ଭୁବନେଶ୍ୱର,୨୬।୮(ବ୍ୟୁରୋ): ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ଆସନ୍ତା ଅକ୍ଟୋବର ୧ତାରିଖରୁ ରନ୍ୱେର କାର୍ପେଟିଂ କାମ ଆରମ୍ଭ ହେବ। ୪ମାସ ଧରି କାର୍ପେଟିଂ କାମ ଚାଲିବ। ପ୍ରତିଦିନ ରାତି ୧୧ଟାରୁ ସକାଳ ୭ଟା ପର୍ଯ୍ୟନ୍ତ କାମ ହେବ। ଏଥିପାଇଁ ଏହି ସମୟରେ ବିମାନ ଯାତାୟାତ ବନ୍ଦ ରହିବ ବୋଲି ବିମାନବନ୍ଦର ନିର୍ଦ୍ଦେଶକ ଭି.ଭି. ରାଓ ସୂଚନା ଦେଇଛନ୍ତି। ଲକ୍ଡାଉନ୍ ସମୟରେ ବିମାନବନ୍ଦର ୫୦ ପ୍ରତିଶତରୁ ଅଧିକ କ୍ଷତି ସହିଛି। ଏହି ସମୟରେ ୭୫ ପ୍ରତିଶତ ଯାତ୍ରୀଙ୍କ ସଂଖ୍ୟା କମିଯାଇଛି। ମେ’ ଓ ଜୁନ୍ ମାସରେ ଅଧିକ ଯାତ୍ରୀ ଆସୁଥିଲେ ଏବଂ କମ୍ ଯାତ୍ରୀ ଯାଉଥିଲେ। ବର୍ତ୍ତମାନ କିନ୍ତୁ ଯାତ୍ରୀ କମ୍ ଆସୁଛନ୍ତି ଏବଂ ଅଧିକ ଯାଉଛନ୍ତି। କରୋନା ପୂର୍ବରୁ ଦୈନିକ ପ୍ରାୟ ୪୫ଟି ବିମାନ ଉଡ଼ାଣ କରୁୁଥିଲା। ମାତ୍ର କରୋନା ଯୋଗୁ ଏବେ ପ୍ରାୟ ଦୈନିକ ୧୬ରୁ ୧୭ଟି ବିମାନ ଉଡ଼ାଣ କରୁଛି। ପୂର୍ବରୁ ପ୍ରତିଦିନ ୧୧ରୁ ୧୨ହଜାର ଯାତ୍ରୀ ଯିବା ଆସିବା କରୁଥିଲେ। ବର୍ତ୍ତମାନ ପ୍ରାୟ ୩ ହଜାର ଯାତ୍ରୀ ଯିବା ଆସିବା କରୁଛନ୍ତି। ଏଥିରୁ ପାଖାପାଖି ୨ହଜାର ଯାତ୍ରୀ ଯାଉଛନ୍ତି ଏବଂ ଏକ ହଜାର ଯାତ୍ରୀ ଆସୁଛନ୍ତି ବୋଲି ବିମାନବନ୍ଦର କର୍ତ୍ତୃପକ୍ଷ କହିଛନ୍ତି।
