ଲକ୍ଷ୍ନୌ,୮।୨: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ୟୁପି ବାସୀଙ୍କୁ ସମାଜବାଦୀ ପାଟି(ଏସପି) ସପକ୍ଷରେ ଭୋଟ ଦେବାକୁ ନିବେଦନ କରିଛନ୍ତି। ସେ କହିଛନ୍ତି, ଦେଶକୁ ବଞ୍ଚାଇବା ପାଇଁ ଭାଜପାକୁ ପରାସ୍ତ କରିବାକୁ ପଡିବ। ଏହା ଏକ ବଡ ଲଡେଇ। ୟୁପିରେ ଏସପି ହେଉଛି ଏକମାତ୍ର ବିକଳ୍ପ। ଯଦି ଯୋଗୀ ଆଦିତ୍ୟନାଥ ପୁନର୍ବାର ଆସନ୍ତି ୟୁପି ନଷ୍ଟ ହୋଇଯିବ ତେଣୁ ତାଙ୍କୁ ଗାଦିରୁ ହଟାଅ। ଯଦି ୟୁପିରେ ଏସପି ସରକାର ଗଠନ ହୁଏ, ତେବେ ଛାତ୍ର, ମହିଳା ଏବଂ ଯୁବକମାନଙ୍କ ପାଇଁ ପଶ୍ଚିମବଙ୍ଗ ଭଳି ଯୋଜନା ଆରମ୍ଭ ହେବ।
ଏକ ନିର୍ବାଚନୀ ରାଲି ଯୋଗ ଦେବାକୁ ଲକ୍ଷ୍ନୌ ଯାଇଥିବା ମମତା କହିଛନ୍ତ, ଆଜି (ମଙ୍ଗଳବାର) ଭାଜପାର ଘୋଷଣାପତ୍ର ଆସିଛି। ଏହା ହେଉଛି ମନି ଫେଷ୍ଟୋ। ସେମାନେ ହାଥରସ୍ରେ କ’ଣ କରିଥିଲେ? ମହିଳା ଓ ଝିଅମାନଙ୍କ ସହିତ କ’ଣ ହେଲା? ପ୍ରଥମେ କ୍ଷମା ମାଗନ୍ତୁ, ତାପରେ ଭୋଟ ମାଗନ୍ତୁ । କୋଭିଡ କାରଣରୁ ଲୋକମାନେ ୟୁପିରେ ମରୁଥିବାବେଳେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମୋତେ ପରାସ୍ତ କରିବାକୁ ପଶ୍ଚିମବଙ୍ଗରେ ପ୍ରଚାର କରୁଥିଲେ। ଭାରତ ସରକାର ୟୁପିଙ୍କୁ ସର୍ବାଧିକ ଟଙ୍କା ଦେଇଛନ୍ତି, ତଥାପି ୟୁପିର ବିକାଶ ହୋଇପାରି ନାହିଁ। ବାବାସାହେବ ଆମ୍ବେଦକରଙ୍କ ସମ୍ବିଧାନ ପରିବର୍ତ୍ତନ କରିବାକୁ ଭାଜପା ଚେଷ୍ଟା କରୁଛି ବୋଲି ସେ କହିଛନ୍ତି।
