ଭବାନୀପାଟଣା,୧୨ା୧(ଉତ୍ତମ କୁମାର ଦାଶ):କଳାହାଣ୍ଡି ଜିଲା ଭବାନୀପାଟଣା ବ୍ଲକ ଅନ୍ତର୍ଗତ ଋଷିଗାଁ ୨୬ ନମ୍ବର ଜାତୀୟ ରାଜପଥ କଡରେ ଥିବା ଜିଲାର ପ୍ରଥମ ଇକୋଲୋଜିକାଲ ପାର୍କ ରକ୍ଷଣାବେକ୍ଷଣ ଅଭାବରୁ ନିଶ୍ଚିହ୍ନ ହେବାକୁ ବସିଛି। ଜିଲା ପ୍ରଶାସନ ପକ୍ଷରୁ ୨୦୦୭-୦୮ ଆର୍ଥିକ ବର୍ଷରେ ଏହାକୁ ସ୍ଥାପନ କରାଯାଇଥିଲା। କୋଟିକୋଟି ଟଙ୍କା ବ୍ୟୟରେ ପ୍ରାୟ ୫ ଏକର ପରିବ୍ୟାପ୍ତ ଅଞ୍ଚଳକୁ ଉଦ୍ୟାନର ରୂପ ଦିଅଯାଇଥିଲା। ଏହାର ଚତୁଃପାର୍ଶରେ ସୁରକ୍ଷା ବାଡ଼, ପାର୍କରେ ପ୍ରାୟ ଶହେରୁ ଅଧିକ ବିଭିନ୍ନ ପ୍ରଜାତିର ଔଷଧୀୟ ଫୁଲ ଓ ଫଳଗଛ ରୋପଣ କରି ଆଡ଼ମ୍ବର ସହକାରେ ଉଦ୍ଘାଟନ କରାଯାଇଥିଲା। ସେହିପରି ୨୦୧୩ରେ ସେହି ସ୍ଥାନରେ ଶାନ୍ତି ବନ ସ୍ଥାପନ କରାଯାଇଥିଲା। ଜିଲାର ଲାଞ୍ଜିଗଡଠାରେ ଅବସ୍ଥାପିତ ବେଦାନ୍ତ ଆଲୁମିନା ପକ୍ଷରୁ ମଧ୍ୟ ଏହି ଇକୋଲାଜିକାଲ ପାର୍କର ନିର୍ମାଣ ପାଇଁ ସେ ସମୟରେ କୋଟିଏରୁ ଅଧିକ ଟଙ୍କାର ସହଯୋଗ କରାଯାଇଥିଲା। ଇତିମଧ୍ୟରେ ଦୀର୍ଘ ୧୨ ବର୍ଷ ଅତିକ୍ରାନ୍ତ ହୋଇଥିବାବେଳେ ଏବେ ଏହି ପାର୍କ ନିଶ୍ଚିହ୍ନ ପ୍ରାୟ। କେବଳ ସନ୍ତକ ଭାବେ ଶାନ୍ତି ବନ ଫଳକ ଓ ଭଙ୍ଗା ବାଡ଼ ରହିଯାଇଛି। କେବଳ ସେତିକି ନୁହଁ, ପରବର୍ତ୍ତୀ ସମୟରେ ପାର୍କ ପରିସରରେ କାର୍ଗିଲ ଶହୀଦଙ୍କ ଉଦ୍ଦେଶ୍ୟରେ ସ୍ଥାପନ କରାଯାଇଥିବା ଶହୀଦ ସ୍ତମ୍ଭ ଏବେ ଆବର୍ଜନାମୟ ଅବସ୍ଥାରେ ରହିଥିବା ଦେଖିବାକୁ ମିଳିଛି। ଏହା ଶହୀଦଙ୍କ ପ୍ରତି ଅସମ୍ମାନ କହିଲେ ଅତ୍ୟୁକ୍ତି ହେବ ନାହିଁ। ସ୍ଥାନୀୟ ଅଞ୍ଚଳବାସୀ ବାରମ୍ବାର ଇକୋଲୋଜିକାଲ ପାର୍କର ପୁନରୁଦ୍ଧାର ପାଇଁ ଦାବି କରିଆସୁଥିବାବେଳେ ପ୍ରଶାସନ କର୍ଣ୍ଣପାତ କରୁ ନ ଥିବା ଅଭିଯୋଗ ହେଉଛି। ଏହି ପାର୍କର ପୁନରୁଦ୍ଧାର ସହ ରକ୍ଷଣାବେକ୍ଷଣ ଓ ଶହୀଦ ସ୍ତମ୍ଭ ପ୍ରତି ପ୍ରଶାସନ ସମ୍ମାନ ପ୍ରଦର୍ଶନ କରିବାକୁ ବୁଦ୍ଧିଜୀବୀ ମହଲରେ ଦାବି ହେଉଛି।
