ନୂଆଦିଲ୍ଲୀ,୧୩।୧(ପି.ଟି.): ଭାରତର ବିଭିନ୍ନ ରାଜ୍ୟରେ ଭିନ୍ନ ଭିନ୍ନ ସମୟରେ ନିର୍ବାଚନ ଯୋଗୁ ବାରମ୍ବାର ଆଦର୍ଶ ଆଚରଣବିଧି ଲାଗୁ କରାଯାଉଛି, ଯେଉଁଥିପାଇଁ ବିକାଶମୂଳକ କାର୍ଯ୍ୟରେ ବାଧା ସୃଷ୍ଟି ହେବା ସହ ସ୍ବାଭାବିକ ଜୀବନଯାତ୍ରା ପ୍ରଭାବିତ ହେଉଛି। କେନ୍ଦ୍ର ସରକାର ଏକସଙ୍ଗେ ଲୋକ ସଭା ଏବଂ ସମସ୍ତ ରାଜ୍ୟର ବିଧାନସଭା ନିର୍ବାଚନ କରାଇବାକୁ ଉଦ୍ୟମ ଚଳାଇବାର ଏହା ଏକ ମୁଖ୍ୟ କାରଣ। ତେବେ ନିର୍ବାଚନରେ ସମସ୍ତଙ୍କୁ ସମାନ ସୁଯୋଗ ସୁନିଶ୍ଚିତ କରିବା ପାଇଁ ଆଚରଣ ବିଧି ଅତ୍ୟନ୍ତ ଜରୁରୀ ବୋଲି ନିର୍ବାଚନ କମିଶନ (ଇସି) କହିଛନ୍ତି।
ରାଷ୍ଟ୍ର, ଏକ ନିର୍ବାଚନ’ କାର୍ଯ୍ୟକାରୀ କରାଇବା ପାଇଁ ସରକାର ଆଣିଥିବା ବିଲ୍ ଅନୁଯାୟୀ, ବିଭିନ୍ନ କାରଣରୁ ଏକସଙ୍ଗେ ନିର୍ବାଚନ କରାଇବା ଅତ୍ୟନ୍ତ ଆବଶ୍ୟକ। ସେଥିରୁ ଅନ୍ୟତମ କାରଣ ହେଲା ଅତ୍ୟଧିକ ବ୍ୟୟ ଏବଂ ସମୟ ବରବାଦ। ଏକସଙ୍ଗେ ନିବାଚନ କାର୍ଯ୍ୟକାରୀ କରାଇବା ପାଇଁ ଅଣାଯାଇଥିବା ସମ୍ବିଧାନ ସଂଶୋଧନ ବିଲ୍ରେ କୁହାଯାଇଛି, ନିର୍ବାଚନ ହେଉଥିବା ରାଜ୍ୟଗୁଡ଼ିକରେ ମଡେଲ କୋଡ୍ ଅଫ୍ କଣ୍ଡକ୍ଟ ଲାଗୁ ହେଉଥିବାରୁ ସମ୍ପୂର୍ଣ୍ଣ ବିକାଶମୂଳକ କାର୍ଯ୍ୟକ୍ରମ ସ୍ଥଗିତ ରହିଯିବା ସହ ସାଧାରଣ ଜୀବନଯାତ୍ରା ବାଧାପ୍ରାପ୍ତ ହେଉଛି। ବାରମ୍ବାର ଆଚରଣ ବିଧି ଲାଗୁ ହେବା ଦ୍ୱାରା ସେବା କାର୍ଯ୍ୟ ମଧ୍ୟ ପ୍ରଭାବିତ ହେଉଛି ଏବଂ ମାନବ ସମ୍ବଳକୁ ମୁଖ୍ୟ କାର୍ଯ୍ୟଧାରାରୁ ନେଇ ଦୀର୍ଘଦିନ ପାଇଁ ନିର୍ବାଚନୀ କାର୍ଯ୍ୟରେ ନିୟୋଜିତ କରାଯାଉଛି। ଏକସଙ୍ଗେ ନିର୍ବାଚନ ସମ୍ପର୍କରେ ନ୍ୟାୟିକ କମିଶନ ୨୦୨୩ ମାର୍ଚ୍ଚରେ ପ୍ରଶ୍ନ କରିଥିଲେ। ଏହାର ଜବାବରେ ନିର୍ବାଚନ କମିଶନ କହିଥିଲେ, ଆଦର୍ଶ ଆଚରଣ ବିଧି ଲାଗୁ ନିର୍ବାଚନର ବାରମ୍ବାରତା ଉପରେ ନିର୍ଭର କରୁଛି। ନିର୍ବାଚନ ସହ ଜଡ଼ିତ ସମସ୍ତେ ଯେପରି ଆଚରଣ ବିଧିକୁ ସ୍ବେଚ୍ଛାକୃତ ଭାବେ ପାଳନ କରିବେ, ସେଥିପାଇଁ ଇସି ରାଜନୈତିକ ଦଳଗୁଡ଼ିକ ସହ ପରାମର୍ଶ କରିଥାନ୍ତି। ମୁକ୍ତ ଏବଂ ଅବାଧ ନିର୍ବାଚନ ପରିଚାଳନା ଏବଂ ବିଶ୍ୱସନୀୟ ଫଳାଫଳ ଲାଗି ଏହା ଅପରିହାର୍ଯ୍ୟ। ନ୍ୟାୟିକ କମିଶନଙ୍କୁ ଇସି ଦେଇଥିବା ମତାମତକୁ ଏକ ରାଷ୍ଟ୍ର, ଏକ ନିର୍ବାଚନ ବିଲ୍ର ଯାଞ୍ଚ କରୁଥିବା ଯୁଗ୍ମ ସଂସଦୀୟ କମିଟିର ସଦସ୍ୟମାନଙ୍କୁ ପ୍ରଦାନ କରାଯାଇଛି।
