ଦାରିଙ୍ଗବାଡ଼ି,୨୨ା୮(ଅରୁଣ ସାହୁ): ଆସନ୍ତା ଜନ୍ମାଷ୍ଟମୀ ଦିନ ଦଙ୍ଗା ସୃଷ୍ଟି ହେବା ନେଇ ବିଭିନ୍ନ ସାମାଜିକ ଗଣମାଧ୍ୟମରେ କେହି ଦୁର୍ବୃତ୍ତ ଭାଇରାଲ କରିବା ପରେ କନ୍ଧମାଳ ଜିଲାର ବିଭିନ୍ନ ଥାନା ଅଞ୍ଚଳରେ ଏକ ପ୍ରକାର ଭୟର ବାତାବରଣ ସୃଷ୍ଟି ହୋଇଛି। ଘଟଣାଟି ଅତି ସମ୍ବେଦନଶୀଳ ହୋଇଥିବା ବେଳେ ପୋଲିସ ପକ୍ଷରୁ ମଧ୍ୟ ଏହି ଗୁଜବକାରୀଙ୍କୁ ଧରିବା ପାଇଁ ପ୍ରୟାସ ଚାଲିଥିବା ଜଣାପଡ଼ିଛି। ବିଭିନ୍ନ ଥାନାରେ ଘନଘନ ବୈଠକ କରି ଗୁଜବକୁ ବିଶ୍ୱାସ ନ କରିବାକୁ ପୋଲିସ ଅପିଲ କରୁଛି।
ସେହିକ୍ରମରେ ଗୁରୁବାର ବ୍ଲକ କାର୍ଯ୍ୟାଳୟ ପରିସର ସଭାଗୃହଠାରେ ତହସିଲଦାର ଶରତ ଶବରଙ୍କ ଅଧ୍ୟକ୍ଷତାରେ ବୈଠକ ଅନୁଷ୍ଠିତ ହୋଇଥିଲା। ଏଥିରେ ବିଡିଓ ଗଦାଧର ପାତ୍ର ଏବଂ ଆଇଆଇଆସି ରମେଶ ପ୍ରଧାନ ଉପସ୍ଥିତ ରହି ବୈଠକ ପରିଚାଳନା କରିଥିଲେ। ଏଥିରେ ଉପସ୍ଥିତ ଲୋକଙ୍କୁ ପୋଲିସ ପ୍ରଶାସନ ଆଶ୍ୱାସନା ଦେଇଥିଲା କୌଣସି ଅପ୍ରୀତିକର ପରିସ୍ଥିତି ହେବ ନାହିଁ। କୌଣସି ଦଙ୍ଗା ହେବାର ଆଶଙ୍କା ନାହିଁ। ଏହା ଗୁଜବ ବୋଲି କୁହାଯିବା ସହ ଦାରିଙ୍ଗବାଡ଼ି ସମେତ ସମଗ୍ର ଜିଲା ଏକ ଶାନ୍ତି ପ୍ରିୟ ସ୍ଥାନ, ଶାନ୍ତି, ସଦ୍ଭାବନା ନେଇ ଅଞ୍ଚଳବାସୀ ଚଳନ୍ତି। ତେଣୁ କୌଣସି ସ୍ଥାନରେ କେହି ଗୁଜବ କରୁଛି ତେବେ ତତ୍କ୍ଷଣାତ ପୋଲିସଙ୍କୁ ସୂଚନା ଦେବାକୁ ଆଇଆଇଆସି କହିଥିଲେ। ସମସ୍ତେ ଭାଇଚାରାରେ ଚଳିବା ଆମର ମୂଳ ଲକ୍ଷ୍ୟ। ଅଞ୍ଚଳର ବିକାଶ ହେବା ନେଇ ଗୁରୁତ୍ୱ ଦେବାକୁ ବିଡିଓ କହିଥିଲେ। ପୋଲିସ ଓ ସ୍ଥାନୀୟ ପ୍ରଶାସନ ସଦାବେଳେ ଲୋକଙ୍କ ସହ ଅଛନ୍ତି। ତେଣୁ ଭୟ ନ କରିବାକୁ କୁହାଯିବା ସହ ଗୁଜବଠାରୁ ଦୂରରେ ରହିବାକୁ ଓ ଭିଟାମାଟି ନ ଛାଡ଼ିବାକୁ ନିବେଦନ କରିଛି ପ୍ରଶାସନ। ପ୍ରଶାସନର ଏଭଳି ବୈଠକକୁ ନେଇ ଉପସ୍ଥିତ ଲୋକ ସନ୍ତୋଷ ଲାଭ କରିଥିବା କହିଛନ୍ତି। ବୈଠକରେ ତିଆଡ଼ି ନାୟକ, ସୁନୀଲ ପ୍ରଧାନ, ସନାତନ ପ୍ରଧାନ, ବିଦ୍ୟାଧର ମଲିକ,ପ୍ରଭାକର ସାହୁ, ମିଟୁ ସାହୁ, ଶ୍ୟାମଘନ ପ୍ରଧାନ,କାଳୀପ୍ରସାଦ ମଲିକ, ସାରଦା ବଳିୟାରସିଂ,ପରମେଶ୍ୱର ପ୍ରଧାନ, ଭି୍ୟୁତମ ଶୋଭାସୁନ୍ଦର, ପ୍ରକାଶ ପ୍ରଧାନ, ବଡ଼ କୁନା ଖାନ୍ଙ୍କ ସମେତ ବିଭିନ୍ନ ସମ୍ପ୍ରଦାୟର ବ୍ୟକ୍ତିବିଶେଷ ଯୋଗଦେଇ ନିଜ ମତ ପ୍ରକାଶ କରିଥିଲେ।
