ଶ୍ରୀନଗର,୨୯।୧୧: ଜମ୍ମୁ-କଶ୍ମୀରରେ ଆତଙ୍କବାଦୀ କାର୍ଯ୍ୟକଳାପ ବିରୋଧରେ ମିଳିତ ସୁରକ୍ଷା ବାହିନୀଙ୍କ ପକ୍ଷରୁ ଯୋଜନାବଦ୍ଧ ଭାବେ ଅପରେଶନ୍ ଅଲ୍ଆଉଟ୍ ଅଭିଯାନ ଜାରି ରହିଛି। ଏପରିସ୍ଥଳେ ପୂର୍ବତନ ମୁଖ୍ୟମନ୍ତ୍ରୀ ତଥା ନ୍ୟାଶନାଲ କନଫରେନ୍ସର ନେତା ଓମାର ଅବଦୁଲ୍ଲା ଏକ ବିବାଦୀୟ ବିବୃତ୍ତି ଦେଇଛନ୍ତି।
ଅନୁଚ୍ଛେଦ ୩୭୦ ଉପରେ ପ୍ରଶ୍ନ ଉଠାଇ ସେ କହିଛନ୍ତି ଯେ ଆମକୁ କୁହାଯାଇଥିଲା ଯେ ଅଗଷ୍ଟ ୫ ରେ ଏହାକୁ ହଟାଇବା ପରେ କେହି ଆଉ ଆତଙ୍କବାଦ ବାଟରେ ପାଦ ଦେବେ ନାହିଁ। ତେବେ ଆତଙ୍କବାଦୀମାନେ କିଏ? ଓମାର ଅବଦୁଲ୍ଲା କହିଛନ୍ତି ଯେ ଏହି ଆତଙ୍କବାଦୀମାନେ ବାହାରୁ ଆସିନାହାଁନ୍ତି। ସେମାନେ କାଶ୍ମୀରର ଯୁବକ। ଆମ ଶାସନ କାଳରେ ଆତଙ୍କବାଦୀଙ୍କ ଠାରୁ ଆମେ ଯେଉଁ ଅଞ୍ଚଳଗୁଡିକୁ ମୁକ୍ତ ରଖିଥିଲୁ। ଏବେ ସେଠାରେ ପୁଣି ଯୁବବର୍ଗ ହାତରେ ବନ୍ଧୁକ ଧରିଛନ୍ତି।
ଆମ ଶାସନ ସମୟରେ ଆମେ ଶ୍ରୀନଗରରେ ବହୁ ଆତଙ୍କବାଦୀଙ୍କ ବଙ୍କର ଉଡ଼ାଇ ଦେଇଥିଲୁ। ଏହା ପରେ ସେଠାରେ ଆତଙ୍କବାଦୀର କୌଣସି ଚିହ୍ନ ନ ଥିଲା। ଏବେ ଶ୍ରୀନଗରର କୌଣସି ଅଞ୍ଚଳରେ ଲୋକେ ନିଜକୁ ସୁରକ୍ଷିତ ମଣୁ ନାହାନ୍ତି।
କୁପୱାରା ଠାରୁ ଟର୍ନାଲ ପର୍ଯ୍ୟନ୍ତ ଯେଉଁ ଅଞ୍ଚଳ ଆତଙ୍କବାଦୀ ମୁକ୍ତ ହୋଇଥିଲା ଏବେ ସେଠାରେ ପୁଣି ଆତଙ୍କବାଦର ଚେର ଲମ୍ବିବାରେ ଲାଗିଛି। କଶ୍ମୀର ସ୍ଥାନୀୟ ଯୁବବର୍ଗ କ୍ରୋଧ ଏବଂ ବିଭିନ୍ନ କାରଣରୁ ଅସ୍ତ୍ର ଉଠାଇବାକୁ ବାଧ୍ୟ ହେଉଛନ୍ତି ବୋଲି ଓମାର କହିଛନ୍ତି। ।
ଓମାର ଅବଦୁଲ୍ଲା କହିଛନ୍ତି ଯେ ଅନୁଚ୍ଛେଦ ୩୭୦ ରଦ୍ଦ ହେବା ପରେ କୁହାଯାଇଥିଲା ଯେ ଅମ୍ବାନୀ ଟାଟା ଏବଂ ବିର୍ଲା ଜମ୍ମୁ-କଶ୍ମୀରରେ ପୁଞ୍ଜି ନିବେଶ କରିବେ ଏବଂ ଅନେକ ନିଯୁକ୍ତି ସୁଯୋଗ ସୃଷ୍ଟି ହେବ। ମାତ୍ର ଏଭଳି କିଛି ବିି ହେଲା ନାହିଁ। ଏଠାରେ ଚାଲିଥିବା ପ୍ରକଳ୍ପଗୁଡିକରେ ମଧ୍ୟ ସ୍ଥାନୀୟ ଲୋକ ନିଯୁକ୍ତି ପାଇନାହାଁନ୍ତି ବୋଲି ସେ କହିଛନ୍ତି।
