ଭୁବନେଶ୍ୱର,୨୬।୧(ବ୍ୟୁରୋ): ବରମୁଣ୍ଡା ପଡ଼ିଆରେ ଆୟୋଜିତ ଶିଶିର ସରସ ମେଳାରେ ଦିନକୁ ଦିନ ଗ୍ରାହକଙ୍କ ଭିଡ଼ ବଢ଼ୁଛି। ଦିନ ୧୧ରୁ ରାତି ୯ଯାଏଁ ରାଜଧାନୀବାସୀ ଏଠାରେ ରାଜ୍ୟ ତଥା ରାଜ୍ୟ ବାହାରର ଖାଦ୍ୟର ମଜା ନେବା ସହ ବିଭିନ୍ନ ଘର ସଜାଇବା ସାମଗ୍ରୀ ସହ ଉପକରଣ କିଣୁଛନ୍ତି। ପଞ୍ଚାୟତିରାଜ ବିଭାଗ ଏବଂ ଓରମାସ୍ ପକ୍ଷରୁ ଆୟୋଜିତ ମେଳାରେ ପ୍ରତି ସନ୍ଧ୍ୟାରେ ଆୟୋଜିତ ହେଉଛି ସାଂସ୍କୃତିକ କାର୍ଯ୍ୟକ୍ରମ। ଦର୍ଶକ ଏହାର ଭରପୂର ମଜା ନେଉଛନ୍ତି । ସେହିପରି ସେଲ୍ଫି ଜୋନରେ ଲୋକଙ୍କ ଗହଳି ଦେଖିବାକୁ ମିଳୁଛି।
ଚାହିଦାରେ ଡାଲ ବାଟି ଚୁର୍ମା
ରାଜ୍ୟ ତଥା ରାଜ୍ୟ ବାହାରୁ ପଡ଼ିଥିବା ୨୮ଟି ଷ୍ଟଲର ବିଭିନ୍ନ ଖାଦ୍ୟର ସ୍ବାଦ ଚାଖିବା ପାଇଁ ଲୋକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳୁଛି। ବିଶେଷକରି ରାଜସ୍ଥାନର ଷ୍ଟଲରେ ଅପେକ୍ଷାକୃତ ଅଧିକ ଭିଡ଼ ଜମୁଛି। ଲୋକେ ଆଳୁ ଟିକ୍କି, ବିକାନିର ଜିଲାପି, ରାବି ଘେୱର, ମୁଗ ହାଲୁଆ, ଡାଲ ବାଟି ଚୁର୍ମା ଆଦିର ବେଶ ଚାହିଦା ରହିଛି। ଆପ୍ନୋ ରାଜସ୍ଥାନ ଷ୍ଟଲର ବ୍ୟବସାୟୀ ରାଜସ୍ଥାନର ପାରମ୍ପରିକ ବେଶ ପୋଷାକରେ ଖାଦ୍ୟ ପରଷୁଛନ୍ତି। ପ୍ରତିଥର ପରି ଏଥର ମଧ୍ୟ ଆଳୁ ଟିକ୍କି ଓ ଘେୱର ଖାଇବାକୁ ଲୋକଙ୍କ ଅଧିକ ଆଗ୍ରହ ରହିଛି। ୨ଟି ଆଳୁ ଟିକ୍କିର ଦାମ ୧୦୦ ଟଙ୍କା ଥିବା ବେଳେ ଘେୱର ଖଣ୍ଡ ପ୍ରତି ୧୦୦ ଟଙ୍କା, କଚୁ ଗୋଟିକୁ ୫୦ ଟଙ୍କା ଓ ମୁଗ ଡାଲି ୧୫୦ ଗ୍ରାମକୁ ୫୦ ଟଙ୍କା, ଚୁର୍ମା ଦାମ ଗୋଟିକୁ ୪୦ ଟଙ୍କା ରହିଛି। ତେବେ ଏହି ଫୁଡ୍ କୋର୍ଟରେ ସ୍ମୋକ ବିସ୍କୁଟ, ମିଲେଟ ଚା’, ଚକୋଲେଟ ସିଙ୍ଗ, ଚିକେନ ଟିକ୍କାକୁ ମଧ୍ୟ ଗ୍ରାହକ ବେଶ୍ ପସନ୍ଦ କରୁଛନ୍ତି।
