ଉଜୈନ,୧୪।୧୧: ସଜବାଜ ହୋଇ ମଣ୍ଡପରେ ବସିଲେ। ପୁରୋହିତ ମନ୍ତ୍ର ବି ପଢ଼ିଲେ। ହେଲେ ବର ସିନ୍ଦୁର ପିନ୍ଧାଇଲେନି କିମ୍ବା ହାତଗଣ୍ଠି ପଡ଼ିଲାନି। କେବଳ ଏତିକି ନୁହେଁ ବର-ବଧୂ ଦୁହେଁ ୪୯୦୦୦ ଟଙ୍କା ଦିଅ ବୋଲି ଅଡ଼ି ବସିଲେ। ଏଭଳି ଏକ ଘଟଣା ମଧ୍ୟପ୍ରଦେଶ ଉଜୈନରେ ଘଟିଛି। ଏଠାରେ ସାମୁହିକ ବିବାହ କରିବା ସମୟରେ ଏକ ଯୋଡ଼ି ସିନ୍ଦୁର ପିନ୍ଧାଇଲେ ନାହିଁ ବୋଲି ହଙ୍ଗାମା ହୋଇଥିବା ଦେଖାଯାଇଛି। ଏହାର ଭିଡିଓ ଭାଇରାଲ ହେଉଥିବା ବେଳେ କେବଳ ଟଙ୍କା ପାଇଁ ସେମାନେ ଆସିଥବା କହିଛନ୍ତି।
ଘଟଣାଟି ଉଜୈନ ଜିଲାର ନାଗଦାର। ଏଠାରେ ନରେନ୍ଦ୍ର ମୋଦି ଖେଳ ପ୍ରଶାଲ ମଇଦାନରେ ୮୧ଜଣ ଯୋଡିଙ୍କ ସାମୁହିକ ବିବାହ କରାଯିବାର ଥିଲା। ଏଥିରେ ଗୋଟିଏ ଯୋଡ଼ି ବିବାହ ଲାଗି ସଜବାଜ ହୋଇ ଆସିଥିଲେ ହେଁ ବାହା ହୋଇ ନ ଥିଲେ। ଘଟଣା ଜିଲାପାଳ ନୀରଜ ସିଂଙ୍କ ଜ୍ଞାତସାରକୁ ଆସିବା ପରେ ସେ ମାମଲାର ଯାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି।
ଏହି ସମାରୋହରେ ୮୧ ଯୋଡ଼ିଙ୍କ ମଧ୍ୟରେ ରତଲାମର ଦିବ୍ୟା ଏବଂ ଅଜୟ ବିବାହ କରିଥିଲେ, ହେଲେ ରୀତିନୀତି ପାଳନ କରି ନ ଥିଲେ। ଏନେଇ ପଚରାଯିବାରେ ସେମାନେ କେବଳ ପୌରପାଳିକା ଅଧ୍ୟକ୍ଷ ଏବଂ ବିଧାୟକଙ୍କ ନିର୍ଦ୍ଦେଶରେ ମଣ୍ଡପରେ ବସିଥିବା କହିଥିଲେ। ବିବାହ କରନ୍ତୁ ବା ନ କରନ୍ତୁ ତାଙ୍କୁ ୪୯ହଜାର ଟଙ୍କା ମିଳିବ ବୋଲି ବିଧାୟକ ଏବଂ ଅଧ୍ୟକ୍ଷ ଫର୍ମ ପୂରଣ ବେଳେ କହିଥିଲେ।
ତେବେ ଉଭୟଙ୍କ ଏହି ବିବାହର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଆଗାମୀ ଦିନରେ କ’ଣ ମୋଡ଼ ନେଉଛି ଦେଖିବାକୁ ବାକି ରହିଲା।
