ନୂଆଦିଲ୍ଲୀ,୯।୯: କୋଲକାତାରେ ଜଣେ ଟ୍ରେନି ଡାକ୍ତରଙ୍କୁ ବଳାତ୍କାର ଓ ହତ୍ୟା ଘଟଣାରେ ସୋମବାର ସୁପ୍ରିମକୋର୍ଟରେ ଅନେକ ତଥ୍ୟ ସାମ୍ନାକୁ ଆସିଥିଲା ଏବଂ ଅଭିଯୋଗ ମଧ୍ୟ କରାଯାଇଥିଲା। ଜଣେ ଓକିଲ ଅଭିଯୋଗ କରିଛନ୍ତି ଯେ ଭାଜାଇନାଲ ସ୍ବାବକୁ ୪ ଡିଗ୍ରୀ ସେଲସିୟସରେ ରଖାଯାଇ ନାହିଁ। ଏହା ଉପରେ ସିବିଆଇ ପାଇଁ ହାଜର ହୋଇଥିବା ସଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଯେ ଏହି ପ୍ରକାର ଅପରାଧରେ ପ୍ରଥମ ୫ଘଣ୍ଟା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ସେହି ସମୟରେ ସଂଗୃହିତ ପ୍ରମାଣ ଗୁରୁତ୍ୱପୂର୍ଣ୍ଣ । କ୍ରାଇମ ସିନକୁ ସୁରକ୍ଷିତ ରଖିବାକୁ ପଡିବ। ଆମ ପାଇଁ ଚ୍ୟାଲେଞ୍ଜ ହେଉଛି ସିବିଆଇ ୫ଦିନ ପରେ ଏହି ମାମଲାରେ ପ୍ରବେଶ କରିଛି।
ଏସ.ଜି. ତୁଷାର ମେହେଟ୍ଟା ଆହୁରି କହିଛନ୍ତି ଯେ ଫୋରେନସିକ ରିପୋର୍ଟରେ ଦର୍ଶାଯାଇଛି ଯେ ପୀଡ଼ିତାଙ୍କ ଜିନ୍ସ ଏବଂ ଅନ୍ତବସ୍ତ୍ରକୁ କାଢି ଦିଆଯାଇଥିଲା। ଟ୍ରେନି ଡାକ୍ତର ଅର୍ଦ୍ଧ ନଗ୍ନ ଅବସ୍ଥାରେ ଥିଲେ। ତାଙ୍କ ଶରୀରରେ ଆଘାତ ଚିହ୍ନ ରହିଥିଲା। ଏହା ପରେ ମେହେଟ୍ଟା କହିଛନ୍ତି ଯେ ପଶ୍ଚିମବଙ୍ଗ ସରକାର ନମୁନା ପଠାଇଛନ୍ତି କିନ୍ତୁ ସିବିଆଇ ଏହି ନମୁନାଗୁଡ଼ିକୁ ପୁନଃ ପରୀକ୍ଷା ପାଇଁ ଏମ୍ସ ଲ୍ୟାବକୁ ପଠାଇବାକୁ ନିଷ୍ପତ୍ତି ନେଇଛି। କିଏ ନମୁନା ସଂଗ୍ରହ କରୁଛି ତାହା ଗୁରୁତ୍ୱପୂର୍ଣ୍ଣ ହୋଇଯାଏ।
ପ୍ରଧାନ ବିଚାରପତି ପ୍ରଶ୍ନ କରିଛନ୍ତି ଯେ କ୍ରାଇମବ୍ରାଞ୍ଚର ସମ୍ପୂର୍ଣ୍ଣ ସିସିଟିଭି ଫୁଟେଜ ସିବିଆଇକୁ ଦିଆଯାଇଛି କି? ସିସିଟିଭି ଫୁଟେଜରେ ଅଭିଯୁକ୍ତଙ୍କ ପ୍ରବେଶ ଏବଂ ପ୍ରସ୍ଥାନ ଦର୍ଶାଯାଇଛି। ପଶ୍ଚିମବଙ୍ଗ ସରକାରଙ୍କ ପକ୍ଷରୁ ହାଜର ହୋଇଥିବା ବରିଷ୍ଠ ଓକିଲ କପିଲ ସିବଲ କହିଛନ୍ତି ଯେ ଆମେ ଏହାକୁ ସିବିଆଇକୁ ହସ୍ତାନ୍ତର କରିଛୁ। ତୁଷାର ମେହେଟ୍ଟା ମଧ୍ୟ ଏଥିରେ ସହମତ ହୋଇଥିଲେ। ଏସଜି କହିଛନ୍ତି କିନ୍ତୁ ଆମକୁ ରିକନଷ୍ଟ୍ରକଶନ କରିବାକୁ ପଡିବ।
