ଶ୍ରୀନଗର,୨୭ ।୮: ଉତ୍ତର କଶ୍ମୀରର ସୋପୋରରେ ଶୁକ୍ରବାର ଲସ୍କର-ଏ-ତୋଏବାର ୩ ଓଭର ଗ୍ରାଉଣ୍ଡ ୱାର୍କରଙ୍କୁ ସୁରକ୍ଷା କର୍ମୀ ଗିରଫ କରିଛନ୍ତି । ସେମାନଙ୍କ ନିକଟରୁ ୩ ହ୍ୟାଣ୍ଡ ଗ୍ରେନେଡ, ୯ ପୋଷ୍ଟର ଓ ୧୨ ପାକିସ୍ତାନୀ ପତାକା ଜବତ କରାଯାଇଛି । ପଚରା ଉଚରା ସମୟରେ ସେମାନେ କହିଛନ୍ତି ସେମାନଙ୍କର ସୁରକ୍ଷା କର୍ମୀ ଓ ବାହାର ଶ୍ରମିକଙ୍କ ଉପରେ ଆକ୍ରମଣ କରିବା ଯୋଜନାରେ ଥିଲେ ।
ପୋଲିସର ସୂଚନା ଅନୁଯାୟୀ, ସେନା ଓ ସିଆରପିଏଫ ସହ ମିଶି ବୋମଇ ଚୌକରେ ନାକା ଲଗାଯାଇଥିଲା । ଏହି ସମୟରେ ଚେକିଂରେ ଗୋରିପୋରାରୁ ବୋମଇ ଆସୁଥିବା ୩ ଜଣଙ୍କ ଉପରେ ସନ୍ଦେହ ହୋଇଥିଲା । ସେମାନଙ୍କୁ ଅଟକାଇବାରୁ ସେମାନେ ପଳାଇ ଯିବାକୁ ଚେଷ୍ଟା କରିଥିଲେ, ହେଲେ ସେମାନଙ୍କୁ କାବୁ କରି ନିଆଯାଇଥିଲା । ପରେ ଜଣାପଡିଥିଲା କି ଏମାନେ ସମସ୍ତେ ଆତଙ୍କବାଦୀଙ୍କ ସହଯୋଗୀ ।
