ନୂଆଦିଲ୍ଲୀ,୨୦।୧୦:ଅକ୍ଟୋବର ୧୭ରୁ ଟି -୨୦ ବିଶ୍ୱକପ ୨୦୨୧ ଆରମ୍ଭ ହୋଇଛି। ଅକ୍ଟୋବର ୨୪ରେ ଭାରତକୁ ଚିପ୍ରତିଦ୍ୱନ୍ଦୀ ପାକିସ୍ତାନ ବିପକ୍ଷରେ ପ୍ରଥମ ମ୍ୟାଚ ଖେଳିବ। କିନ୍ତୁ ଏହି ମ୍ୟାଚ ରଦ୍ଦ କରିବାକୁ ଦେଶରେ ଦାବି ଉଠିଛି। ଗତ କିଛି ଦିନ ହେବ କଶ୍ମୀରରେ ଭାରତୀୟ ନାଗରିକଙ୍କ ଉପରେ ଆତଙ୍କବାଦୀ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ଅନେକ ତିକ୍ତତା ଦେଖାଦେଇଛି, ଏହା ପରେ ଭାରତ ଏବଂ ପାକିସ୍ତାନ ମଧ୍ୟରେ ଟି -୨୦ ବିଶ୍ୱକପ ମ୍ୟାଚକୁ ବାତିଲ କରିବାକୁ ଦାବି ରହିଛି। ତେବେ ଏହି ମ୍ୟାଚକୁ ନେଇ ବିସିସିଆଇ ଏକ ବଡ ସୂଚନା ଜାରି କରିଛି। ଆଇସିସିର ଅନ୍ତର୍ଜାତୀୟ ପ୍ରତିବଦ୍ଧତା କାରଣରୁ ଏହି ହାଇ ଭୋଲଟେଜ ମ୍ୟାଚ ବାତିଲ ହୋଇପାରିବ ନାହିଁ ବୋଲି ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଲା ସ୍ପଷ୍ଟ କରିଛନ୍ତି। ଏକ ସାକ୍ଷାତକାରରେ ରାଜୀବ ଶୁକ୍ଲା କହିଛନ୍ତି, ଜମ୍ମୁ କଶ୍ମୀରରେ ହୋଇଥିବା ଆକ୍ରମଣକୁ ଆମେ ଦୃଢ ନିନ୍ଦା କରୁଛୁ। ଆତଙ୍କବାଦୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍। ଆଇସିସିର ଅନ୍ତର୍ଜାତୀୟ ପ୍ରତିଶ୍ରୁତି ହେତୁ ଆମେ ଏହି ମ୍ୟାଚ୍ ଖେଳିବାକୁ ମନା କରିପାରିବୁ ନାହିଁ ବୋଲି ସେ କହିଛନ୍ତି।
ଭାରତ ଏବଂ ପାକିସ୍ତାନ ମଧ୍ୟରେ ହେବାକୁ ଥିବା ଟି -୨୦ ବିଶ୍ୱକପ ମ୍ୟାଚ ୨୪ ଅକ୍ଟୋବରରେ ଦୁବାଇରେ ଖେଳାଯିବ। ଏହି ମ୍ୟାଚ ମାଧ୍ୟମରେ ହିଁ ବିରାଟ କୋହଲିଙ୍କ ସେନା ଟି -20 ବିଶ୍ୱକପ ପାଇଁ ଅଭିଯାନ ଆରମ୍ଭ କରିବ। ଭାରତ ଏବଂ ପାକିସ୍ତାନ ବିପକ୍ଷ ମ୍ୟାଚ ପୂର୍ବରୁ ପ୍ରଶଂସକଙ୍କ ଠାରୁ ଆରମ୍ଭ କରି ଟିମ ଇଣ୍ଡିଆର କ୍ରିକେଟର ପର୍ଯ୍ୟନ୍ତ ସେମାନେ ଉତ୍ସାହିତ ଅଛନ୍ତି। ଚଳିତ ବର୍ଷ ଟି -୨୦ ବିଶ୍ୱକପ ଜିତିବା ପାଇଁ ଭାରତ ଏକ ଶକ୍ତିଶାଳୀ ପ୍ରତିଦ୍ୱନ୍ଦ୍ୱୀ ବୋଲି ବିବେଚନା କରାଯାଏ। ଟି -୨୦ ବିଶ୍ୱକପ ବିଷୟରେ କହିବାକୁ ଗଲେ ପାକିସ୍ତାନ ବିପକ୍ଷରେ ଭାରତର ରେକର୍ଡ ବହୁତ ଭଲ। ଟି -୨୦ ବିଶ୍ୱକପରେ ଏପର୍ଯ୍ୟନ୍ତ ଭାରତ ଏବଂ ପାକିସ୍ତାନ ମଧ୍ୟରେ ୫ ଟି ମ୍ୟାଚ ହୋଇଛି, ସେଥିମଧ୍ୟରୁ ଟିମ ଇଣ୍ଡିଆ ସମସ୍ତ ପାଞ୍ଚଟି ମ୍ୟାଚ ଜିତିଛି।
