ବମ୍ବେ: ଜାତୀୟ ଚ୍ୟାନେଲ୍ରେ ପ୍ରସାରିତ ହେବ ଓଡ଼ିଶାର ବୀରତ୍ୱର କାହାଣୀ। ପାଇକଙ୍କ ବିଦ୍ରୋହ, ବୀରତ୍ୱ, ତ୍ୟାଗ, ସଂଘର୍ଷର କାହାଣୀକୁ ନେଇ ପ୍ରସାରିତ ହେବ ନୂଆ ଧାରାବାହିକ ‘ବିଦ୍ରୋହୀ’। ଷ୍ଟାରପ୍ଲସ ସହ ଡିଜ୍ନୀ ଓ ହଟ୍ଷ୍ଟାର୍ରେ ଏହି ଧାରାବାହିକ ଦେଖିବାକୁ ମିଳିବ। ବ୍ରିଟିଶ ସରକାର ବିରୋଧରେ ଋଣହୁଙ୍କାର ଦେଇଥିବା ପାଇକ ବିଦ୍ରୋହର କାହାଣୀ ଏବେ ଘରେ ଘରେ ପହଞ୍ଚିବ।
ନିକଟରେ ଗାଥା ପ୍ରଡକ୍ସନ ପକ୍ଷରୁ ‘ବିଦ୍ରୋହୀ’ ଧାରାବାହିକର ପ୍ରମୋ ରିଲିଜ କରାଯାଇଛି। ଏଥିରେ ବକ୍ସି ଜଗବନ୍ଧୁଙ୍କ ଚରିତ୍ରରେ ନଜର ଆସିଛନ୍ତି ଶରଦ ମାଲହୋତ୍ରା। ତାଙ୍କ ଛଡ଼ା ସୁଲଗ୍ନା ପାଣିଗ୍ରାହୀ, ହେମାଲ୍ ଇଙ୍ଗଲ୍, ସୌରଭ ଗୋଖଲେ, ନିଖିଲ୍ ଦାମଲେ, ପ୍ରିୟା ଟଣ୍ଡନ୍, ଡାନି ସୁର ଆଦି ପ୍ରମୁଖ ଭୂମିକାରେ ଦେଖିବାକୁ ମିଳିବେ। ରିଲିଜ ହୋଇଥିବା ପ୍ରମୋରେ ଶରଦ ପାଇକ ପୋଷାକ ସହ ମୁଣ୍ଡରେ ନାଲି ଟିକା ଓ ଲମ୍ବା କେଶରେ ନଜର ଆସିଛନ୍ତି।
୧୮୧୭ ମସିହାର ପାଇକ ବିଦ୍ରୋହ ପ୍ରଥମେ ଘୁମୁସର ଅଞ୍ଚଲରୁ ଆରମ୍ଭ ହୋଇଥିଲା। ଏହି ବିଦ୍ରୋହରେ ପାଇକଙ୍କ ସହ ବହୁ ଜମିଦାର,ଆଦିବାସୀ ଓ କୃଷକ ଆଦି ସାମିଲ ଥିଲେ। ବକ୍ସି ଜଗବନ୍ଧୁ ଥିଲେ ରୋଢ଼ାଙ୍ଗର ଜମିଦାର। ଖୋର୍ଦ୍ଧା ରାଜା ତାଙ୍କୁ ସେନାପତି ଭାବେ ନିଯୁକ୍ତ କରିଥିଲେ। ୧୮୪୭ରେ ଖୋର୍ଦ୍ଧାରେ ହୋଇଥିବା ବିପ୍ଳବର ସେ ମୁଖ୍ୟ ପୁରୋଧା ଥିଲେ। ଯୁଦ୍ଧ ଡାକରା, ବିଦ୍ରୋହ, ମାତୃଭୂମି ପ୍ରତି ଥିବା ଭଲପାଇବା , ଦେଶପ୍ରୀତିର ଝଲକ ଆଦି ଏହି ଧାରାବାହିକରେ ଦେଖିବାକୁ ମିଳିବ।
