କଲ୍ୟାଣସିଂହପୁର,୨୫ା୮(ଦୀପକ କୁମାର ପରିଡ଼ା): ଗ୍ରାମାଞ୍ଚଳର ବିକାଶ ପାଇଁ ସରକାରଙ୍କ ଅନେକ ଯୋଜନା କାର୍ଯ୍ୟକାରୀ କରୁଛନ୍ତି। ଏଥି ନିମନ୍ତେ ଖର୍ଚ୍ଚ ହେଉଛି କୋଟି କୋଟି ଟଙ୍କା। ମାତ୍ର ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ପାର୍ସାଲି ପଞ୍ଚାୟତର ଦୁର୍ଗମ ନୀୟମଗିରି ଅଞ୍ଚଳର ଦୃଶ୍ୟ ଦେଖିଲେ ଯୋଜନା ଲୋକଙ୍କ କାମରେ ଲାଗୁନି ବୋଲି ସହଜରେ ଅନୁମେୟ।
ସାନ ଡେଙ୍ଗନେଲି ଛକଠାରୁ ବଡ଼ ଡେଙ୍ଗନେଲି ଛକ ପର୍ଯ୍ୟନ୍ତ ଦୁଇ କିଲୋମିଟର କାଦୁଅ ପଚପଚ ରାସ୍ତା ପାଦରେ ଚାଲିବା କଷ୍ଟକର। ପ୍ରତ୍ୟେକ ଦିନ ଯାତାୟାତରେ କିଛି ନା କିଛି ଅଘଟଣ ଘଟିବା ନଜରରେ ଆସିଥାଏ। ଗ୍ରୀଷ୍ମ ଋତୁରେ ଚଳିଯାଉଥିବାବେଳେ ବର୍ଷାରେ ସ୍ଥିତି ଦୟନୀୟ। ଏ ରାସ୍ତା ନୁହେଁ ତ ସତେ ମରଣଯନ୍ତା। ସାଧାରଣତଃ ଅଞ୍ଚଳର ଲୋକଙ୍କୁ ପଞ୍ଚାୟତକୁ ରାଶନ ଚାଉଳ ହେଉ କିମ୍ବା ଭତ୍ତା ପଇସା ଆଣିବାକୁ ହେଲେ ଏହି ରାସ୍ତା ଉପରେ ନିର୍ଭର କରିବାକୁ ପଡ଼ିଥାଏ। ଦୁର୍ଭାଗ୍ୟବଶତଃ କାହାର ଦେହ ଖରାପ ହେଇଯାଏ ତାକୁ ଖଟିଆ ଭରସା। ଏହି ରାସ୍ତା ଉପରେ ନିର୍ଭର କରନ୍ତି ନିୟମଗିରି ଅଞ୍ଚଳର ଲାଖପଦର, ପଟାଙ୍ଗ ପଦର, ଡଙ୍ଗା ମାଟି, ଲାମ୍ବା, ଗୁମା, କୋଡ଼ଙ୍ଗେଏଉ, ସାରିଝୋଲା , ବଡ଼ଡେଙ୍ଗନେଲି ଲୋକେ। ଲାଇଫ୍ଲାଇନ୍ ପାଲଟି ଥିବା ଏହି ରାସ୍ତା ସୁରକ୍ଷିତ ନ ଥିବାରୁ ନାହିଁ ନ ଥିବା ଅସୁବିଧାର ସମୁଖୀନ ହୋଉଛନ୍ତି ନିୟମଗିରି ଅଞ୍ଚଳର ଡଙ୍ଗରିଆ। ଯଦି ଏହି ରାସ୍ତା ମରାମତି ନ ହୁଏ ଆଗାମୀ ଦିନରେ ବ୍ଲକରେ ଧାରଣାରେ ବସିବୁ କହିଛନ୍ତି ନୀୟମଗିରି ଅଞ୍ଚଳବାସୀ।
