ମହାକାଳପଡ଼ା,୨୦ା୫ (ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ବହୁଳ ଭାବେ ଭାକ୍ସିନ ଦ୍ୱାରା ବିଡିଂ କରାଯାଉଥିବା କୃତ୍ରିମ ମାଛ ଯାଆଁଳ ବିକ୍ରି ହେଉଛି। ଏହି ମାଛ ଯାଆଁଳକୁ କେତେଜଣ ବ୍ୟବସାୟୀ କୋଲକାତା, ବାଂଲାଦେଶ ସୀମାରୁ ଆସି ୨ ମାସରୁ ଅଧିକ ହେବ ସ୍ଥାନୀୟ ପୋଖରୀରେ ଗାଞ୍ଜ ଜାଲ ଘେରା କରି ଆଡ୍ଡା ଜମାଇଛନ୍ତି। ବିଶେଷକରି ବାଂଲାଦେଶ ସୀମା ପଶ୍ଚିମବଙ୍ଗର ଉତ୍ତର ଚବିଶ ପ୍ରଗଣା ଜିଲାର ବଡ଼ତଳା ବଜାର, ନଦୀଘାଟ ଅଞ୍ଚଳରୁ ପିକ୍ଅପ୍ ଭ୍ୟାନ, ବଡ ବଡ ଟ୍ରକ୍ ଦ୍ୱାରା କାନ୍ଥି ଜିଲାର କେତେଜଣ ବ୍ୟବସାୟୀ କେନ୍ଦ୍ରାପଡ଼ା ଜିଲାକୁ ଯାଆଁଳ ଚାଲାଣ କରିଥାନ୍ତି। ମହାକାଳପଡ଼ା ବ୍ଲକର ଜମ୍ବୁ, ଛପାଲୀ, ମଳାଢ଼ି, ଅରୁଣ ନଗର, ରାମନଗର ଆଦି ଅଞ୍ଚଳରେ କାନ୍ଥି ଅଞ୍ଚଳର ବ୍ୟବସାୟୀ ପୋଖରୀରେ ମାଛ ଯାଆଁଳକୁ ଗାଞ୍ଜ ଜାଲରେ ରଖି ସଂରକ୍ଷିତ ରଖନ୍ତି। ପରେ ବାଇକ୍, ସାଇକେଲ ଯୋଗେ ସିଲ୍ଭର ହାଣ୍ଡିରେ ସ୍ବଳ୍ପ ପାଣି ମଧ୍ୟରେ ରୋହି, ଭାକୁର, ମିରିକାଳୀ, ରୂପଚାନ୍ଦି, ଟେମ୍ପୋ, ସିଲ୍ଭର କାର୍ପ, ଗ୍ରାସ କାର୍ପ, କେରାଣ୍ଡି ଆଦି ଯାଆଁଳ କିଲୋ ପ୍ରତି ୨ରୁ ସାଢ଼େ ୩ ହଜାର ଟଙ୍କା ପର୍ଯ୍ୟନ୍ତ ଗାଁ ଗାଁରେ ବୁଲି ବିକ୍ରି କରୁଥିବା ଦେଖିବାକୁ ମିଳିଛି। ତେବେ ଏହି ମାଛ ଯାଆଁଳ ଇଞ୍ଜେକଶନ ବା ଭାକ୍ସିନ ପ୍ରୟୋଗ ଯୋଗୁ କୃତ୍ରିମ ଉପାୟରେ ଉତ୍ପାଦନ ହେଉଥିବା କାନ୍ଥି ଅଞ୍ଚଳର ଜଣେ ବ୍ୟବସାୟୀ କହିଛନ୍ତି।
