କଟକ ଅଫିସ,୧୨।୬: ଭାରତ- ଦକ୍ଷିଣ ଆଫ୍ରିକା ମଧ୍ୟରେ ରବିବାର ଦ୍ୱିତୀୟ ଟି-୨୦ ମୁକାବିଲା ଖେଳାଯିବ। ଏହି ମ୍ୟାଚ ଦେଖିବା ପାଇଁ ଅପରାହ୍ନ ୩ଟାରୁ ବାରବାଟୀ ଷ୍ଟାଡିୟମ୍ର ସମସ୍ତ ଗେଟ ଖୋଲାଯିବ। ଟିକେଟ୍ରେ ଉଲ୍ଲେଖ ଥିବା ଗେଟ୍ ନଂ ଅନୁସାରେ ଦର୍ଶକ ଷ୍ଟାଡ଼ିୟମ୍କୁ ପ୍ରବେଶ କରିବେ । ଏହି ସମୟରେ ଟିକେଟ ଯାଞ୍ଚ କଡ଼ାକଡ଼ି ହେବ । ଯାଞ୍ଚ ସମୟରେ ଜାଲ ଟିକେଟ ଧରାପଡ଼ିଲେ ସମ୍ପୃକ୍ତ ଦର୍ଶକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜଣାପଡ଼ିଛି।
ସେହିଭଳି ଦୁଇଚକିଆ ଯାନ ନେଇ ଆସିଥିବା ଦର୍ଶକମାନେ ଷ୍ଟାଡିୟମକୁ ଆସିବା ପୂର୍ବରୁ ନିଜ ହେପାଜତରେ ହେଲ୍ମେଟ ବାହାରେ ରଖି ଆସିବେ। ଦର୍ଶକଙ୍କୁ ବିଡି, ସିଗାରେଟ, ଦିଆସିଲି, ଲାଇଟର୍, ବ୍ୟାଗ, ବାଡ଼ି, ବୋତଲ, ବ୍ୟାନର୍, ପାଣି ପାଉଚ, ପାଣି ବୋତଲ ଆଦି ନେବା ଲାଗି ବାରଣ କରାଯାଇଛି । ଏମିତିକି ଦର୍ଶକ ସେମାନଙ୍କ ପକେଟ୍ରେ ଖୁଚୁରା ପଇସା ରଖିପାରିବେ ନାହିଁ । ସମସ୍ତଙ୍କ ପାଇଁ ମାସ୍କ ବାଧ୍ୟତାମୂଳକ କରାଯାଇଛି। ଗ୍ୟାଲେରୀରେ ଦର୍ଶକ କିମ୍ବା ଖେଳାଳିଙ୍କ ଉପରକୁ କୌଣସି ଜିନିଷ ଫିଙ୍ଗିବା ପାଇଁ ବାରଣ କରାଯାଇଛି । ଏଥିରେ କୌଣସି ବ୍ୟତିକ୍ରମ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି।
