିଛି। କାର୍ ଓ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ବାଇକ୍ରେ ଥିବା ୨ ଜଣ ଗୁରୁତର ହୋଇଛନ୍ତି। ସେମାନଙ୍କ ମଧ୍ୟରୁ ଥୁଆମୂଳ ପଞ୍ଚାୟତର ପୂର୍ବତନ ସରପଞ୍ଚ ଶାଗୁ ମାଝୀ (୫୫)ଙ୍କ ଅବସ୍ଥା ସଙ୍କଟାପନ୍ନ ରହିଛି।
ସୂଚନା ଅନୁଯାୟୀ, ଥୁଆମୂଳ ଗ୍ରାମର ମହେନ୍ଦ୍ର ପ୍ରଧାନୀ (୪୦) ଓ ପୂର୍ବତନ ସରପଞ୍ଚ ଶାଗୁ ମାଝୀ କାଣିଗୁମା ସାପ୍ତାହିକ ହାଟରୁ ବଜାର ସାରି ଏକ ବାଇକ୍ (ଓଡି -୦୮ ଏଲ୍ ୦୪୨୦) ଯୋଗେ ନିଜ ଘରକୁ ଫେରୁଥିଲେ। ଏହି ସମୟରେ ଥୁଆମୂଳ ରାମପୁର ପଟୁ ଭବାନୀପାଟଣା ଅଭିମୁଖେ ଯାଉଥିବା ଏକ କାର୍ (ଓଡି ୦୨ ଏଜି ୮୮୪୪) ସହ ସେମାନଙ୍କର ମୁହାଁମୁହିଁ ଧକ୍କା ହୋଇଥିଲା। ଧକ୍କା ଏତେ ଜୋର୍ଦାର ଥିଲା ଯେ ବାଇକ୍ଆରୋହୀ ଦୁହେଁ ରାସ୍ତାରେ ଛିଟିକି ପଡ଼ିଥିଲେ। କାର୍ର ସମ୍ମୁଖ ଭାଗ ଓ କାଚ ସମ୍ପୂର୍ଣ୍ଣ ଚୂର୍ମାର ହୋଇଯାଇଛି।
ଦୁର୍ଘଟଣା ପରେ ସ୍ଥାନୀୟ ଲୋକେ ଘଟଣାସ୍ଥଳରେ ରୁଣ୍ଡ ହୋଇ କିଛି ସମୟ ପାଇଁ କାର୍ ଚାଳକଙ୍କୁ ଘେରି ରହିବା ସହ ଉତ୍ତେଜନା ପ୍ରକାଶ ପାଇଥିଲା। ପରେ ଆହତଙ୍କୁ ଆମ୍ବୁଲାନ୍ସ ଯୋଗେ କାଣିଗୁମାସ୍ଥିତ ‘ସ୍ବାସ୍ଥ୍ୟ ସ୍ବରାଜ’ ହସ୍ପିଟାଲକୁ ନିଆଯାଇଥିଲା। ଶାଗୁ ମାଝୀଙ୍କ ମୁଣ୍ଡରେ ଗଭୀର ଆଘାତ ଲାଗିଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ମହେନ୍ଦ୍ର ପ୍ରଧାନୀଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି। ଏହି ଦୁର୍ଘଟଣା ପାଇଁ ରାସ୍ତା ନିର୍ମାଣାଧୀନ କାର୍ଯ୍ୟର ମନ୍ଥରଗତିକୁ ଦାୟୀ କରିଛନ୍ତି ଥୁଆମୂଳ ସରପଞ୍ଚ ତଥା ବ୍ଲକ ସରପଞ୍ଚ ସଂଘ ସଭାପତି ବଳଭଦ୍ର ଜାନୀ।
ସେ କହିଛନ୍ତି ଯେ, ଗୁଣୁପୁର-ଥୁଆମୂଳ ରାମପୁର ମୁଖ୍ୟ ରାସ୍ତାର ସମ୍ପ୍ରସାରଣ କାମ ଅତି ନିମ୍ନମାନର ଓ ମନ୍ଥର ଭାବେ ଚାଲିଛି। ରାସ୍ତା ସାରା ଧୂଳି, ବାଲି ଓ ଚିପ୍ସ ବିଛାଡ଼ି ହୋଇ ପଡ଼ିଥିଲେ ହେଁ ନିୟମିତ ପାଣି ପକାଯାଉ ନାହିଁ କି ରୋଲର ଚଲାଯାଉନାହିଁ। ଫଳରେ ଦୃଶ୍ୟମାନ ଦୂରତା କମିବା ସହ ଗାଡ଼ି ସ୍ଲିପ୍ କରି ଦୁର୍ଘଟଣା ଘଟୁଛି। ଏଥିସହ ଜାନୀ ଟ୍ରାଫିକ ନିୟମ ଉଲ୍ଲଂଘନକୁ ନେଇ ଚିନ୍ତା ପ୍ରକାଶ କରିଛନ୍ତି। ଅଧିକାଂଶ ଚାଳକଙ୍କ ପାଖରେ ଲାଇସେନ୍ସ ନାହିଁ କି ସେମାନେ ହେଲମେଟ୍ ଓ ସିଟ୍ବେଲ୍ଟ ବ୍ୟବହାର କରୁନାହାନ୍ତି। ନିଜର ଅମୂଲ୍ୟ ଜୀବନକୁ ବଞ୍ଚାନ୍ତୁ ଓ ନିୟମ ମାନନ୍ତୁ ବୋଲି ସେ ଜନସାଧାରଣଙ୍କୁ ଅପିଲ କରିଛନ୍ତି। ଯଦି ବିଭାଗୀୟ ଅଧିକାରୀ ଓ ଠିକାସଂସ୍ଥା ତୁରନ୍ତ ସତର୍କ ନ ହୁଅନ୍ତି, ତେବେ ଆଗାମୀ ଦିନରେ ବଡ଼ ଦୁର୍ଘଟଣା ପାଇଁ ସେମାନେ ଦାୟୀ ରହିବେ ବୋଲି ସେ ଚେତାବନୀ ଦେଇଛନ୍ତି।
