ଭୋପାଳ,୧୬।୫: ମଧ୍ୟପ୍ରଦେଶରେ ଭାଜପା ମନ୍ତ୍ରୀ ବିଜୟ ଶାହଙ୍କ ବିବାଦୀୟ ବୟାନ ଥମି ନଥିଲା ବେଳେ ଆଉ ଏକ ବୟାନ ଚର୍ଚ୍ଚାକୁ ଆସିଛି। ମଧ୍ୟପ୍ରଦେଶ ଉପମୁଖ୍ୟମନ୍ତ୍ରୀ ଜଗଦୀଶ ଦେବଡା ପୁଣି ଥରେ ନିଜ ବୟାନକୁ ନେଇ ବିବାଦରେ ପଡ଼ିଛନ୍ତି। ଜବଲପୁରରେ ଆୟୋଜିତ ନାଗରିକ ପ୍ରତିରକ୍ଷା ସ୍ବେଚ୍ଛାସେବକଙ୍କ ଏକ ତାଲିମ କାର୍ଯ୍ୟକ୍ରମରେ, ଉପମୁଖ୍ୟମନ୍ତ୍ରୀ ଏମିତି ଏକ ବୟାନ ଦେଇଛନ୍ତି, ଯାହାକୁ ନେଇ ରାଜନୈତିକ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି।
ଏକ କାର୍ଯ୍ୟକ୍ରମରେ ଉଦବୋଧନ ଦେଇ ଦେବଡା କହିଥିଲେ, ଆଜି ସମଗ୍ର ଦେଶ, ଦେଶର ସେନା ଏବଂ ଆମର ସୈନିକମାନେ ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଦ ତଳେ ପ୍ରଣାମ କରିଛନ୍ତି। ପ୍ରଧାନମନ୍ତ୍ରୀ ମୋଦିଙ୍କ ପହଲଗାମ ଆକ୍ରମଣର ପ୍ରତିଶୋଧ ନେବାର ଉପାୟ ପ୍ରଶଂସନୀୟ। ଦେବଡ଼ାଙ୍କ ଏହି ବୟାନରେ, ସଭାସ୍ଥଳରେ ଉପସ୍ଥିତ ଲୋକମାନେ ପ୍ରଧାନମନ୍ତ୍ରୀ ମୋଦିଙ୍କ ପାଇଁ ତାଳି ମଧ୍ୟ ମାରିଥିଲେ।
ଉପମୁଖ୍ୟମନ୍ତ୍ରୀ କହିଛନ୍ତି, ପ୍ରଧାନମନ୍ତ୍ରୀ ମୋଦିଙ୍କ ନୀତି ଏବଂ ନିଷ୍ପତ୍ତି ଯୋଗୁ ଦେଶର ସୁରକ୍ଷା ବ୍ୟବସ୍ଥା ଅଧିକ ମଜଭୁତ ହୋଇଛି। ଦେଶର ସୀମା ପୂର୍ବ ଅପେକ୍ଷା ଅଧିକ ସୁରକ୍ଷିତ, ଏବଂ ଏହାର ସମସ୍ତ ଶ୍ରେୟ ପ୍ରଧାନମନ୍ତ୍ରୀ ମୋଦିଙ୍କୁ ଯାଏ।
ବିରୋଧୀ ଦଳଗୁଡ଼ିକ ଏହାକୁ କଡ଼ା ବିରୋଧ କରିଛନ୍ତି ଏବଂ କହିଛନ୍ତି ଯେ, ସେନାକୁ ରାଜନୀତିରେ ଟାଣିବା ଭୁଲ ଏବଂ ଏହି ବକ୍ତବ୍ୟ ସେନାର ମର୍ଯ୍ୟାଦା ପ୍ରତି ଅପମାନ। କଂଗ୍ରେସ ମୁଖପାତ୍ରମାନେ ଦେବଡାଙ୍କଠାରୁ କ୍ଷମା ମାଗିବା ଦାବି କରିଛନ୍ତି ଏବଂ କହିଛନ୍ତି ଯେ, ସେନା ଦେଶର ସମ୍ବିଧାନ ଏବଂ ଗଣତନ୍ତ୍ରକୁ ସୁରକ୍ଷା ଦିଏ ଏବଂ କୌଣସି ନିର୍ଦ୍ଦିଷ୍ଟ ବ୍ୟକ୍ତିଙ୍କ ନିକଟରେ ମୁଣ୍ଡ ନୁଆଁଏ ନାହିଁ।
