ନୂଆଦିଲ୍ଲୀ,୨୦।୯: ସାମଗ୍ରୀ ଓ ସେବା ଟିକସ( ଜିଏସ୍ଟି) କ୍ଷତିପୂରଣ ପ୍ରଦାନ ନେଇ କେନ୍ଦ୍ରର ଉତ୍ତରଦାୟିତ୍ୱ ରହିଛି। ଏହାକୁ ସରକାର ଅଗ୍ରାହ୍ୟ କରିନାହାନ୍ତି। ଏ ପ୍ରସଙ୍ଗରେ ଜିଏସ୍ଟି ପରିଷଦ ବୈଠକରେ ଆଲୋଚନା କରାଯିବ ବୋଲି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ ଶନିବାର ସ୍ପଷ୍ଟୀକରଣ ପ୍ରଦାନ କରିଛନ୍ତି। ଅତିରିକ୍ତ ଖର୍ଚ୍ଚଦାବି ଆଲୋଚନା ବେଳେ ସୀତାରାମନ କହିଛନ୍ତି, ‘ଆକ୍ଟ ଅଫ୍ ଗଡ୍’ ସମ୍ପର୍କରେ ସେ ଯେଉଁ ମନ୍ତବ୍ୟ ଦେଇଥିଲେ ବିରୋଧୀ ତା’ର ଭିନ୍ନ ଅର୍ଥ ବାହାର କରିବାକୁ ଚେଷ୍ଟା କରିଛନ୍ତି। ରାଜ୍ୟଗୁଡିକର ସ୍ବାର୍ଥ ରକ୍ଷା କରିବା ଲାଗି କେନ୍ଦ୍ର ସରକାର ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି। ଦେଶର ବିଦେଶୀ ମୁଦ୍ରାଭଣ୍ଡାର ୫୩୭ ବିଲିୟନ ଡଲାରକୁ ବୃଦ୍ଧି ଘଟିଛି। ୧୯ ମାସର ଆମଦାନୀକୁ ଭରଣା କରିବା ଦିଗରେ ଏହା ସହାୟକ ହୋଇପାରିବ ବୋଲି ସେ ସ୍ପଷ୍ଟ କରିଛନ୍ତି।
ଆକ୍ଟ ଅଫ୍ ଗଡ୍ ମନ୍ତବ୍ୟକୁ ବିରୋଧୀ ବ୍ୟଙ୍ଗ ଭାବେ ନେଇଥିବାରୁ ଏହାକୁ ସୀତାରାମନ ସମାଲୋଚନା କରିଛନ୍ତି। ଜିଏସ୍ଟି କ୍ଷତିପୂରଣ ପ୍ରସଙ୍ଗ ନେଇ କେନ୍ଦ୍ର ରାଜ୍ୟ ଆଲୋଚନା କରିବେ। ବର୍ତ୍ତମାନ ସ୍ଥିତିରେ କିଭଳି କ୍ଷତିପୂରଣ ପ୍ରଦାନ କରାଯିବ ସେ ନେଇ କେନ୍ଦ୍ର ସରକାର ଚିନ୍ତା କରୁଛନ୍ତି। ସବୁ କିଛି ଆଲୋଚନା ହେଲା ପରେ ଯାଇ ନିଷ୍ପତ୍ତି ନିଆଯିବ। ସେ ପୁଣି କହିଛନ୍ତି, ଏହାର ଅର୍ଥ ନୁହେଁ କେନ୍ଦ୍ର ସରକାର କ୍ଷତିପୂରଣ ଦେବେ ନାହିଁ। କନ୍ସୋଲିଡେଟେଡ ଫଣ୍ଡରୁ କ୍ଷତିପୂରଣ ପ୍ରଦାନ କରିବା ନେଇ ଜିଏସ୍ଟି ଆଇନରେ କୌଣସି ବ୍ୟବସ୍ଥା କରାଯାଇନାହିଁ। ମାତ୍ର କ୍ଷତିପୂରଣ ପ୍ରଦାନଠାରୁ କେନ୍ଦ୍ର ସରକାର ଦୂରକୁ ଯାଇନାହାନ୍ତି। କୋଭିଡ୍ ଯୋଗୁ ବର୍ତ୍ତମାନ ବିଭିନ୍ନ ସମସ୍ୟା ଉପୁଜୁଛି। ଏଭଳି ସ୍ଥିତିରେ ସରକାର ଟିକସ ବଢାଇ ଟିକସ ହ୍ରାସକୁ ଭରଣା କରିବା ନେଇ କୌଣସି ଯୋଜନା ରଖି ନାହାନ୍ତି ବୋଲି ସେ ସ୍ପଷ୍ଟ କରିଛନ୍ତି।