ଝରିଗାଁ,୨୩ା୧୦(କିଶୋର ଚନ୍ଦ୍ର ମଣ୍ଡଳ): ନବରଙ୍ଗପୁର ଜିଲାା ଝରିଗାଁ ଥାନା ଅର୍ନ୍ତଗତ ଗୁରୁସିଙ୍ଗା ଜଙ୍ଗଲ ମଧ୍ୟରେ ରହିଥିବା ଶୁଷ୍କ ନାଳ ମଧ୍ୟରୁ ସ୍ଥାନୀୟ ପୋଲିସ ଏକ ଗଳିତ ମୃତହେଦ ଉଦ୍ଧାର କରିଛି। ଘଟଣାସ୍ଥଳରେ ପୋଲିସ ଏସ୍ଡିପିଓ ମଧୁସ୍ମିତା ମିଶ୍ର, ଥାନା ଏସ୍ଆଇ କେ. ଲକ୍ଷ୍ମୀନାରାୟଣ ଦୋରା, ଏଏସ୍ଆଇ କେଦାରନାଥ ରାଉତ ପ୍ରମୁଖ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛନ୍ତି।
ପ୍ରାପ୍ତ ଖବରରୁ ଜଣାପଡ଼ିଛି, ଝରିଗାଁ ନିବାସୀ ସୁବାସ ପାଣ୍ଡେଙ୍କ ପୁଅ କ୍ଷୀରଧର ପାଣ୍ଡେ (୧୫) କୌଣସି କାରଣରୁ ଚଳିତ ମାସ ୮ତାରିଖରୁ ଘରୁ ବାହାରି ଅନ୍ୟତ୍ର କୁଆଡ଼େ ଚାଲିଯାଇଥିଲେ। ଏନେଇ ଝରିଗାଁ ଥାନାରେ ଏକ ନିଖୋଜ ହୋଇଥିବା ନେଇ ବାପା ସୁବାସ ଅଭିଯୋଗ ଜଣାଇଥିଲେ। ଥାନା କେସ୍ ନମ୍ବର ୧୭୪/୨୦୨୪ରେ ଏକ ମାମଲା ରୁଜୁ କରାଯାଇଥିବା ନେଇ ତଦନ୍ତକାରୀ ଅଫିସର କେଦାରନାଥ ରାଉତ ପ୍ରକାଶ କରିଛନ୍ତି। ପରିବାର ଲୋକେ ଝରିଗାଁ ସମେତ ଆଖପାଖ ଗାଁ, ସମସ୍ତ ସମ୍ପର୍କୀୟ ଘରେ ଏବଂ ସାଙ୍ଗ ସାଥୀଙ୍କ ଘରେ ଖୋଜାଖୋଜି କରିଥିଲେ। କିନ୍ତୁ କ୍ଷୀରଧରଙ୍କ କୌଣସି ପତ୍ତା ମିଳି ନ ଥିଲା। ଗତ ମଙ୍ଗଳବାର ଗୁରୁସିଙ୍ଗା ପଞ୍ଚାୟତର କିଛି ମହିଳା ନିକଟସ୍ଥ ଜଙ୍ଗଲକୁ ଶୁଖିଲା କାଠ ସଂଗ୍ରହ କରିବା ପାଇଁ ଯାଇଥିଲେ। ସେଠାରେ କିଛି ଦୁର୍ଗନ୍ଧ ହେଉଥିବା ନେଇ ସନ୍ଧ୍ୟାରେ ସ୍ଥାନୀୟ ସରପଞ୍ଚଙ୍କୁ ଜଣାଇଥିଲେ। ଏହାପରେ ବୁଧବାର ଗୁରୁସିଙ୍ଗା ସରପଞ୍ଚ ମୋହନ ନାୟକ ଏବଂ ବଞ୍ଜିଆମ୍ବା ଗ୍ରାମରେ ରହୁଥିବା ହୋମଗାର୍ଡ ପତିରାମା ମାଝୀ ଘଟଣା ସ୍ଥଳେ ପହଞ୍ଚିଥିଲେ। ସେଠାରେ ଜଣକଙ୍କ ଗଳିତ ମୃତଦେହ ଏକ ଶୁଷ୍କ ନାଳ ମଧ୍ୟରେ ପଡ଼ିରହିଛି। ଏହାପରେ ପୋଲିସକୁ ଖବର ଦିଆଯାଇଥିଲା।
ସନ୍ଦେହ କରି ପୋଲିସ ଗଳିତ ମୃତଦେହକୁ ଚିହ୍ନଟ ପାଇଁ କ୍ଷୀରଧରଙ୍କ ପରିବାର ଲୋକଙ୍କୁ ଖବର ଦେଇଥିଲା। ଏହାପରେ କ୍ଷୀରଧରଙ୍କ ବଡ଼ ବାପା ଝରିଗାଁ ଥାନାରେ ହୋମଗାର୍ଡ ଭାବେ କାର୍ଯ୍ୟରତ ଦେବେନ୍ଦ୍ର ପାଣ୍ଡେ ଘଟଣାସ୍ଥଳରେ ପହଞ୍ଚି ପୁତୁରା ପିନ୍ଧିଥିବା ପ୍ୟାଣ୍ଟ ଟି-ଶର୍ଟ ଏବଂ ହାତରେ ପିନ୍ଧିଥିବା ପ୍ଲାଷ୍ଟିକ ରିଷ୍ଟ ବ୍ୟାଣ୍ଡକୁ ଦେଖି ସେ ନିଜ ପୁତୁରା କ୍ଷୀରଧର ବୋଲି ପୋଲିସକୁ ଚିହ୍ନଟ କରିଥିଲେ। ନିଖୋଜ ହେବାର ୧୬ ଦିନ ପରେ ପୁଅର ମୃତ୍ୟୁ ହୋଇଥିବା ଦେଖି ପରିବାର ତଥା ସମ୍ପର୍କୀୟଙ୍କ ମଧ୍ୟରେ ଏକ ଶୋକର ଛାୟା ଖେଳିଯାଇଛି।
କ୍ଷୀରଧରଙ୍କୁ କେହି ହତ୍ୟା କରିଥିବା ନେଇ ପରିବାର ଲୋକେ ସନ୍ଦେହ କରୁଥିବା ବେଳେ ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ପହଞ୍ଚି ତଦନ୍ତ ଚଳାଇଛନ୍ତି। କ୍ଷୀରଧର ଝରିଗାଁ ସରକାରୀ ନୋଡାଲ ଉଚ୍ଚ ବିଦ୍ୟାଳୟରେ ଦଶମ ଶ୍ରେଣୀ ଛାତ୍ର ଅଟନ୍ତି। ସେ ଜଣେ ବହୁତ ସରଳ ଶାନ୍ତଶିଷ୍ଟ ଛାତ୍ର ରହିଥିବା ବେଳେ, ତାଙ୍କର ମୃତ୍ୟୁ ଘଟଣାକୁ ନେଇ ବିଦ୍ୟାଳୟରେ ସମସ୍ତ ଛାତ୍ରୀଛାତ୍ର ତଥା ଶିକ୍ଷୟିତ୍ରୀ ଶିକ୍ଷକ ମହଲରେ ଶୋକ ପ୍ରକାଶ ପାଇଛି।
