ପାରଳାଖେମୁଣ୍ଡି,୧୨ା୫(ଡି.ଏନ୍.ଏ.): ଆଶା ଓ ଅଙ୍ଗନଓ୍ବାଡି କର୍ମୀଙ୍କ ବେପରୁଆ ମନୋଭାବ ଯୋଗୁ ମୃତ୍ୟୁ ସହ ଲଢୁଛି ୧୧ ମାସର ଶିଶୁ। ପ୍ରାୟ ବର୍ଷେ ତଳର ଅବୈଧ ଔଷଧ ଖୁଆଇ ଦେବାରୁ ଶିଶୁପୁତ୍ରର ଅବସ୍ଥା ସଙ୍କଟାପନ୍ନ ହୋଇଥିବା ଅଭିଯୋଗ ହୋଇଛି। ଏଭଳି ଅଭାବନୀୟ ଘଟଣା ଘଟିଛି ଗଜପତି ଜିଲା ପାରଳା ସହର ଉପକଣ୍ଠସ୍ଥ ଯାଜପୁର ଗ୍ରାମରେ। ଯାଜପୁର ଗ୍ରାମର ଆଶା କର୍ମୀ (୪୫) ଅଙ୍ଗନଓ୍ବାଡି କର୍ମୀ ସୁମିତା ସ୍ବାଇଁଙ୍କ ୧୧ ମାସର ଶିଶୁପୁତ୍ରଙ୍କୁ ଗତ ଏପ୍ରିଲ ୭ ତାରିଖରେ ଭିଟାମିନ୍ ଔଷଧ ଖୁଆଇଥିଲେ। ଏହାପରେ ଶିଶୁପୁତ୍ରକୁ ସୁମିତା ଘରକୁ ନେଇଯାଇଥିଲେ। ଘରେ ପହଞ୍ଚିବା ପରେ ଶିଶୁକୁ ଝାଡ଼ାବାନ୍ତି ହୋଇଥିଲା। ଏ ନେଇ ସୁମିତା ଆଶାକର୍ମୀଙ୍କୁ ଜଣାଇଥିଲେ। ଏହି ସମୟରେ ଔଷଧ ବାକ୍ସଟିକୁ ନେଇ ଆଶାକର୍ମୀ ପୋଡ଼ିଦେଇଥିଲେ । ଏଥିରୁ କିଛି ବୋତଲକୁ ଦେଖିବା ବେଳେ ସେଥିରେ ବୈଧ ତାରିଖ ପ୍ରାୟ ୧ବର୍ଷ ୪ମାସ ହେଲା ସମ୍ପୂର୍ଣ୍ଣ ହୋଇଯାଇଥିବା ଜଣାପଡ଼ିଥିଲା। ଆଶା ଓ ଅଙ୍ଗନଓ୍ବାଡି କର୍ମୀଙ୍କ ଦାୟିତ୍ୱହୀନତା ଯୋଗୁ ଶିଶୁର ସ୍ବାସ୍ଥ୍ୟାବସ୍ଥା ଗୁରୁତର ରହିଥିବାରୁ ପ୍ରଥମେ ପାରଳାଖେମୁଣ୍ଡିସ୍ଥିତ ଜିଲା ମୁଖ୍ୟ ଚିକିତ୍ସାଳୟ ଓ ପରେ ଆନ୍ଧ୍ର ମେଡିକାଲରେ ଭର୍ତ୍ତି କରାଯାଇଥିଲା। ହେଲେ ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ହେବାରୁ ପରିବାର ଲୋକେ ବୁଧବାର ଭୁବନେଶ୍ୱର ମେଡିକାଲ ନେଇଥିଲେ। ସେଠାରୁ ଗୁରୁବାର କଟକ ଶିଶୁ ଭବନରେ ଭର୍ତ୍ତି କରିଥିଲେ। ବର୍ତ୍ତମାନ ଶିଶୁର ଅବସ୍ଥା ସଙ୍କଟାପନ୍ନ ଥିବା ଜଣାପଡ଼ିଛି। ଉଭୟ ଆଶାକର୍ମୀ ଓ ଅଙ୍ଗନଓ୍ବାଡି କର୍ମୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୁଧବାର ସ୍ଥାନୀୟ ଥାନାରେ ପରିବାର ଲୋକେ ଏତଲା ଦେଇଥିଲେ। ପୋଲିସ ନଂ. ୧୩୩/୨୩ରେ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।
