କଟକ ଅଫିସ,୨୮।୪: ଜଣେ ମହିଳା କରୋନା ରୋଗୀଙ୍କ ଏଭଳି ଚିତ୍କାର ମୁଁ ମରିଯିବି, ଫାଶୀ ଦେଇଦେବି, ହେଲେ କୋଭିଡ ସେଣ୍ଟରକୁ ଯିବିନି। କୋଭିଡ ସେଣ୍ଟର ଭିତରକୁ ନ ଯିବାକୁ ପ୍ରାଣପଣେ ଉଦ୍ୟମ କରିଥିବା ଏହି ମହିଳା କରୋନା ରୋଗୀ ଜଣକ ଶେଷରେ ମଉକା ଦେଖି ଚମ୍ପଟ ମାରିଲେ। ଏଭଳି ଅଭାବନୀୟ ଘଟଣା ଘଟିଛି କଟକ ବାଲିକୁଦା ଅଞ୍ଚଳରେ ।
ସମ୍ପୃକ୍ତ ମହିଳାଙ୍କୁ କୋଭିଡ ସେଣ୍ଟରର କେତେକ କର୍ମଚାରୀ କାବୁ କରିବାକୁ ଚେଷ୍ଟା କଲା ବେଳେ ସେ ଜଣଙ୍କୁ କାମୁଡ଼ି ମଧ୍ୟ ଦେଇଥିଲେ। ତେଣୁ ହାତଗୋଡ଼ ବାନ୍ଧି ତାଙ୍କୁ ସେଣ୍ଟରରେ ରଖାଯାଇଛି।
ସୂଚନାଯୋଗ୍ୟ, ଗତ ଦୁଇଦିନ ତଳେ ଜିଲା ପ୍ରଶାସନ ପକ୍ଷରୁ ବାଲିକୁଦାଠାରେ ନୂତନ କୋଭିଡ କେୟାର ସେଣ୍ଟର ଖୋଲା ଯାଇଥିଲା। ମଙ୍ଗଳବାର ମହିଳାଜଣଙ୍କ କରୋନା ପଜିଟିଭ୍ ଚିହ୍ନଟ ହେବା ପରେ ତାଙ୍କୁ ସେଠାକୁ ଚିକିତ୍ସା ପାଇଁ ଅଣାଯାଇଥିଲା । ତେବେ ଅଚାନକ ଗତକାଲି ରାତିରେ ସେ ସୁରକ୍ଷାକର୍ମୀଙ୍କୁ ଚକମା ଦେଇ ସେଠୁ ଖସି ପଳାଇଥିଲେ। ପରେ ସୁରକ୍ଷାକର୍ମୀ ତାଙ୍କୁ ଖୋଜାଖୋଜି ଆରମ୍ଭ କରିଥିଲେ। ବାଲିକୁଦା ରାସ୍ତାରେ ତାଙ୍କୁ ଧରିବାକୁ ଚେଷ୍ଟା କରାଯାଇଥିଲା। ଏହି ସମୟରେ ସେ କର୍ମଚାରୀଙ୍କୁ କାମୁଡ଼ିବାକୁ ପଛାଇ ନ ଥିଲେ। ପରେ ହାତଗୋଡ଼ ବାନ୍ଧି ତାଙ୍କୁ କୋଭିଡ ସେଣ୍ଟରକୁ ନିଆଯାଇଛି ।
