କଟକ ଅଫିସ,୯ା୧୧: ହାଇକୋର୍ଟ ବାର୍ ଆସୋସିଏଶନ୍ ସମେତ ରାଜ୍ୟର ସମସ୍ତ ଓକିଲ ସଂଘ ନିର୍ବାଚନ ଆସନ୍ତା ଡିସେମ୍ବର ୧୨ରେ ଅନୁଷ୍ଠିତ ହେବ। ଏନେଇ ବିଧିବଦ୍ଧ ବିଜ୍ଞପ୍ତି ଜାରି କରାଯାଇଥିବା ଓଡ଼ିଶା ବାର୍ କାଉନ୍ସିଲ ସମ୍ପାଦକ ଜେ. କେ. ସାମନ୍ତସିଂହାର ସୂଚନା ଦେଇଛନ୍ତି। କୋଭିଡ୍ ଗାଇଡ୍ଲାଇନ ଅନୁଯାୟୀ ନିର୍ବାଚନର ସମସ୍ତ ପ୍ରକ୍ରିୟା ହେବ। ଭୋଟ୍ ପାଇଁ ପର୍ଯ୍ୟାପ୍ତ ପରିମାଣର ମାସ୍କ, ସାନିଟାଇଜର, ସାମାଜିକ ଦୂରତ୍ୱ ଓ ଗହଳି କମାଇବାକୁ ଅଧିକ ସଂଖ୍ୟାରେ ପୋଲିଂ ବୁଥ୍ ବ୍ୟବସ୍ଥା କରାଯିବ।
ନିର୍ବାଚନ ନିମନ୍ତେ ଆସନ୍ତା ୨୪ ଓ ୨୫ ତାରିଖରେ ପ୍ରାର୍ଥିପତ୍ର ଦାଖଲ ଏବଂ ୨୬ରେ ଯାଞ୍ଚ କରାଯିବ। ପ୍ରାର୍ଥିପତ୍ର ଯାଞ୍ଚ ବେଳେ ଆବେଦନ କରିଥିବା ପ୍ରାର୍ଥୀମାନେ ନିଜର ପ୍ରଥମ ଓ ଦ୍ୱିତୀୟ ପ୍ରସ୍ତାବକଙ୍କ ପରିଚୟପତ୍ର (ବାର୍ କାଉନ୍ସିଲ ଦ୍ୱାରା ଦିଆଯାଇଥିବା)ର ନକଲ କପି ନିର୍ବାଚନ ଅଧିକାରୀଙ୍କ ନିକଟରେ ଜମା କରିବେ। ପ୍ରାର୍ଥିପତ୍ର ଦାଖଲର ଦେୟ ବାର୍ ଆସୋସିଏଶନମାନେ ନିଜସ୍ବ ଭାବେ ନିର୍ଦ୍ଧାରଣ କରିବେ। ବାର୍ ଆସୋସିଏଶନ ଦ୍ୱାରା ଦିଆଯାଇଥିବା ମନିରିସିପ୍ଟକୁ ପ୍ରାର୍ଥୀମାନେ ପ୍ରାର୍ଥିପତ୍ର ଦାଖଲର ଫର୍ମ ସହ ସଂଲଗ୍ନ କରିବେ। ଆସନ୍ତା ୨୭ରେ ଯୋଗ୍ୟ ପ୍ରାର୍ଥୀଙ୍କ ତାଲିକା ପ୍ରକାଶ ପାଇବ ଓ ୨୮ ତାରିଖରେ ପ୍ରାର୍ଥିପତ୍ର ପ୍ରତ୍ୟାହାରର ଶେଷ ଦିବସ। ଡିସେମ୍ବର ୧୨ରେ ସିକ୍ରେଟ ବାଲଟ ଯୋଗେ ସକାଳ ୮ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ମତଦାନ ଜାରି ରହିବ। ଫଳାଫଳ ନିର୍ବାଚନ ଅଧିକାରୀମାନେ ଓଡ଼ିଶା ବାର୍ କାଉନ୍ସିଲର ସମ୍ପାଦକଙ୍କ ନିକଟକୁ ଡିସେମ୍ବର ୧୩ରେ ପଠାଇବା ପାଇଁ ନିର୍ଦ୍ଦେଶ ଦିଆଯାଇଛି। ସୂଚନାଯୋଗ୍ୟ, ଗତ ମାର୍ଚ୍ଚରେ ହେବାକୁ ଥିବା ନିର୍ବାଚନ କରୋନା ଯୋଗୁ ବନ୍ଦ ରହିଥିଲା।
