ଭୁବନେଶ୍ୱର,୧୭ା୧୧(ତ୍ରିନାଥ ମହାନ୍ତି):ଆତଙ୍କବାଦୀଙ୍କ ଦିଲ୍ଲୀ ବିସ୍ଫୋରଣ ପରେ ଓଡ଼ିଶା ହାଇଆଲର୍ଟରେ ରହିଛି। ପୁରୀ, ଭୁବନେଶ୍ୱର, କଟକ, ପାରାଦୀପ, ବାଲେଶ୍ୱର, ସମ୍ବଲପୁର, ରାଉରକେଲା ଭଳି ବଡ଼ ସହର ସମେତ ରାଜ୍ୟର ବିଭିନ୍ନ ସମ୍ବେଦନଶୀଳ ସ୍ଥାନ, ଉପକୂଳ ତଥା ସମୁଦ୍ରାଞ୍ଚଳରେ ସୁରକ୍ଷା ବଢାଇ ଦିଆଯାଇଛି। ଦିଲ୍ଲୀ ଘଟଣାରେ ଓଡ଼ିଶା ଲିଙ୍କ୍ ରହିଥିବା ଚର୍ଚ୍ଚା ହେଉଥିବାରୁ ଏଠାରେ ଆତଙ୍କୀ ଲୁଚିଥିବା ସନ୍ଦେହରେ ଚେକିଂ ଓ ବ୍ଲକିଂ ଜାରି ରହିଛି। ଅନ୍ୟପକ୍ଷରେ ପୂର୍ବରୁ ଆତଙ୍କବାଦୀ ଲିଙ୍କ୍ରେ ଓଡ଼ିଶାରୁ ଅନେକ ଦେଶଦ୍ରୋହୀଙ୍କୁ ଗିରଫ କରାଯାଇଛି। ଏଥିସହ ବହୁ ଆତଙ୍କୀ ସଂଗଠନକୁ ଠାବ କରାଯାଇଛି।
୨୦୧୫ ଜାନୁଆରୀ ୨୩ରେ ଚାନ୍ଦିପୁରସ୍ଥିତ ସାମରିକ ଗବେଷଣା ଓ ବିକାଶ ସଂସ୍ଥା (ଡିଆର୍ଡିଓ) ଏବଂ କ୍ଷେପଣାସ୍ତ୍ର ଘାଟିର ଗୁପ୍ତ ତଥ୍ୟ ପାକିସ୍ତାନକୁ ଦେଇ ଈଶ୍ୱରଚନ୍ଦ୍ର ବେହେରା ଗିରଫ ହୋଇଥିଲେ। ସେ ଡିଆର୍ଡିଓ ଚାରିପଟେ ବୁଲି କ୍ୟାମେରାରେ ଫଟୋ ଉଠାଇ ପାକିସ୍ତାନକୁ ପଠାଇଥିଲେ। ୨୦୧୫ ଡିସେମ୍ବରରେ କଟକ ସାଲେପୁର ପଶ୍ଚିମକଚ୍ଛ ଗଁାରୁ ଗିରଫ ହୋଇଥିଲେ ଅବଦୁର ରହମନ। ଆତଙ୍କବାଦୀ କାର୍ଯ୍ୟ କଳାପରେ ସାମିଲହେବା ନେଇ ତାଙ୍କ ନାମରେ ଅଭିଯୋଗ ଥିଲା। ସେ ଯୁବକମାନଙ୍କୁ ପାଠ ପଢାଇବା ବାହାନାରେ ଆତଙ୍କବାଦୀ କାର୍ଯ୍ୟ କରିବାକୁ ପ୍ରୋତ୍ସାହିତ କରୁଥିଲେ। ଶେଷରେ ତାଙ୍କୁ ଦିଲ୍ଲୀ ପୋଲିସ ଗିରଫ କରିଥିଲା। ୨୦୧୬ ଜାନୁଆରୀ ୧୭ରେ ରାଉରକେଲାରୁ ୫ ସିମି (ଷ୍ଟୁଡେଣ୍ଟ୍ସ ଇସ୍ଲାମିକ୍ ମୁଭ୍ମେଣ୍ଟ୍ସ ଅଫ୍ ଇଣ୍ଡିଆ) ଆତଙ୍କବାଦୀଙ୍କୁ ଗିରଫ କରାଯାଇଥିଲା। ସେମାନେ ମଧ୍ୟପ୍ରଦେଶ ଜେଲରୁ ଫେରାର ହୋଇ ଓଡ଼ିଶାରେ ଲୁଚି ରହିବା ସହ ତେଲଙ୍ଗାନା ପାଇଁ ଆତଙ୍କବାଦୀ କାର୍ଯ୍ୟ ଚଳାଇଥିଲେ। ଓଡ଼ିଶା ଏବଂ ତେଲଙ୍ଗାନା ପୋଲିସ ପକ୍ଷରୁ ମିଳିତ ଅପରେଶନ୍ କରାଯାଇ ସେମାନଙ୍କୁ ଗିରଫ କରାଯାଇଥିଲା। ସେହିପରି ପାକିସ୍ତାନ ସୁନ୍ଦରୀ ଜାଲରେ ପଡ଼ି ଚାନ୍ଦିପୁର ଡିଆର୍ଡିଓର ୪ଜଣ କର୍ମଚାରୀ ହନିଟ୍ରାପ୍ରେ ଫସିଥିଲେ। ଯୁବତୀ ଜଣକ ଆଇଏସ୍ଆଇ ଏଜେଣ୍ଟ ହୋଇଥିବା ବେଳେ ସେ ଏହି ୪ କର୍ମଚାରୀଙ୍କ ଦ୍ୱାରା ଗୁପ୍ତ ତଥ୍ୟ ନେଇ ପାକିସ୍ତାନକୁ ଦେଉଥିଲେ। ଏହା ଜଣାପଡ଼ିବା ପରେ ୨୦୨୧ ସେପ୍ଟେମ୍ବର ୧୫ରେ ସମ୍ପୃକ୍ତ ୪ଜଣଙ୍କୁ କ୍ରାଇମ୍ବ୍ରାଞ୍ଚ ଗିରଫ କରିବା ସହ ତଦନ୍ତ କରିଥିଲା। ୨୦୨୩ ଡିସେମ୍ବରରେ ସୟଦ ଇଶାନ ବୁଖାରୀଙ୍କୁ ଗିରଫ କରାଯାଇଥିଲା। ସେ ୫ ବର୍ଷ ହେବ ଓଡ଼ିଶାରେ ରହି ଆତଙ୍କବାଦୀ କାର୍ଯ୍ୟକଳାପରେ ଲିପ୍ତ ରହିଥିବା ଅଭିଯୋଗ ଥିଲା। ତାଙ୍କ ଘର କଶ୍ମୀର ହୋଇଥିବା ବେଳେ ସେ ମିଛକଥା କହି ଯାଜପୁରର ଜଣେ ଯୁବତୀଙ୍କୁ ବିବାହ କରିଥିଲେ। ସେ ନିଜକୁ କେତେବେଳେ ଡାକ୍ତର ତ ଆଉ କେତେବେଳେ ଏନ୍ଆଇଏ ଅଧିକାରୀ ଓ ସିବିଆଇ ଅଧିକାରୀ ବୋଲି ପରିଚୟ ଦେଉଥିଲ। ଆହୁରି ମଧ୍ୟ ଏକାଧିକ ଯୁବତୀଙ୍କୁ ମିଛ କଥା କହି ବିବାହ କରି ଟଙ୍କା ଲୁଟିବା ସହ ସେମାନଙ୍କ ମାଧ୍ୟମରେ ଗୁପ୍ତ ତଥ୍ୟ ସଂଗ୍ରହ କରି ପାକିସ୍ତାନକୁ ଦେଉଥିଲେ। ୨୦୨୩ ଜୁନ୍ରେ ଏସ୍ଟିଏଫ ୪ଜଣଙ୍କୁ ବାଲେଶ୍ୱରରୁ ଗିରଫ କରିଥିଲା। ସେମାନେ ପାକିସ୍ତାନ ଆଇଏସ୍ଆଇକୁ ସିମ୍ କାର୍ଡ ଓଟିପି ବିକ୍ରି କରୁଥିଲେ। ଆତଙ୍କବାଦୀମାନେ ଓଡ଼ିଶାରୁ ଓଟିପି ନେଇ ଦେଶବିରୋଧୀ କାର୍ଯ୍ୟ କରିବା ସହ ସୋସିଆଲ ମିଡିଆରେ ଦେଶବିରୋଧୀ ତଥ୍ୟ ଦେଉଥିଲେ। ଏହି ଓଟିପି ମାଧ୍ୟମରେ ଏକାଧିକ ବେନାମୀ ଆକାଉଣ୍ଟ ଖୋଲାଯାଇ ତାହା ଜରିଆରେ ପାକିସ୍ତାନରୁ ଟଙ୍କା ଆତଙ୍କବାଦୀଙ୍କ ପାଖକୁ ଆସୁଥିଲା। ନିକଟରେ ହରିୟାଣାରୁ ଗିରଫ ହୋଇଥିବା ଜଣେ ବ୍ଲଗର ପାକିସ୍ତାନୀ ଗୋଇନ୍ଦା ସଂସ୍ଥା ଆଇଏସ୍ଆଇ ଲିଙ୍କ୍ରେ ରହିଥିଲେ। ସେ ଏକାଧିକଥର ପୁରୀ ଆସିବା ସହ ନିଜକୁ ବ୍ଲଗର ପରିଚୟ ଦେଇ ଏଠାକାର ଜଣେ ଯୁବତୀଙ୍କ ସହ ବନ୍ଧୁତା କରିଥିଲେ। ସେମାନେ ପୁରୀ ଏବଂ ଓଡ଼ିଶାର ଏକାଧିକ ଐତିହ୍ୟ ସ୍ଥାନର ଗୁପ୍ତ ତଥ୍ୟ ଆଇଏସ୍ଆଇକୁ ପଠାଇଥିବା ସନ୍ଦେହ କରାଯାଇଥିଲା। ଏନେଇ ପୋଲିସ ଓ ଏନ୍ଆଇଏ ଉକ୍ତ ଯୁବତୀଙ୍କୁ ମଧ୍ୟ ଆତଙ୍କବାଦୀଙ୍କ ଲିଙ୍କ୍ ନେଇ ତଦନ୍ତ ପରିସରଭୁକ୍ତ କରିଥିଲା।
ଏ ସମ୍ପର୍କରେ ରାଜ୍ୟ ପୋଲିସ ବିଭାଗର ଲ’ ଆଣ୍ଡ୍ ଅର୍ଡର ଏଡିଜି ସଞ୍ଜର କୁମାର କହିଛନ୍ତି, ଓଡ଼ିଶାରୁ ବିଗତ ଦିନରେ ଆତଙ୍କବାଦୀ ଲିଙ୍କ୍ରେ ରହିଥିବା ବ୍ୟକ୍ତିଙ୍କୁ ଗିରଫ ପରେ ପୋଲିସ ଅଧିକ ସକ୍ରିୟ ରହିଛି। କିଛି ଭୟ କରିବାର ନାହିଁ। ଓଡ଼ିଶା ପୋଲିସ ସର୍ବଦା ଦିଲ୍ଲୀ ଏନ୍ଆଇଏ ଏବଂ ଆଇବି ସହ ଯୋଗାଯୋଗରେ ରହିଛି। ସେଭଳି କିଛି ଆତଙ୍କବାଦୀ କାର୍ଯ୍ୟକଳାପ ନେଇ ସୂଚନା ମିଳିଲେ ତୁରନ୍ତ ପଦକ୍ଷେପ ନିଆଯିବ। ଏବେ ରାଜ୍ୟ ଗୋଇନ୍ଦା ଏବଂ ଖବରୀ(ସୂଚନାଦାତା)ଙ୍କୁ ଅଧିକ ସକ୍ରିୟ କରାଯାଇଛି। ଦେଶବିରୋଧୀ କାର୍ଯ୍ୟକଳାପରେ କେହି ସମ୍ପୃକ୍ତ ଥିଲେ ତୁରନ୍ତ ଧରାଯିବ ବୋଲି ସେ କହିଛନ୍ତି।
Dharitri – Odisha’s No.1 Odia Daily
