ଉମରକୋଟ,୩।୭(ସନ୍ତୋଷ ଶତପଥି): ଏକ ନାମୀଦାମୀ ମକା କମ୍ପାନୀର ବିହନ ଲଗାଇ ନବରଙ୍ଗପୁର ଜିଲା ଉମରକୋଟ ବ୍ଲକ ଅଞ୍ଚଳର ଶତାଧିକ ଚାଷୀ ବ୍ୟାପକ କ୍ଷତିଗ୍ରସ୍ତ ହୋଇଛନ୍ତି। ମିଳିଥିବା ସୂଚନା ଅନୁସାରେ, ମୌସୁମୀର ଆଗମନ ଖବର ଶୁଣିବା ମାତ୍ରେ ଉମରକୋଟ ବ୍ଲକ ଅନ୍ତର୍ଗତ ତୋହରା, କୁର୍ସୀ, ମାଲପାରା, ଭାଲୁଡଙ୍ଗରି ତଥା ଉମରକୋଟ ଏବଂ ଝରିଗାଁ ଅଞ୍ଚଳର ମକା ଚାଷୀମାନେ ଅନ୍ତରାଷ୍ଟ୍ରୀୟ ଆଡଭାଣ୍ଟା କମ୍ପାନୀର ମକା ବିହନ ଲଗାଇଥିଲେ। ବିହନ ଲଗାଇବାର ୪ ଦିନ ପରେ ଗଜା ଉଠିଯିବା କଥା, ହେଲେ ୮ ଦିନ ପରେ ବି ଗଜା ନ ବାହାରିବାରୁ ଚାଷୀମାନେ ଯେଉଁ ବ୍ୟବସାୟୀଙ୍କଠାରୁ ବିହନ କିଣି ଆଣିଥିଲେ ତାଙ୍କ ନିକଟରେ ଅଭିଯୋଗ କରିଥିଲେ। ବ୍ୟବସାୟୀମାନେ ମଧ୍ୟ ତୁରନ୍ତ କମ୍ପାନୀର ଅଧିକାରୀଙ୍କୁ ଜଣାଇଥିଲେ। ଖବରପାଇ ହାଇଦ୍ରାବାଦର ଏହି କମ୍ପାନୀ ପ୍ରାୟ ୧୦ ଜଣ ଅଧିକାରୀଙ୍କୁ ଉମରକୋଟ ପଠାଇ ସର୍ଭେ କାମ ଜାରି ରଖିଛି । ଏହି ଅଞ୍ଚଳର ବହୁ ଚାଷୀଙ୍କର ମୁଖ୍ୟ ଚାଷ ମକା ହୋଇଥିବାରୁ ଏବେ ବିହନରୁ ଗଜା ନ ହେବାରୁ ଚାଷୀ ମୁଣ୍ଡରେ ହାତ ଦେଇ ବସିଛନ୍ତି। କମ୍ପାନୀର କର୍ମଚାରୀମାନେ କ୍ଷତିଗ୍ରସ୍ତ ଚାଷୀଙ୍କ ମୋବାଇଲ ନମ୍ବର ନେଇ ୨ ଦିନ ଭିତରେ ବିହନ ଦିଆଯିବ ବୋଲି ପ୍ରତିଶ୍ରୁତି ଦେଇଥିଲେ ହେଁ ବର୍ତ୍ତମାନ ପର୍ଯ୍ୟନ୍ତ ଚାଷୀ ବିହନ ପାଇ ନ ଥିବା ଅଭିଯୋଗ ହୋଇଛି। ଅପରପକ୍ଷେ ଚାଷୀ ବିହନ ନ ପାଇବାରୁ ଅନ୍ୟ କମ୍ପାନୀର ବିହନ କିଣି ଲଗାଇବା ଆରମ୍ଭ କରିଦେଇଛନ୍ତି। ଅପର ପକ୍ଷରେ
ତେବେ ଆଡଭାଣ୍ଟା ବିହନ କମ୍ପାନୀର ଏଜେଣ୍ଟ ଓ ସେଲ୍ସ ମ୍ୟାନେଜର ବିଭିନ୍ନ ଗ୍ରାମକୁ ଯାଇ ଚାଷୀଙ୍କ ସମସ୍ୟା ବୁଝି ତାଙ୍କୁ ବିହନ ଟଙ୍କା ଫେରସ୍ତ କରିଥିବା ଉମରକୋଟଠାରେ ଥିବା ଉକ୍ତ କମ୍ପାନୀର ଡିଷ୍ଟ୍ରିବ୍ୟୁଟର ଓ ରିଟେଲର ସୂଚନା ଦେଇଛନ୍ତି । ଏଥିସହ କ୍ଷତିଗ୍ରସ୍ତ ଚାଷୀ ବିହନ ପ୍ୟାକେଟ ଦେଖାଇବା ମାତ୍ରେ ନୁଆ ବିହନ ପ୍ୟାକେଟ ଦେବା ପାଇଁ ସମସ୍ତ ଖୁଚୁରା ବିକ୍ରେତାଙ୍କୁ ନିର୍ଦ୍ଦେଶ ଦିଆଯାଇଛି। ସେହିପରି କ୍ଷତିଗ୍ରସ୍ତ ଚାଷୀଙ୍କୁ ଅନ୍ୟାନ୍ୟ ଖର୍ଚ୍ଚ ବାବଦକୁ କ୍ଷତିପୂରଣ ପ୍ରଦାନ ପାଇଁ ଚାଷୀ ଦାବି କରିଛନ୍ତି। ଏ ସମ୍ପର୍କରେ ସହକାରୀ କୃଷି ଅଧିକାରୀ ନୀଳକଣ୍ଠ ପରିଡାଙ୍କୁ ପଚାରିବାରୁ ସେ କହିଛନ୍ତି ଯେ, ବର୍ତ୍ତମାନ ପର୍ଯ୍ୟନ୍ତ କୌଣସି ଚାଷୀ ଲିଖିତ ଆକାରରେ ଅଭିଯୋଗ କରିନାହାଁନ୍ତି । ଚାଷୀ ଅଭିଯୋଗ କଲେ କାର୍ଯ୍ୟାନୁଷ୍ଠାନ ପାଇଁ ପଦକ୍ଷେପ ନିଆଯିବ ବୋଲି ସେ ସୂଚନା ଦେଇଛନ୍ତି।
