ବାଲିମେଳା,୧୬।୭(ଶିବଦତ୍ତ ସାହୁ )ମାଲକାନଗିରି ପରି ଆଦିବାସୀ ଅଧ୍ୟୁଷିତ ଅଞ୍ଚଳରେ ଶିଶୁ ଶ୍ରମିକ ଉଛେଦ କରିବାକୁ ଜିଲା ପ୍ରଶାସନ ପକ୍ଷରୁ ସ୍ବତନ୍ତ୍ର କାର୍ଯ୍ୟକ୍ରମ ହାତକୁ ନିଆଯାଇଛି। ହେଲେ ଏହି କାର୍ଯ୍ୟକ୍ରମର ସଫଳ ରୂପାୟନ ହୋଇପାରୁ ନାହିଁ। ଏବେ ବି ବିଭିନ୍ନ ହୋଟେଲ, ଗ୍ୟାରେଜ, ବ୍ୟବସାୟିକ ପ୍ରତିଷ୍ଠାନ, ଦୋକାନ ଏବଂ ଛୋଟ ପିଲାମାନଙ୍କୁ ବିଭିନ୍ନ ସ୍ଥାନରେ କାମରେ ଲଗାଯାଉଛ। ଗୋଟିଏ ପଟେ କର୍ମ ନିୟୋଜନ ଓ ସଚେତନତାର ଅଭାବ, ଅନ୍ୟପଟେ ପରିବାର ଆର୍ଥିକ ସ୍ଥିତିର ବୋଝ ଯୋଗୁ ସେମାଙ୍କର ପିଲାଙ୍କୁ ଛୋଟ ବୟସରେ କାମରେ ଲଗାଉଛନ୍ତ। ଏହାର ସୁଯୋଗରେ ଶିଶୁ ସୁରକ୍ଷା ଆଇନ ଆଖିରେ ଧୂଳିଦେଇ ମୁଷ୍ଟିମେୟ ଲୋକେ କୋମଳମତି ଶିଶୁଙ୍କୁ କର୍ମ କ୍ଷେତ୍ରରେ ବ୍ୟବହାର କରୁଛନ୍ତି। କେତେକ କ୍ଷେତ୍ରରେ ଏଭଳି ବେଆଇନ କାର୍ଯ୍ୟ ବିଭାଗୀୟ ଅଧିକାରୀଙ୍କ ଜାଣତରେ ହେଉଥିବା ଅଭିଯୋଗ ହେଉଛି। ଶିଶୁମାନଙ୍କୁ କାର୍ଯ୍ୟରେ ଲଗାଇଥିବା ମାଲିକମାନଙ୍କ ବିରୁଦ୍ଧରେ କି ପ୍ରକାର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ତାହା ଜଣା ପଡୁନାହିଁ। କେନ୍ଦ୍ର ସରକାରଙ୍କ ଶ୍ରମ ମନ୍ତ୍ରଣାଳୟ ଓ ରାଜ୍ୟ ସରକାରଙ୍କ ଶ୍ରମ ବିଭାଗର ସହ ଭାଗିତାରେ ଅନେକ ଯୋଜନା ପ୍ରଣୟନ କରାଯାଇଛି । ଶିଶୁ ମାନଙ୍କୁ ଚି଼ହ୍ନଟ କରି ସେମାନଙ୍କୁ ମୁଖ୍ୟ ସ୍ରୋତରେ ସାମିଲ କରିବା ଏହାର ମୂଳ ଲକ୍ଷ୍ୟ ମୁଖ୍ୟତଃ ଛୋଟ ପିଲାଙ୍କୁ ଶିକ୍ଷାଦାନ କରିବା, ମାଗଣା ପାଠ୍ୟ ପୁସ୍ତକ ଉପକରଣ ସହ ସେମାନଙ୍କୁ ଷ୍ଟାଇପେଣ୍ଡ ପ୍ରଦାନ କରିବା ଆଦି ଅନେକ ଯୋଜନା ରହିଛି। ହେଲେ ଏହା ଏବେ ସ୍ଥାଣୁ ପାଲଟୁଛି । ଶ୍ରମ ବିଭାଗର ଦୂର ଦୃଷ୍ଟିର ଅଭାବରୁ ଶିଶୁ ଶ୍ରମିକଙ୍କ ସଂଖ୍ୟା କମିବା ପରିବର୍ତ୍ତେ ବୃଦ୍ଧି ପାଇବାରେ ଲାଗିଛି। ସରକାରଙ୍କ ଅନ୍ୟ ବହୁମୁଖୀ ଯୋଜନା ଲୋକଙ୍କ ନିକଟରେ ପହଞ୍ଚି ପାରୁ ନ ଥିବାରୁ ପରିବାରର ଆର୍ଥିକ ସ୍ଥିତି ସୁଧୁରି ପାରୁନାହିଁ। ଫକରେ ମୁଖ୍ୟସ୍ରୋତାକୁ ଫେରିଥିବା ପିଲାଙ୍କୁ ପରିବାର ଲୋକେ ପୁଣିଥରେ କାମ କରିବାକୁ ଛାଡି ଦେଉଛନ୍ତି।
ମାଲକାନଗିରି ଜିଲାର ବିଭିନ୍ନ ସ୍ଥାନରେ ଶିଶୁମାନେ, ଗୋରୁ ଚରାଇବା, ଜଙ୍ଗଳରୁ କାଠ ଆଣିବା,ହୋଟେଲରେ ବାସନ ମାଜିବା,ବିଭିନ୍ନ ଦୋକାନ ଆଉ ଗ୍ୟାରେଜରେ କାମ କରିବା, ଠିକାଦାରଙ୍କ ନିକଟରେ ମୂଲ ଲାଗିବା ଭଳି କାର୍ଯ୍ୟ କରୁଥିବା ଦେଖିଲେ ଜିଲାର ଶିଶୁ ଶ୍ରମିକଙ୍କ ସାଙ୍ଘାତିକ ସ୍ଥିତି ବିଷୟରେ ଜଣା ପଡେ। ଏ ସମ୍ପର୍କରେ ଜିଲା ସହକାରୀ ଶ୍ରମ ଅଧିକାରୀ ବିଶ୍ୱ ରଞ୍ଜନ କଅଁରଙ୍କୁ ପଚାରିବାରୁ ଶିଶୁ ଶ୍ରମିକ ପ୍ରଥକୁ ବନ୍ଦ କରିବା ପାଇଁ ବିଭିନ୍ନ ସମୟରେ ଜିଲାର ବିଭିନ୍ନ ଅଞ୍ଚଳରେ ଚଢ଼ାଉ ଜାରି ରହିଛି। ଆଗାମୀ ଦିନରେ ଆହୁରି ଚଢ଼ାଉ କରଯିବ ା ଆଇନ ଉଲ୍ଲଂଘଂନ କରି ଶିଶୁମାନଙ୍କୁ କାର୍ଯ୍ୟରେ ନିୟୋଜିତ କରିଥିବା ମାଲିକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସହକାରୀ ଶ୍ରମ ଅଧିକାରୀ କଅଁର କହିଛନ୍ତି।
