ଭୁବନେଶ୍ୱର,୯।୯(ବ୍ୟୁରୋ): ଜମି କିଣାଇଦେବା ନାଁରେ ୧୭ ଲକ୍ଷରୁ ଅଧିକ ଟଙ୍କା ଠକେଇ କରିବା ଅଭିଯୋଗରେ ଚନ୍ଦ୍ରଶେଖରପୁର ଥାନା ପୋଲିସ ଜଣେ ଦଲାଲଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି। ସେ ହେଲେ ପଶ୍ଚିମବଙ୍ଗରେ ରହୁଥିବା କଟକ ଜିଲା ମାହାଙ୍ଗା ଥାନା ଅଞ୍ଚଳର ନଳିନୀକାନ୍ତ ବରାଳ। ୧୧ ମାସ ପରେ ଫେରାର ଥିବା ଅଭିଯୁକ୍ତ ନଳିନୀଙ୍କୁ ଧରିବାରେ ସଫଳ ହୋଇଛି ପୋଲିସ। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ପୋଲିସ ସୂଚନା ଅନୁଯାୟୀ, ଗତବର୍ଷ ସୌମିତ୍ର ପଟ୍ଟନାୟକ ଭୁବନେଶ୍ୱରରେ ଜମି କିଣିବା ସନ୍ଧାନରେ ଥିଲେ। ସୌମିତ୍ରଙ୍କ ଜଣେ ସହଯୋଗୀ ଜମି କିଣିବା ଲାଗି ନଳିନୀକାନ୍ତଙ୍କ ସହ ପରିଚିତ କରାଇଥିଲେ। ଯୋଜନା ମୁତାବକ ନଳିନୀ ତାଙ୍କ ଶ୍ୱଶୁରଙ୍କ ନାମରେ ଥିବା ଏକ ଜମିକୁ କିଣିବାକୁ ସୌମିତ୍ରଙ୍କୁ କହିଥିଲେ। ଏଥିପାଇଁ ୨୫ ଲକ୍ଷ ଟଙ୍କାରେ ଜମିର ମୂଲ୍ୟକୁ ଧାର୍ଯ୍ୟ କରାଇଥିଲେ। ଉଭୟଙ୍କ କଥାରେ ବିଶ୍ୱାସ ରଖି ସୌମିତ୍ର ତାଙ୍କୁ ୧୯ ଲକ୍ଷ ଆକାଉଣ୍ଟ ମାଧ୍ୟମରେ ଓ ୩ ଲକ୍ଷ କ୍ୟାଶ ଆକାରରେ ଦେଇଥିଲେ । ହେଲେ ଟଙ୍କା ନେବା ପରେ କୌଣସି ଜମି ଦେଇ ନ ଥିଲେ। ଟଙ୍କା ଫେରସ୍ତ କରିବାକୁ କହିବାରୁ ଅଭିଯୁକ୍ତ ଓ ସହଯୋଗୀ ବ୍ୟକ୍ତି ସୌମିତ୍ରଙ୍କୁ ୫ ଲକ୍ଷ ଟଙ୍କା ଫେରସ୍ତ କରିଥିଲେ। ବାକି ଟଙ୍କା ପରେ ଦେବାକୁ କହିଥିଲେ। କିନ୍ତୁ ପରବର୍ତ୍ତୀ ସମୟରେ ଆଉ ଫେରାଇ ନ ଥିଲେ। ଠକେଇର ଶିକାର ହେବା ଜାଣିବା ପରେ ସୌମିତ୍ର ଚନ୍ଦ୍ରଶେଖରପୁର ଥାନା ଦ୍ୱାରସ୍ଥ ହୋଇଥିଲେ। ଏ ନେଇ ପୋଲିସ ଏକ ମାମଲା (ନଂ. ୩୨୫/୨୧) ରୁଜୁ କରି ତଦନ୍ତ ଚଳାଇଥିଲା। ଅଭିଯୋଗକ୍ରମେ ପୋଲିସ ଚନ୍ଦ୍ରଶେଖରପୁରରେ ରହୁଥିବା ଭଡାଘରେ ଚଢାଉ କରିଥିଲେ ମଧ୍ୟ ଅଭିଯୁକ୍ତ ନଳିନୀ ସ୍ତ୍ରୀ ପିଲାଙ୍କୁ ନେଇ ପଶ୍ଚିମବଙ୍ଗ ପଳାଇଥିଲେ। ବୁଧବାର କୌଣସି କାମରେ ଭୁବନେଶ୍ୱର ଆସିଥିବା ବିଶେଷ ସୂତ୍ରରୁ ଖବରପାଇ ପୋଲିସ ନଳିନୀଙ୍କୁ କାବୁ କରିଥିଲା। ଘଟଣାରେ ସମ୍ପୃକ୍ତ ଥିବା ଜଣେ ଓକିଲ ଫେରାର ଅଛନ୍ତି। ସେହିଭଳି ଅଭିଯୁକ୍ତ ନଳିନୀ ୨୦୧୬ରେ ମଧ୍ୟ ଜଣଙ୍କୁ ଜମି ଦେବାକୁ କହି ଟଙ୍କା ଠକେଇ ଅଭିଯୋଗରେ ଗିରଫ ହୋଇଥିଲେ।
