ମାଥିଲି,୧୯ା୧୧(ଡି.ଏନ.ଏ.)- ଏବେ ସୁଦ୍ଧା ଲୋକଙ୍କ ନିକଟରେ ପହଞ୍ଚତ୍ପାରିନି ମୌଳିକ ସୁବିଧା। ଶିକ୍ଷା ବ୍ୟବସ୍ଥାର ବିକଳ ରୂପ ଦେଖିବାକୁ ମିଳିଛି ମାଲକାନଗିରି ଜିଲା ମାଥିଲି ବ୍ଲକରେ। ବ୍ଲକର କମାରପାଲି ପଞ୍ଚାୟତ ଅନ୍ତର୍ଗତ ସୋଡ଼ିଗୁଡ଼ା ଗ୍ରାମରେ ପ୍ରାଥମିକ ବିଦ୍ୟାଳୟ ରହିଛି ସତ, ମାତ୍ର ଏଠାରେ ଅଧ୍ୟୟନ କରୁଥିବା ଛାତ୍ରୀଛାତ୍ର ଶିକ୍ଷାଦାନ କରୁଥିବା ଶିକ୍ଷକଙ୍କ ଭାଷା ବୁଝିପାରୁନାହାନ୍ତି। ସମ୍ପୃକ୍ତ ଅଞ୍ଚଳରେ କୋୟା ସମ୍ପ୍ରଦାୟର ଜନଜାତି ବସବାସ କରୁଥିବା ବେଳେ ବିଦ୍ୟାଳୟରେ ନିଯୁକ୍ତ ହୋଇଛନ୍ତି ଓଡ଼ିଆ ଶିକ୍ଷକ ରତ୍ନାକର ପାଳ। ଫଳରେ ଭାଷା ସମସ୍ୟାରେ ପଡ଼ିଛନ୍ତି ଛାତ୍ରୀଛାତ୍ର ଓ ଶିକ୍ଷକ ଜଣକ। ଛାତ୍ରୀଛାତ୍ରମାନେ ଶିକ୍ଷକ ପାଳଙ୍କ ଭାଷା ବୁଝିପାରୁନାହାନ୍ତି କି ଛାତ୍ରୀଛାତ୍ରଙ୍କ ଭାଷା ସେ ମଧ୍ୟ ବୁଝିପାରୁନାହାନ୍ତି। ଏପରି ସ୍ଥିତିରେ ଛାତ୍ରୀଛାତ୍ରଙ୍କ ଭବିଷ୍ୟତ ଅନ୍ଧାର ଭିତରକୁ ଠେଲିହୋଇଯାଉଥିବା ଅଭିଯୋଗ ହେଉଛି। ରାଜ୍ୟ ସରକାର ଆଦିବାସୀମାନଙ୍କ ଉନ୍ନତି ପାଇଁ ସବୁ ପ୍ରକାର ପଦକ୍ଷେପ ନେଉଥିବା କହୁଥିବା ବେଳେ କେଉଁ ଅଞ୍ଚଳରେ ଶିକ୍ଷାଦାନର କେଉଁ ସ୍ଥିତି ରହିଛି ତାହା ପରଖୁନାହାନ୍ତି, ଯାହା ସୋଡ଼ିଗୁଡ଼ା ପ୍ରାଥମିକ ବିଦ୍ୟାଳୟରୁ ପ୍ରମାଣିତ ହେଉଛି। ଅନ୍ୟପକ୍ଷରେ ବିଦ୍ୟାଳୟରେ ୩୨ଜଣ ଛାତ୍ରୀଛାତ୍ରଙ୍କ ପାଇଁ ନିୟୋଜିତ ଶିକ୍ଷକ ପାଳଙ୍କୁ ପାଠପଢ଼ା ସହ ବ୍ଲକ ପ୍ରଶାସନ ଦେଇଛି ଭୋଟର ତାଲିକା ସଂଶୋଧନ କାର୍ଯ୍ୟ। ସେ ଭୋଟର ତାଲିକା ସଂଶୋଧନ କାର୍ଯ୍ୟରେ ଗଲେ ବିଦ୍ୟାଳୟ ବନ୍ଦ ରହୁୁଛି। ଖାଲି ଏପରି ଚିତ୍ର ଏହି ଗୋଟିଏ ବିଦ୍ୟାଳୟରେ ନୁହେଁ, ବ୍ଲକରେ ଅନେକ ବିଦ୍ୟାଳୟ ରହିଛି ଯେଉଁଠି ଭାଷାଭିତ୍ତିକ ଶିକ୍ଷକ ନାହାନ୍ତି। ଛତିଶଗଡ଼ ସୀମାନ୍ତରେ ଅବସ୍ଥିତ ଏହି ଗ୍ରାମର ପ୍ରାଥମିକ ବିଦ୍ୟାଳୟରେ ଜଣେ କୋୟା ଭାଷାର ଶିକ୍ଷକ ନିଯୁକ୍ତି ଦେବାକୁ ଅଭିଭାବକମାନେ ଦାବି କରିଛନ୍ତି। ଏ ସମ୍ପର୍କରେ ପଚାରିବାକୁ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଯାଇଥିଲେ ମଧ୍ୟ ମାଥିଲି ଦାୟିତ୍ୱରେ ଥିବା ଖଇରପୁଟ ବିଇଓ ଶଶିଭୂଷଣ ମିଶ୍ର ଅନୁପସ୍ଥିତ ଥିଲେ। ତାଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ମତାମତ ମିଳିପାରିନାହିଁ।
