ଥୁଆମୂଳ ରାମପୁର,୧୫ା୨(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅନ୍ତର୍ଗତ ଓଡରୀ ପଞ୍ଚାୟତ ଦୋଳଗୁଡ଼ା ଗ୍ରାମର ଜଣେ ଅସହାୟା ମହିଳାଙ୍କୁ ନେଇ ପ୍ରଶାସନର ଚରମ ଅବହେଳା ସାମ୍ନାକୁ ଆସିଛି। ଜୀବିତ ଥାଇ ମଧ୍ୟ ସରକାରୀ କାଗଜପତ୍ରରେ ‘ମୃତ’ ସାଜିଥିବା ସାବିତ୍ରୀ ନାୟକଙ୍କୁ ଦୀର୍ଘ ୪ ବର୍ଷ ହେଲା ବାର୍ଦ୍ଧକ୍ୟ ଭତ୍ତାରୁ ବଞ୍ଚିତ କରାଯାଇଛି। ‘ଧରିତ୍ରୀ’ରେ ଏନେଇ ଖବର ପ୍ରକାଶ ପାଇବା ପରେ, ଅନ୍ତ୍ୟୋଦୟ ସଂସ୍ଥାର ଅଧ୍ୟକ୍ଷ ତଥା ସମାଜସେବୀ ଦିଲ୍ଲୀପ କୁମାର ଦାସ ଜାତୀୟ ମାନବାଧିକାର କମିଶନ (NHRC)ଙ୍କ ନିକଟରେ ଅଭିଯୋଗ କରିଛନ୍ତି। କମିଶନ ଏହି ମାମଲାକୁ ଗ୍ରହଣ କରି ଡାଏରୀ ନମ୍ବର ୩୪୨୪/IN/୨୦୨୬ପ୍ରଦାନ କରିଛନ୍ତି। ଅଭିଯୋଗ ଅନୁଯାୟୀ, ଦୋଳଗୁଡ଼ା ଗ୍ରାମର ସାବିତ୍ରୀ ନାୟକଙ୍କୁ ପ୍ରଶାସନିକ ସ୍ତରରେ ମୃତ ଘୋଷଣା କରାଯାଇଥିବାରୁ ଗତ ୪ ବର୍ଷ ହେଲା ସେ ତାଙ୍କର ଏକମାତ୍ର ସାହାରା ବାର୍ଦ୍ଧକ୍ୟ ଭତ୍ତା ପାଉନାହାନ୍ତି। ଏହି ବୟସରେ ସେ ଅନେକ ଅସୁବିଧାର ସମ୍ମୁଖୀନ ହୋଇ ଜୀବନ ବଞ୍ଚାଇବା ପାଇଁ ସଂଘର୍ଷ କରୁଛନ୍ତି। କେବଳ ସେତିକି ନୁହେଁ, ତାଙ୍କ ସ୍ବାମୀ ପ୍ରସାଦ ନାୟକଙ୍କୁ ମଧ୍ୟ କୌଣସି ଅଜଣା କାରଣରୁ ଗତ ୪ ମାସ ହେଲା ଭତ୍ତା ମିଳୁନାହିଁ। ଫଳରେ ଏହି ବୃଦ୍ଧ ଦମ୍ପତି ଏବେ ଦୁର୍ଦ୍ଦଶା ମଧ୍ୟରେ କାଳାତିପାତ କରୁଛନ୍ତି। ସମାଜସେବୀ ଦାସ ନିଜ ଆବେଦନରେ ଦର୍ଶାଇଛନ୍ତି ଯେ, ଜଣେ ଜୀବିତ ବ୍ୟକ୍ତିଙ୍କୁ କାଗଜପତ୍ରରେ ମାରିଦେବା ଭାରତୀୟ ସମ୍ବିଧାନର ଧାରା ୨୧ (Article 21)ର ଖୋଲାଖୋଲି ଉଲ୍ଲଂଘନ। ଜଣେ ବୃଦ୍ଧାଙ୍କ ପ୍ରତି ଏଭଳି ଅମାନବୀୟ ବ୍ୟବହାର ଓ ପ୍ରଶାସନିକ ତ୍ରୁଟି ପାଇଁ ଦାୟୀ ଅଧିକାରୀଙ୍କ ବିରୋଧରେ ଦୃଷ୍ଟାନ୍ତମୂଳକ ଦଣ୍ଡ ବିଧାନ କରିବାକୁ ସେ କମିଶନଙ୍କ ନିକଟରେ ନିବେଦନ କରିଛନ୍ତି।
ସରକାରୀ ଅଧିକାରୀଙ୍କ ବେପରୁଆ କାର୍ଯ୍ୟ ଯୋଗୁ ସାବିତ୍ରୀଙ୍କ ମାନବାଧିକାର କ୍ଷୁଣ୍ଣ ହୋଇଥିବା ଦର୍ଶାଇ, ତାଙ୍କୁ ତୁରନ୍ତ ନ୍ୟାୟ ଦେବା ସହ ବନ୍ଦ ଥିବା ସମସ୍ତ ଭତ୍ତା ରାଶି ପ୍ରଦାନ କରିବାକୁ କମିଶନ ଜିଲା ପ୍ରଶାସନକୁ ନିର୍ଦ୍ଦେଶ ଦିଅନ୍ତୁ ବୋଲି ଦାବି ହୋଇଛି। କମିଶନଙ୍କ ଏହି ପଦକ୍ଷେପ ପରେ ଏବେ ସାବିତ୍ରୀଙ୍କୁ ନ୍ୟାୟ ମିଳିବା ନେଇ ଆଶା ସଞ୍ଚାର ହୋଇଛି।
