ପାଟନା,୧୫।୯: ନୀତିଶ କୁମାର ବିହାର ରାଜନୀତିର ସବୁଠାରୁ ବଡ଼ ନାମ। ସେ ନଅ ଥର ବିହାରର ମୁଖ୍ୟମନ୍ତ୍ରୀ ହୋଇଛନ୍ତି। ଏବେ ପୁଣି ଥରେ ବିହାରରେ ନିର୍ବାଚନ ହେବାକୁ ଯାଉଛି। ଏହା ପୂର୍ବରୁ ସମସ୍ତ ଦଳ ପ୍ରସ୍ତୁତି ଆରମ୍ଭ କରିଦେଇଛନ୍ତି। ନୀତିଶଙ୍କ ରାଜନୈତିକ କ୍ୟାରିଅର ଉତ୍ଥାନ-ପତନରେ ପରିପୂର୍ଣ୍ଣ ରହିଛି। ଲୋକମାନେ ତାଙ୍କ କ୍ୟାରିଅର ସହିତ ଜଡିତ ଅଧିକାଂଶ କଥା ଜାଣନ୍ତି, କିନ୍ତୁ ନୀତିଶଙ୍କ ବ୍ୟକ୍ତିଗତ ଜୀବନ ସହିତ ଜଡିତ ଅନେକ କଥା ଅଛି, ଯାହା ଅଧିକାଂଶ ଲୋକ ଜାଣନ୍ତି ନାହିଁ।
ଏହା ପ୍ରାୟ ୧୯୮୫ ମସିହାର କଥା। ବିହାରର ବର୍ତ୍ତମାନର ମୁଖ୍ୟମନ୍ତ୍ରୀ ନୀତିଶ କୁମାର ସେତେବେଳେ ପ୍ରଥମଥର ପାଇଁ ବିଧାୟକ ହୋଇଥିଲେ। ନିର୍ବାଚନ ଜିତିବା ପରେ ଯେତେବେଳେ ସେ ତାଙ୍କ ବଖତିୟାରପୁରରେ ପହଞ୍ଚିଲେ, ତାଙ୍କୁ ଜୋରଦାର ସ୍ବାଗତ କରାଯାଇଥିଲା, କିନ୍ତୁ ଏହି ସମୟରେ ତାଙ୍କ ସ୍ତ୍ରୀଙ୍କୁ ଦେଖାଯାଇ ନ ଥିଲା। ନୀତିଶଙ୍କ ସ୍ତ୍ରୀ ମଞ୍ଜୁ ତାଙ୍କ ବାପଘର ସେବାଦାହ ଯାଇଥିଲେ। ସେବାଦାହ ଏବଂ ବଖତିୟାରପୁର ମଧ୍ୟରେ ଦୂରତା ପ୍ରାୟ ୪୦ କିଲୋମିଟର।
ନୀତୀଶ ମଧ୍ୟରାତ୍ରିରେ ହିଁ ତାଙ୍କ ସ୍ତ୍ରୀଙ୍କୁ ଭେଟିବାକୁ ନିଷ୍ପତ୍ତି ନେଇଥିଲେ। ସେ ତାଙ୍କର ଜଣେ ବନ୍ଧୁଙ୍କୁ ବାଇକ୍ ବାହାର କରିବାକୁ କହିଲେ। ନୀତିଶ ରାତିରେ ଚାଲିଗଲେ ଏବଂ ସେ ଖୁବଶୀଘ୍ର ତାଙ୍କ ଶ୍ୱଶୁର ଘରକୁ ପହଞ୍ଚିଲେ, ମଞ୍ଜୁ ହଠାତ୍ ତାଙ୍କୁ ଦେଖି ବହୁତ ଖୁସି ହୋଇଯାଇଥିଲେ।
ନୀତୀଶ କୁମାର ୧୯୬୭ ମସିହାରେ ପାଟନା କଲେଜ ଅଫ ଇଞ୍ଜିନିୟରିଂରେ ଆଡମିସନ ନେଇଥିଲେ। ସେ ପୂର୍ବରୁ ବଖତିୟାରପୁରରୁ ତାଙ୍କର ପ୍ରାଥମିକ ଶିକ୍ଷା ସମାପ୍ତ କରିଥିଲେ। କଲେଜର ଶେଷ ବର୍ଷରେ ତାଙ୍କ ପରିବାର ମଞ୍ଜୁ ସିହ୍ନାଙ୍କ ସହିତ ତାଙ୍କର ବିବାହ ସ୍ଥିର କରିଥିଲେ। ମଞ୍ଜୁ ପାଟନାର ମଗଧ ମହିଳା କଲେଜରେ ପାଠପଢ଼ୁଥିଲେ। ନୀତିଶଙ୍କ କଲେଜ ବନ୍ଧୁ ଉଦୟ କାନ୍ତଙ୍କ ପୁସ୍ତକ ‘ନୀତୀଶ କୁମାର: ଅନ୍ତରଙ୍ଗ ଦୋସ୍ତୟୋଁ କି ନଜର ସେ’ ରେ ତାଙ୍କ ସହିତ ଜଡିତ ଅନେକ ଆକର୍ଷଣୀୟ କାହାଣୀ ଅଛି।
ନୀତୀଶ ବିନା ଯୌତୁକରେ ବିବାହ କରିବାକୁ ନିଷ୍ପତ୍ତି ନେଇଥିଲେ, କିନ୍ତୁ ତାଙ୍କ ପରିବାର ତିଲକ ଭାବରେ ୨୨ ହଜାର ଟଙ୍କା ଦେଇ ବିବାହ ସ୍ଥିର କରିଥିଲେ। ନୀତିଶ ଏକଥା ଜାଣିବା ପରେ ବହୁତ ରାଗି ଯାଇଥିଲେ। ସେ ଏହାକୁ ବିରୋଧ ମଧ୍ୟ କରିଥିଲେ। ନୀତିଶ ମଞ୍ଜୁଙ୍କ ପରିବାରକୁ ସ୍ପଷ୍ଟ ଭାବରେ ମନା କରିଦେଇଥିଲେ ଯେ, ସେ ଯୌତୁକ ନେବେ ନାହିଁ।
