ଥିରୁଭାନନ୍ତପୁରମ୍: ପାଠ ପଢ଼ିବାର ପ୍ରବଳ ଆଗ୍ରହ ଥିଲେ କୌଣସି ପ୍ରକାରର ପ୍ରତିବନ୍ଧକ ବି ବାଟ ଓଗାଳିପାରେନି। ଏହାର ଏକ ଉଦାହରଣ ହେଉଛନ୍ତି ଡକ୍ଟର କେ.ଏସ୍. ତ୍ରିଶା। ବିଭିନ୍ନ ବିଷୟରେ ଜାଣିବା ପାଇଁ ତାଙ୍କର ଏତେ ଆଗ୍ରହ ଯେ ଏଥି ନିମନ୍ତେ ସେ ବିଶ୍ୱବିଦ୍ୟାଳୟରେ ବିଭିନ୍ନ ଡିଗ୍ରୀ ହାସଲ କରିବାକୁ ଇଚ୍ଛା କରିଥିଲେ। ଏଥିପାଇଁ ସେ ବିଶ୍ୱବିଦ୍ୟାଳୟରେ ବିଭିନ୍ନ ପାଠ୍ୟକ୍ରମରେ ନାମ ଲେଖାଇ ସଫଳତା ହାସଲ କରିପାରିଛନ୍ତି। ଆଉ ପ୍ରତିବର୍ଷ ନୂଆ ନୂଆ କୋର୍ସ କରି ଏବେ ସେ ୧୨ଟି ପୋଷ୍ଟ ଗ୍ରାଜୁଏଟ୍ ଡିଗ୍ରୀ ହାସଲ କରିପାରିଛନ୍ତି। ଏତେଗୁଡ଼ିଏ ପିଜି ଡିଗ୍ରୀ ହାସଲ କରିବାରେ ଏବେ ସେ ଭାରତର ପ୍ରଥମ ମହିଳା ହୋଇପାରିଛନ୍ତି।
କେରଳର ଡକ୍ଟର କେ.ଏସ୍ . ତ୍ରିଶା ଏବେ ୧୨ଟି ପୋଷ୍ଟ ଗ୍ରାଜୁଏଟ୍ ଡିଗ୍ରୀ ହାସଲ କରିଛନ୍ତି। ୟୁନିଭର୍ସିଟି ରେକର୍ଡ ଫୋରମରେ ତ୍ରିଶାଙ୍କୁ ଏକ ସମୟରେ ଏତେଗୁଡ଼ିଏ ଗ୍ରାଜୁଏଟ୍ ଏବଂ ଡିପ୍ଲୋମା ସାର୍ଟିଫିକେଟ୍ କୋର୍ସ କରିଥିବା ପ୍ରଥମ ମହିଳା ଘୋଷିତ କରାଯାଇଛି। ତ୍ରିଶା ଇଂଲିଶ, ସଂସ୍କୃତ, ସଙ୍ଗୀତର ତିନୋଟି ବିଭାଗ, ଭାରତନାଟ୍ୟମ୍, ଯୋଗ, ସୋସିଓଲୋଜି ଏବଂ ପବ୍ଲିକ୍ ଆଡମିନିଷ୍ଟ୍ରେଶନ୍ ଭଳି ବିଭିନ୍ନ ବିଷୟରେ ପିଜି ଡିଗ୍ରୀ ହାସଲ କରିଛନ୍ତି। ତ୍ରିଶା ୩୦ ବର୍ଷ ହେଲାଣି କାଲିକଟ ଗାର୍ଲସ ହାୟର ସେକେଣ୍ଡାରୀ ସ୍କୁଲରେ ଶିକ୍ଷକଭାବେ ପାଠ ପଢାଉଛନ୍ତି। ଏହା ସହିତ ସେ ବାବୁରାଜ ମେମୋରିଆଲ ମ୍ୟୁଜିକାଲ ଏକାଡେମୀରେ ପ୍ରିନ୍ସିପାଲଭାବେ ଦାୟିତ୍ୱ ତୁଲାଉଛନ୍ତି। ଏହା ସହିତ ଏସବୁ ଡିଗ୍ରୀ ହାସଲ ନିମନ୍ତେ ପାଠପଢା ଶେଷ କରି ସଫଳତା ହାସଲ କରିଛନ୍ତି ଏବଂ ଏକ ଉପନ୍ୟାସ ତଥା ଏକ କବିତା ପୁସ୍ତକ ବି ରଚନା କରିଛନ୍ତି। ଏହା ସହିତ ସେ ବିଭିନ୍ନ ଅନୁଷ୍ଠାନରେ ସ୍ବତନ୍ତ୍ର ଦାୟିତ୍ୱ ବି ତୁଲାଉଛନ୍ତି। ତେବେ ପାଠ ପଢ଼ି ବିଭିନ୍ନ ବିଷୟରେ ଡିଗ୍ରୀ ହାସଲ କରିବା ପାଇଁ ତାଙ୍କର ସ୍ବତନ୍ତ୍ର ଆଗ୍ରହ ରହିଥିଲା। ତେଣୁ ସେ ଗୋଟିଏ ପରେ ଗୋଟିଏ କୋର୍ସ ନିମନ୍ତେ ପାଠ ପଢ଼ି ସଫଳତା ହାସଲ କରିଛନ୍ତି ବୋଲି କହିଛନ୍ତି।
