ଉମରକୋଟ, ୨୦।୮(ସ୍ବ.ପ୍ର.): ସପ୍ତାହବ୍ୟାପୀ ଉମରକୋଟରେ ହୋଇଥିବା ଲଗାଣ ବର୍ଷାରେ ଖଡକାଡେମ ତଳେ ଥିବା ରାସ୍ତାରେ ନିର୍ମାଣ ହୋଇଥିବା କଲଭର୍ଟ ଧୋଇଯାଇଛି। ଫଳରେ ପୂଜାରିଗୁଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରୁଥିବା ମୂର୍ତମା, ବେହେଡା, ସୁକିଗାଁ ଓ କୋପନା ପଞ୍ଚାୟତ ଲୋକେ ନାନା ଅସୁବିଧାର ସମ୍ମୁଖୀନ ହେଉଛନ୍ତି।
୩ ବର୍ଷ ତଳେ ଏହି କଲଭର୍ଟ ନିର୍ମାଣ ହୋଇଥିଲା। ମୂର୍ତମା, ବେହେଡା, ସୁକିଗାଁ ଓ କୋପନା ପଞ୍ଚାୟତବାସୀ ପୂଜାରିଗୁଡ଼ା ଡାକ୍ତରଖାନା କିମ୍ବା ଅନ୍ୟ କୌଣସି ଗ୍ରାମକୁ ଯିବାକୁ ହେଲେ ଏହି କଲଭର୍ଟ ଉପରେ ନିର୍ଭର କରିଥାନ୍ତି। କିନ୍ତୁ ଭୀଷଣ ବର୍ଷା ଯୋଗୁ ସମ୍ପୂର୍ଣ୍ଣ ନଷ୍ଟ ହୋଇଯାଇଛି ଭାସ୍କେଲ ଡ୍ୟାମ ତଳେ ଥିବା ୪୦ ଫୁଟ ଲମ୍ବର ରାସ୍ତା ଓ କଲଭର୍ଟ। ଫଳରେ ଏହି ରାସ୍ତା ଦେଇ ଯିବା ଆସିବା ବନ୍ଦ ହୋଇଯାଇଛି। ବର୍ତ୍ତମାନ ଏହି ୪ପଞ୍ଚାୟତର ଲୋକେ ପୂଜାରିଗୁଡ଼ା ଡାକ୍ତରଖାନାକୁ ଆସିବା ପାଇଁ ଉମରକୋଟ ବା ବକୋଦା ଦେଇ ଯାଉଛନ୍ତି। ଯାହା କି ଲୋକଙ୍କୁ ଅଧିକ ୨୦ରୁ ୨୫ କିଲୋମିଟର ରାସ୍ତା ଅତିକ୍ରମ କରିବାକୁ ପଡୁଛି। ଫଳରେ ରୋଗୀ ଓ ସାଧାରଣ ଜନତା ନାନା ଅସୁବିଧାର ସମ୍ମୁଖୀନ ହେବା ସହ ଅଯଥା ଖର୍ଚ୍ଚାନ୍ତ ହେଉଛନ୍ତି। ସେଠାରେ କଲଭର୍ଟ ନ କରି ଓଭର ବ୍ରିଜ୍ ନିର୍ମାଣ କରିବା ପାଇଁ ମୂର୍ତମା, ବେହେଡା, ସୁକିଗାଁ, କୋପେନା ପଞ୍ଚାୟତବାସୀ ଦାବି କରୁଛନ୍ତି। ଏ ନେଇ ଭାସ୍କେଲ ଜଳସେଚନ କନିଷ୍ଠ ଯନ୍ତ୍ରୀ ଅମିୟ ଭୋଇଙ୍କୁ ପଚାରିବାରୁ ସେ କହିଛନ୍ତି, ଏ ବିଷୟରେ ଜିଲାପାଳଙ୍କୁ ଅବଗତ କରାଯାଇଛି। ବର୍ତ୍ତମାନ ବର୍ଷା କମିଲେ କାମଚଳା ରାସ୍ତା ତିଆରି କରାଯିବ। ଆଗାମୀ ଦିନରେ ସମସ୍ୟାର ସ୍ଥାୟୀ ସମାଧାନ ପାଇଁ କ’ଣ ନିର୍ମାଣ ହେବ ତାହା ଆଲୋଚନା ପରେ ସ୍ପଷ୍ଟ ହେବ। ତଦନୁଯାୟୀ ପଦକ୍ଷେପ ନିଆଯିବ ବୋଲି ସେ କହିଛନ୍ତି।
