ଯୋଡ଼ା,୨୮।୪(ଡି.ଏନ.ଏ.): କେନ୍ଦୁଝର ଜିଲା ଯୋଡ଼ା ସହରର ଛାତ୍ର ଦେବାଶିଷ ବେହେରା ଫିଜବି ମୋବାଇଲ ଆପ୍ ପ୍ରସ୍ତୁତ କରି ଚର୍ଚ୍ଚାକୁ ଆସିଛନ୍ତି। ଏହି ଆପ୍ ଜରିଆରେ ଫ୍ରି ଆଣ୍ଡ୍ ସିକ୍ୱର ଭାବେ ଭିଡିଓ କନଫରେନ୍ସିଂ ସେବା ଉପଲବ୍ଧ ରହିଛି। ଏକକାଳୀନ ୭୦ ଜଣ ଏହି ଆପ୍ଲିକେଶନ ମାଧ୍ୟମରେ ଭିଡିଓ କନଫରେନ୍ସରେ ଅଂଶଗ୍ରହଣ କରିପାରିବେ। ୧୭୬ଟି ଦେଶରେ ଏହି ଆପ୍ ବ୍ୟବହାର ଉପଯୋଗୀ ହୋଇପାରିଛି। ଏହା ଗୁଗଲ ପ୍ଲେ ଷ୍ଟୋରରେ ଗତ ଫେବୃୟାରୀରେ ସ୍ଥାନ ପାଇଛି। ତେବେ ଏହି ଆପ୍ର ଏକ ସ୍ବତନ୍ତ୍ର ଫିଚର୍ ରହିଛି। ତାହା ହେଲା ଭିଡିଓ କନଫରେନ୍ସିଂ ସମୟରେ ଇମୋଜିରେ ସ୍ପେଶିଆଲ ଇଫେକ୍ଟର ବ୍ୟବହାର କରାଯାଇପାରିବ, ଯାହାକି ଅନ୍ୟ ଆପ୍ଲିକେଶନ ଠାରୁ ଭିନ୍ନ। ଏଭଳି ଆପ୍ ପ୍ରସ୍ତୁତ କରି ଓଡ଼ିଶା ପାଇଁ ଗୌରବ ଆଣଛନ୍ତି ଦେବାଶିଷ।
ଯୋଡ଼ା ସହରର ୫ନଂ. ୱାର୍ଡ ଆଜାଦବସ୍ତିରେ ରହୁଥିବା ବାହାଦୁର ବେହେରା ଓ ରେଣୁକାଙ୍କ ପୁଅ ଦେବାଶିଷ ବର୍ତ୍ତମାନ ଭୁବନେଶ୍ୱରରେ ଦ୍ୱାଦଶ ଶ୍ରେଣୀରେ ଅଧ୍ୟୟନରତ। ତାଙ୍କର ପ୍ରାରମ୍ଭିକ ଶିକ୍ଷା ଯୋଡ଼ାସ୍ଥିତ ସେଣ୍ଟ ଟେରେସା ବିଦ୍ୟାଳୟରେ ହୋଇଥିଲା। ବିଦ୍ୟାଳୟରେ ପଢ଼ୁଥିବା ବେଳେ କମ୍ପ୍ୟୁଟର ସାଇନ୍ସ ଓ ପ୍ରଯୁକ୍ତି ବିଦ୍ୟା ପ୍ରତି ତାଙ୍କର ପ୍ରବଳ ରୁଚି ଥଲା। ଅଷ୍ଟମ ଶ୍ରେଣୀରେ ପଢ଼ିବା ବେଳେ ଦେବାଶିଷ ଏହି ପ୍ରଯୁକ୍ତି ବିଦ୍ୟାର ମୌଳିକ ଜ୍ଞାନ ଆହରଣ କରିଥିଲେ। ଏହି ଜ୍ଞାନରେ ଅଧିକ ନିପୁଣତା ପାଇଁ ସେ ଜାଭା ପ୍ରୋଗ୍ରାମିଂ ଲାଙ୍ଗୁଏଜ୍ ଶିକ୍ଷା ଗ୍ରହଣ କରିଥିଲେ। ଏଥିପାଇଁ ଗୁଗଲ, ଇନଷ୍ଟାଗ୍ରାମ, ୟୁଟ୍ୟୁବ ଏବଂ ବିଭିନ୍ନ ଆର୍ଟିକଲ ଓ ବହି ଅଧ୍ୟୟନ କରିଥିଲେ। ଉକ୍ତ ଜ୍ଞାନକୌଶଳ ପ୍ରୟୋଗ କରି ଦେବାଶିଷ ପୂର୍ବରୁ ଯଦିଓ ଦୁଇଟି ଆପ୍ ପ୍ରସ୍ତୁତ କରିଥିଲେ ହେଲେ ଫିଜବି ଆପ୍ଲିକେଶନ ସୃଷ୍ଟି କରି ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି। ତାଙ୍କ ଦ୍ୱାରା ବିକଶିତ ସ୍ବଦେଶୀ ଫିଜବି ଆପ୍ଲିକେଶନ ଭାରତର ଏକ ଷ୍ଟାର୍ଟଅପ ସଙ୍କେତ ହେବ ବୋଲି ଦେବାଶିଷ କହିଛନ୍ତି। ଏତଦ୍ବ୍ୟତୀତ ଏହି ଫିଜବି ଆପ୍ ସମ୍ପୂର୍ଣ୍ଣ ସୁରକ୍ଷିତ ଓ ଗୋପନୀୟତାକୁ ବଜାୟ ରଖିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।
ଏହି ଆପ୍ଲିକେଶନ ବ୍ୟବହାର କରୁଥିବା ଯୋଡ଼ାର ଜଣେ ଯୁବ ୟୁଜର ସୁରଜକାନ୍ତ ପାଠକ କୁହନ୍ତି, ସେ ଗତ ୧ ମାସ ଧରି ଏହି ଆପ୍ଲିକେଶନକୁ ବ୍ୟବହାର କରୁଛନ୍ତି। ଅନ୍ୟ ଆପ୍ଲିକେଶନ ତୁଳନାରେ ଏହାର ଫିଚର୍ସ, ସିକ୍ୟୁରିଟି ଅତ୍ୟନ୍ତ ଉଚ୍ଚକୋଟିର। ଏହି ଆପ୍କୁ ବିକଶିତ କରିଥିବା ଦେବାଶିଷଙ୍କୁ ସରକାର ପ୍ରୋତ୍ସାହନ ଯୋଗାଇ ଦେଲେ ଭବିଷ୍ୟତରେ ସେ ପ୍ରଯୁକ୍ତି ବିଦ୍ୟାର ଅଧିକ ବିକାଶ କରିପାରିବେ। ଦେବାଶିଷ ଭବିଷ୍ୟତରେ ଏକ ଟେକ୍ କମ୍ପାନୀ କରି ସ୍ବଦେଶୀ ଜ୍ଞାନକୌଶଳକୁ ବିକଶିତ କରିବାକୁ ଲକ୍ଷ୍ୟ ରଖିଥିବା ତାଙ୍କ ମା’ କହିଛନ୍ତି।
ମାନସ ମହାନ୍ତି