ଅପରପକ୍ଷରେ ସ୍ଥାନୀୟ ଅଞ୍ଚଳର ମାଛ ଚାଷୀ ଏହି ଯାଆଁଳକୁ ପୋଖରୀରେ ଛାଡ଼ିଲା ପରେ ବର୍ଷକ ମଧ୍ୟରେ ୪ରୁ ୫ ଶହ ଗ୍ରାମରୁ ଅଧିକ ମାଛ ବଢୁ ନାହାନ୍ତି ବୋଲି ବାବାଜୀ ବେହେରା, ସଦାଶିବ ରାଉତ, ଦୀନବନ୍ଧୁ ସ୍ବାଇଁ, ଶୁକଦେବ ମଣ୍ଡଳ, ହରିପଦ ଜେନା ପ୍ରମୁଖ କେତେଜଣ ଚାଷୀ କହିଛନ୍ତି। ତେବେ ମୌସୁମୀ ବର୍ଷା ଆରମ୍ଭରେ ଉପରମୁଣ୍ଡ ହୀରାକୁଦ ଜଳଭଣ୍ଡାରରେ ମଧୁର ଜଳରେ ବଡ ମାଛଗୁଡ଼ିକ ପ୍ରାକୃତିକ ଅଣ୍ଡାଦାନ କରିଥାନ୍ତି। ଏହି ପ୍ରାକୃତିକ ମାଛ ଅଣ୍ଡା ବନ୍ୟାଜଳରେ ବଡ଼ ବଡ଼ ଫେଣ ଆକାରରେ ଭାସିଆସେ। ସ୍ଥାନୀୟ ଯାଆଁଳ ବ୍ୟବସାୟୀ ତଳମୁଣ୍ଡର ନଦୀ ନାଳରୁ ଫେଣ ସଂଗ୍ରହ କରିଥାନ୍ତି। ଏହାକୁ ସ୍ଥାନୀୟ ମାଛ ଚାଷୀଙ୍କୁ ବିକ୍ରୟ କରନ୍ତି। ପ୍ରାକୃତିକ ମାଛ ଯାଆଁଳ ପୋଖରୀରେ ଛାଡ଼ିଲେ ତାହା ବର୍ଷକ ମଧ୍ୟରେ ୨ରୁ ୩ କିଲୋ ବଢ଼ିଥାନ୍ତି ବୋଲି ଚାଷୀ ନାଥ କୁମାର ଭୋଳ, ଲକ୍ଷ୍ମୀଧର ସ୍ବାଇଁ, ଉପେନ୍ଦ୍ର ଜେନା ପ୍ରମୁଖ କହିଛନ୍ତି। ମହାକାଳପଡ଼ା ଅଞ୍ଚଳରେ ଏହି ମାସରେ ମାଛ ଯାଆଁଳ ଉତ୍ପାଦନ ହେଉନାହିଁ। ତେଣୁ ମାଛ ଚାଷୀମାନେ ବାଧ୍ୟହୋଇ ପଶ୍ଚିମବଙ୍ଗ ଅଞ୍ଚଳର କୃତ୍ରିମ ଯାଆଁଳ ଉପରେ ନିର୍ଭର କରୁଥିବା ଚାଷୀମାନେ କହିଛନ୍ତି। ଜିଲା ମତ୍ସ୍ୟ ବିଭାଗ ଏଥିପ୍ରତି ଯତ୍ନବାନ ହେବା ପାଇଁ ସାମାଜିକ କର୍ମୀ ସୁବାସ ଚନ୍ଦ୍ର ସ୍ବାଇଁ କହିଛନ୍ତି। ବର୍ଷାଋତୁରେ ମହାକାଳପଡ଼ା ଅଞ୍ଚଳରୁ ପ୍ରାକୃତିକ ଯାଆଁଳ କୋଲ୍କାତା ଯାଉଛି। ସେଠାରୁ କୃତ୍ରିମ ଯାଆଁଳ ଆଣି ଏଠାରେ ବିକ୍ରି କରାଯାଉଛି। ଏ ସମ୍ପର୍କରେ ମହାକାଳପଡ଼ା ବ୍ଲକ ସହକାରୀ ମତ୍ସ୍ୟ ଅଧିକାରୀ ରଶ୍ମି ରଞ୍ଜନ ଦାସଙ୍କୁ ପଚାରିବାରେ ବିଭାଗ ପକ୍ଷରୁ ଭୁବନେଶ୍ୱରସ୍ଥିତ କୌଶଲ୍ୟାଗଙ୍ଗରେ ମଧୁର ମାଛ ଯାଆଁଳ ଉତ୍ପାଦନ ହେଉଛି। ଖୁବ୍ଶୀଘ୍ର ଏହି ଅଞ୍ଚଳର ମାଛଚାଷୀଙ୍କୁ ସୁଲଭ ମୂଲ୍ୟରେ ଯାଆଁଳ ଯୋଗାଇଦେବାକୁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
