ବଲାଙ୍ଗୀର ଅଫିସ/ଖପ୍ରାଖୋଲ,୯ା୩(ଡି.ଏନ୍.ଏ.): ବଲାଙ୍ଗୀର ଜିଲା ଖପ୍ରାଖୋଲ ଥାନା ଅନ୍ତର୍ଗତ ଚାବ୍ରିପାଲି ଗାଁରେ ଏକ ଅଭାବନୀୟ ଘଟଣା ଘଟିଛି। ବୁଧବାର ବିଳମ୍ବିତ ରାତିରେ ଖପ୍ରାଖୋଲ ପୋଲିସ ଏକ ଭ୍ୟାନ ଭିତରୁ ବସ୍ତାରେ ଭର୍ତ୍ତି ହୋଇଥିବା ମୃତଦେହ ଉଦ୍ଧାର କରିଛି। ଏହି ଘଟଣାରେ ୫ ଜଣଙ୍କୁ ଅଟକ ରଖି ପଚରାଉଚରା କରୁଥିବା ଜଣାଯାଇଛି। ମୃତକ ଜଣକ ହେଲେ ପଦ୍ମପୁର ଥାନା ଗଡ଼ଭାଟି ଗାଁର ରୁଦ୍ର ମେହର (୩୮)। କୌଣସି ଘଟଣାକୁ ନେଇ ଘରୋଇ ବିବାଦରୁ ଏ ଭଳି ଜଘନ୍ୟ ହତ୍ୟା କରାଯାଇଥିବା ଅନୁମାନ କରାଯାଉଛି।
ସୂଚନା ଅନୁସାରେ, ଶ୍ୱଶୁର ଘର ଲୋକେ ପିଟି ପିଟି ଜ୍ୱାଇଁଙ୍କୁ ମାରିଦେବା ପରେ ଘଟଣାକୁ ଚପାଇ ଦେବା ପାଇଁ ଚେଷ୍ଟା କରି ଭ୍ୟାନ୍ରେ ଜରି ବସ୍ତାରେ ମୃତଦେହ ପୂରାଇ ପିଙ୍ଗିବାକୁ ଉଦ୍ୟମ କଳା ବେଳେ ଗ୍ରାମବାସୀ ସନ୍ଦେହ କରି ଗାଡ଼ି ଅଟକ ରଖିଥିଲେ। ଏନେଇ ଖପ୍ରାଖୋଲ ପୋଲିସ ସୂଚନା ପାଇ ଗାଡ଼ି ସହ ଅଭିଯୁକ୍ତଙ୍କୁ କାବୁ କରି ମୃତଦେହ ଜବତ କରିଥିବା ଜଣାଯାଇଛି। ମିଳିଥିବା ସୂଚନା ଅନୁସାରେ ବରଗଡ଼ ଜିଲା ପଦ୍ମପୁର ଥାନା ଗଡ଼ଭାଟି ଗାଁର ରୁଦ୍ର ଗତ ୧୦ ବର୍ଷତଳେ ଚାବ୍ରିପାଲି ଗାଁର ଉଦ୍ଧବ ମେହେରଙ୍କ ଝିଅ ସରୋଜିନୀଙ୍କୁ ବିବାହ କରିଥିଲେ। ତାଙ୍କର ଦୀର୍ଘଦିନ ହେଲା ପାରିବାରିକ କଳହ ଲାଗି ରହିଥିଲା। ବୁଧବାର ତାଙ୍କ ସ୍ତ୍ରୀ ଏକ ବିବାହ ଉତ୍ସବକୁ ଯାଇଥିଲେ। ଜ୍ବାଇଁ ଓ ଶ୍ୱଶୁର ଘର ଲୋକେ ଘରେ ଥିବା ସମୟରେ କୌଣସି କଥାକୁ ନେଇ କଳହ ସୃଷ୍ଟି ହୋଇଥିଲା। ଉକ୍ତ ସମୟରେ ହାତାହାତି ହୋଇ ଜ୍ବାଇଁଙ୍କ ମୃତ୍ୟୁ ହୋଇଥିବା ପ୍ରାଥମିକ ସୂଚନା ମିଳିଛି। ଅନ୍ୟପକ୍ଷରେ ଶ୍ୱଶୁର ଘର ଲୋକେ ଉକ୍ତ ହତ୍ୟା ଘଟଣାକୁ ଚପାଇ ଦେବା ପାଇଁ ଏକ ଭ୍ୟାନ୍ ନମ୍ବର ଓଡି ୦୩ ଏକ୍ସ ୭୦୦୬ ରେ ଜ୍ବାଇଁଙ୍କ ମୃତଦେହକୁ ଏକ ଜରି ବସ୍ତାରେ ଭରି କୌଣସି ସ୍ଥାନକୁ ଫିଙ୍ଗିବାକୁ ନେବା ଉଦ୍ୟମ ବିଫଳ ହୋଇଛି। ଅଟକ ଅଭିଯୁକ୍ତମାନେ ହେଲେ ମୃତକଙ୍କ ଶ୍ୱଶୁର ଉଦ୍ଧବ ମେହେର (୫୫), ଶଳା ଅନିରୁଦ୍ଧ ମେହେର (୧୫), ସୁନିଲ କୁମାର ମେହେର ଓ ଅନ୍ୟ ଦୁଇ ଜଣଙ୍କୁ ଅଟକ ରଖି ଘଟଣାର ତଦନ୍ତ ଜାରି ରହିଥିବା ସୂଚନା ମିଳିଛି।