ହକି ପାଭିଲିୟନରେ ପିଲାଙ୍କ ଫଟୋ ଉଠା
ସନ୍ଧ୍ୟାରେ ଆୟୋଜିତ ହେଉଥିବା ସାଂସ୍କୃତିକ କାର୍ଯ୍ୟକ୍ରମ ଦେଖିବା ସହ ମନ ପସନ୍ଦର ଖାଦ୍ୟ ଖାଇ ମେଳା ବୁଲିବାକୁ କୁନିକୁନି ପିଲାମାନେ ଆଗ୍ରହ ପ୍ରକାଶ କରୁଛନ୍ତି। ସେଲଫି ଜୋନ୍ ଓ ହକି ପାଭିଲିୟନ ପିଲାଙ୍କୁ ଅଧିକ ଆକୃଷ୍ଟ କରୁଛି। ହକି ଷ୍ଟିକ୍ ହାତରେ ଧରି ବଲ୍ ଗଡ଼ାଇବା ପାଇଁ ପିଲାମାନେ ଦୌଡ଼ି ଯାଉଛନ୍ତି। କେବଳ ପିଲା ନୁହନ୍ତି, ବଡ଼ମାନେ ମଧ୍ୟ ହକି ପାଭିଲିୟନରେ ଫଟୋ ଉଠାଉଥିବା ଦେଖିବାକୁ ମିଳୁଛି।
ଆକର୍ଷଣ ସାଜୁଛି ଡୋକ୍ରା କାଷ୍ଟିଂ
୨୪ଟି ରାଜ୍ୟ ଓ ଓଡ଼ିଶାର ୩୦ ଜିଲାର ସବୁବର୍ଗର ବ୍ୟବସାୟୀ ଅଂଶଗ୍ରହଣ କରିଥିବା ବେଳେ ଓଡ଼ିଶା ସରକାରଙ୍କ ମିଶନ ଶକ୍ତି, ଏସ୍ଏଚ୍ଜି ସମେତ ଅନେକ ସରକାରୀ ଉଦ୍ୟୋଗ ଓ ପ୍ରତିଷ୍ଠାନ ଏବଂ ବିଭାଗ ମଧ୍ୟ ସାମିଲ ହୋଇଛନ୍ତି। ବିଶେଷ କରି ଡୋକ୍ରା କାଷ୍ଟିଂ ଷ୍ଟଲରେ ଗ୍ରାହକଙ୍କ ଗହଳି ରହୁଛି। ବିଭିନ୍ନ ଜୀବଜନ୍ତୁ, ଗଛଲତା, ଉପକରଣକୁ ନିଖୁଣ ଭାବେ ପ୍ରସ୍ତୁତ କରାଯାଉଥିବା ବେଳେ ଘର ସଜାଇବାରେ ଏହାକୁ ଆଜିକାଲି ଲୋକ ଅଧିକ ମାତ୍ରାରେ ବ୍ୟବହାର କରୁଛନ୍ତି। ରାଜଧାନୀରେ ବିଭିନ୍ନ ସମୟରେ ଲାଗୁଥିବା ମେଳାରେ ମହିଳା ବ୍ୟବସାୟୀମାନେ ଏହି ଷ୍ଟଲ ଲଗାଉଥିବା ବେଳେ ଶିଶିର ସରସ ମେଳାରେ ଅପେକ୍ଷାକୃତ ଅଧିକ ଲାଭବାନ ହେଇପାରିଥିବା ଢେଙ୍କାନାଳର ମା’ ତୁଳସୀ ସ୍ବୟଂ ସହାୟକ ଗୋଷ୍ଠୀର ବ୍ୟବସାୟୀ କହିଛନ୍ତି।
