ଭଦ୍ରକ ଜିଲା ବାସୁଦେବପୁରର ଗଁାଠୁ ସହର ପର୍ଯ୍ୟନ୍ତ ବିଭିନ୍ନ ପୂଜା ମଣ୍ଡପରେ ଶନିବାର ମା’ ଦୁର୍ଗାଙ୍କ ମହାସପ୍ତମୀ ପୂଜା ଅନୁଷ୍ଠିତ ହୋଇଛି। ବାସୁଦେବପୁର ମୁଖ୍ୟ ବଜାରସ୍ଥିତ ପୌରପାଳିକା ଅଫିସ ସାମ୍ନାରେ ଥିବା ପୂଜା ମଣ୍ଡପରେ ମା’ ଦୁର୍ଗାଙ୍କ ପୂଜା ଏଥର ୫୯ବର୍ଷରେ ପହଞ୍ଚତ୍ଛି। ଏହା ଥାନାହାଟ ଦୁର୍ଗାପୂଜା ନାମରେ ପରିଚିତ। ୧୯୬୫ରେ ବାସୁଦେବପୁରର ତତ୍କାଳୀନ ଥାନା କର୍ମଚାରୀ ଡମ୍ବରୁଧର ମହାନ୍ତି, ଯୋଗାଣ ଅଧିକାରୀ ଶତ୍ରୁଘ୍ନ ରାଉତ, ସଂଗ୍ରାମୀ ଅନିରୁଦ୍ଧ ମହାନ୍ତି, ମୁରଲୀଧର ସାମଲ ଓ କେତେକ ସ୍ଥାନୀୟ ବ୍ୟକ୍ତିଙ୍କ ଉଦ୍ୟମ ଓ ସହଯୋଗକ୍ରମେ ଏହି ଦୁର୍ଗାପୂଜା ପ୍ରଥମେ ବାସୁଦେବପୁର ପରିବା ହାଟରେ ଏକ ଚାଳଘରେ ଆରମ୍ଭ ହୋଇଥିଲା। ପରବର୍ତ୍ତୀ ସମୟରେ ଏହାର ରୂପରେଖ ବଦଳି ଆଜବେଷ୍ଟସ୍ ଓ ଏବେ ସ୍ଥାୟୀ ପକ୍କାଗୃହ ମଣ୍ଡପରେ ପୂଜା ହେଉଛି। ପୂର୍ବ ପରମ୍ପରା ଅନୁସାରେ ଏହି ମଣ୍ଡପକୁ ପ୍ରଥମ ଭୋଗ ବାସୁଦେବପୁର ଥାନାରୁ ହିଁ ଆସିଥାଏ। ମା’ ଦୁର୍ଗାଙ୍କ ଆକର୍ଷଣୀୟ ମେଢ଼ ସହ ପାର୍ଶ୍ୱ ଦେବଦେବୀଙ୍କ ମୂର୍ତ୍ତି ଅତି ନିଖୁଣ ଭାବେ ଗଢ଼ାଯାଇ ପୂଜା କରାଯାଉଛି। ଥାନାହାଟ ପୂଜା କମିଟିର ସଭାପତି ପ୍ରଦୀପ ସାମଲ ଓ ସମ୍ପାଦକ ଭାବେ ଜୀବନ ମହାନ୍ତି ଦାୟିତ୍ୱ ତୁଲାଉଛନ୍ତି। ମା’ଙ୍କୁ ଦର୍ଶନ ପାଇଁ ପୂଜା ମଣ୍ଡପରେ ଭିଡ଼ ଲାଗିବା ଆରମ୍ଭ ହେଲାଣି। ସେହିପରି ସମିଆ, ଗୁଆଗଡ଼ିଆ, ବେତଡ଼ା, ନରସିଂହପୁର, ବିଦ୍ୟୁତ୍ମାର୍ଗ, ବାଲିନଗର, ତାରିଣୀଛକ, ଉଚ୍ଚଡିହା, ଭୈରବପୁର, ଦେଉଳୀ, ଇରମ ସମେତ ବିଭିନ୍ନ ସ୍ଥାନରେ ଦୁର୍ଗାପୂଜା କରାଯାଉଛି।
– ନାରାୟଣ ପ୍ରସାଦ ବାରିକ, ବାସୁଦେବପୁର, ଭଦ୍ରକ
