ରାଜନଗର, ୯ା୪: କେନ୍ଦ୍ରପଡ଼ା ଜିଲା ରାଜନଗର ଥାନା ପେଣ୍ଠ ସାମୁଦ୍ର ବେଳାଭୂମିରେ ଶୁକ୍ରବାର ମିଳିଛି ପ୍ରେମୀ ଯୁଗଳଙ୍କ ମୃତଦେହ। ମିଳିଥିବା ସୂଚନା ଅନୁଯାୟୀ, ଗହୀରମଥା ସାମୁଦ୍ରିକ ଅଭୟାରଣ୍ୟରେ କଇଁଛଙ୍କୁ ସୁରକ୍ଷା ଦେବାକୁ ପଇଁତରା ଦେଉଥିବା ବନ କର୍ମଚାରୀ ମୃତଦେହ ୨ଟିକୁ ଦେଖି ରାଜନଗର ବନାଞ୍ଚଳ ଅଧିକାରୀଙ୍କୁ ଖବର ଦେଇଥିଲେ। ରାଜନଗର ରେଞ୍ଜ ଅଫିସର ଧନେଶ୍ୱର ରଥ ଆଇଆଇସି ତପନ କୁମାର ନାୟକଙ୍କୁ ଘଟଣା ସମ୍ପର୍କରେ ଜଣାଇ ଥିଲେ। ଆଇଆଇସି ନାୟକଙ୍କ ନେତୃତ୍ୱରେ ପୋଲିସ ଟିମ୍ ପହଁଚି ପ୍ରେମୀ ଯୁଗଳଙ୍କ ମୃତଦେହ ଜବତ କରି ତଦନ୍ତ ଆରମ୍ଭ କରିଛି। ଯୁବକ ଜଣକ ଖଇରିଆ ରଙ୍ଗର ଟି ସାର୍ଟ ପିନ୍ଧି ଥିବା ବେଳେ ଏକ କଳା ପ୍ୟାଣ୍ଟ ଗୋଟିଏ ଗୋଡର ପାଦରେ ଲାଗି ରହିଛି। ଯୁବତୀ ଜଣଙ୍କ ଏକ ନୀଳ ରଙ୍ଗର ପ୍ୟାଣ୍ଟ ପିନ୍ଧି ଛନ୍ତି। ତାଙ୍କର ଡାହାଣ ହାତ ନାହିଁ। ମୃତ ଦେହରୁ ଦୁର୍ଗନ୍ଧ ହେଉଥିବାରୁ ୨ରୁ ୩ ଦିନ ତଳେ ସେମାନଙ୍କ ମୃତ୍ୟୁ ଘଟିଥିବା ପୋଲିସ ସନ୍ଦେହ କରୁଛି। ଏନେଇ ପୋଲିସ ଏକ ମାମଲା ରୁଜୁ କରି ମୃତଦେହ ଚିହ୍ନଟ କରିବାକୁ ପ୍ରକ୍ରିୟା ଆରମ୍ଭ କରିଛି।
