ଏହା ନିଃସନ୍ଦେହ ଯେ, ଆତଙ୍କବାଦ ସମଗ୍ର ବିଶ୍ୱପାଇଁ ବିପଦ ସୃଷ୍ଟି କରିଛି। ବିଶ୍ୱରେ ଊଣା ଅଧିକେ ପ୍ରାୟ ସମସ୍ତ ଦେଶ ଏହାର ଶିକାର ହେଉଛନ୍ତି। ନିକଟରେ ଗ୍ଲୋବାଲ ଟେରରିଜମ୍ ଇଣ୍ଡେକ୍ସ ୨୦୨୫ ରିପୋର୍ଟରେ ପ୍ରକାଶ ପାଇଛି। ଏଥିରେ ବିଶ୍ୱର ୯୯.୭ ପ୍ରତିଶତ ଲୋକସଂଖ୍ୟା ଥିବା ୧୬୩ଟି ରାଷ୍ଟ୍ରକୁ ନେଇ ସର୍ଭେ କରାଯାଇଥିଲା। ରିପୋର୍ଟରେ ବୁର୍କିନା ଫାସୋ ଆତଙ୍କବାଦ ପ୍ରଭାବିତ ଦେଶ ତାଲିକାରେ ପ୍ରଥମ ସ୍ଥାନରେ ଥିବାବେଳେ ପାକିସ୍ତାନ ଦ୍ୱିତୀୟ, ସିରିଆ ତୃତୀୟ ମାଲି ଚତୁର୍ଥ, ନିଗେର ପଞ୍ଚମ, ନାଇଜେରିଆ ଷଷ୍ଠ ସ୍ଥାନରେ ଏବଂ ଭାରତ ଚତୁର୍ଦ୍ଦଶ ସ୍ଥାନରେ ରହିଛି। ସେହିପରି ଭାରତର ଅନ୍ୟତମ ପଡ଼ୋଶୀ ରାଷ୍ଟ୍ର ଆଫଗାନିସ୍ତାନ ନବମ ସ୍ଥାନରେ ଅଛି। କହିବା ବାହୁଲ୍ୟ ଯେ, ଭାରତର ପଡ଼ୋଶୀ ପାକିସ୍ତାନ ୨୦୨୪ ରିପୋର୍ଟରେ ତାଲିକାର ଚତୁର୍ଥ ସ୍ଥାନରେ ଥିବାବେଳେ ଚଳିତଥର ଆଉ ଦୁଇଟି ସ୍ଥାନ ଉପରକୁ ଉଠି ଦ୍ୱିତୀୟ ସ୍ଥାନରେ ରହିଛି। ଏହା ପାକିସ୍ତାନରେ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧି ପାଇଥିବା ସ୍ପଷ୍ଟ ସଙ୍କେତ ପ୍ରଦାନ କରେ। ପାକିସ୍ତାନର ତେହେରିକ-ଇ-ତାଲିବାନ୍ ପାକିସ୍ତାନ (ଟିଟିପି), ବେଲୁଚି ଲିବରେଶନ ଆର୍ମି (ବିଏଲ୍ଏ), ଲସ୍କର-ଇ-ତୋଇବା (ଏଲ୍ଇଟି) ସମେତ ବହୁ ଆତଙ୍କବାଦୀ ଗୋଷ୍ଠୀ ସକ୍ରିୟ ଅଛନ୍ତି। ଉଲ୍ଲେଖଯୋଗ୍ୟ ଯେ, ୨୦୨୩ରେ ପାକିସ୍ତାନରେ ଯେତିକି ଆତଙ୍କବାଦୀ ଆକ୍ରମଣ ଘଟଣା ଘଟିଥିଲା, ୨୦୨୪ରେ ତାହାଠାରୁ ଅଧିକ ୪୫ପ୍ରତିଶତ ଘଟଣା ବୃଦ୍ଧି ପାଇଥିବା ରିପୋର୍ଟରେ କୁହାଯାଇଛି। ୨୦୨୩ରେ ୫୧୭ଟି ଆତଙ୍କବାଦୀ ଆକ୍ରମଣ ହୋଇଥିବାବେଳେ ଏହି ସଂଖ୍ୟା ୧୦୯୯କୁ ବୃଦ୍ଧି ପାଇଥିଲା। ପାକିସ୍ତାନରେ ବିଭିନ୍ନ ଆତଙ୍କବାଦୀ ସଂଗଠନ ସକ୍ରିୟ ଥିବାବେଳେ ଟିଟିପି ସବୁଠାରୁ ଅଧିକ ଘାତକ ସଂଗଠନ ଭାବେ ଉଭାହୋଇଛି। ୨୦୨୪ରେ ପାକିସ୍ତାନରେ ଆତଙ୍କବାଦୀ ଆକ୍ରମଣରେ ଯେତେ ସଂଖ୍ୟକ ବ୍ୟକ୍ତି ପ୍ରାଣ ହରାଇଥିଲେ ସେଥିମଧ୍ୟରୁ ୫୨ପ୍ରତିଶତ ମୃତ୍ୟୁ ଟିଟିପି ଦ୍ୱାରା ହୋଇଥିଲା।
ଏଇ ନିକଟରେ ପାକିସ୍ତାନର ବେଲୁଚିସ୍ଥାନରେ ବିଏଲ୍ଏ ଆତଙ୍କବାଦୀ ସଂଗଠନ ଦ୍ୱାରା ଏକ ଯାତ୍ରୀବାହୀ ଟ୍ରେନ୍କୁ ଅପହରଣ କରି ଯାତ୍ରୀମାନଙ୍କୁ ପଣବନ୍ଦୀ ରଖିବା ଘଟଣା ସମଗ୍ର ବିଶ୍ୱରେ ଚହଳ ସୃଷ୍ଟି କରିଥିଲା। ଏଥିରେ ୩୦ ଆତଙ୍କବାଦୀଙ୍କ ମୃତ୍ୟୁ ଘଟିଥିବା ସହ ଅନେକ ସେନା କର୍ମଚାରୀ ଓ ପଣବନ୍ଦୀଙ୍କ ମୃତ୍ୟୁ ହୋଇଥିବା କୁହାଯାଇଛି। ସେହିପରି ୨୦୨୩ରେ ବିଶ୍ୱରେ ଯେତିକି ଲୋକଙ୍କ ଆତଙ୍କବାଦୀଙ୍କ ଆକ୍ରମଣରେ ମୃତ୍ୟୁ ଘଟିଥିଲା, ୨୦୨୪ରେ ତା’ଠାରୁ ଅଧିକ ୧୧ପ୍ରତିଶତ ମୃତ୍ୟୁ ଘଟିଥିଲା। ତେବେ ପାକିସ୍ତାନଠାରୁ ଅଧିକ ସଂଖ୍ୟକ ଆତଙ୍କବାଦୀ ଆକ୍ରମଣ ଘଟଣା ବୁର୍କିନା ଫାସୋରେ ଘଟିଛି। ଯେଉଁଠାରେ ଇସ୍ଲାମିକ୍ ଷ୍ଟେଟ ମୃତ୍ୟୁ ଏବଂ ଆତଙ୍କର ତାଣ୍ଡବ ରଚିଛି। ଏହା ନିଃସନ୍ଦେହ ଯେ, ଇସ୍ଲାମିକ୍ ଷ୍ଟେଟ(ଆଇଏସ୍) ବିଶ୍ୱର ସବୁଠାରୁ ବିପଜ୍ଜନକ ଆତଙ୍କବାଦୀ ସଂଗଠନ ବୋଲି ରିପୋର୍ଟରେ ଦର୍ଶାଯାଇଛି। ରିପୋର୍ଟରେ ଆତଙ୍କବାଦ ଘଟଣା, ମୃତ୍ୟୁ, ଆହତଙ୍କ ସଂଖ୍ୟା ଏବଂ ପଣବନ୍ଦୀ ଆଦି ଚାରୋଟି ସୂଚନାକୁ ନେଇ ଗୋବ୍ଲାଲ ଟେରରିଜମ୍ ଇଣ୍ଡେକ୍ସ (ଜିଟିଆଇ) ପ୍ରସ୍ତୁତ କରାଯାଇଛି। ଏଥିରେ ଆତଙ୍କବାଦ ଏବେ କେବଳ ଗୋଟିଏ ଦୁଇଟି ଦେଶ ପାଇଁ ନୁହେଁ, ସମଗ୍ର ବିଶ୍ୱ ପାଇଁ ଗୁରୁଧମକ ସୃଷ୍ଟି କରିଛି ବୋଲି କୁହାଯାଇଛି।
ଆମ ଦେଶରେ ଆତଙ୍କବାଦ ଆଶାତୀତ ଭାବେ ହ୍ରାସ ପାଇଛି। ଏହା ସତ୍ୟ ଯେ, ପାକିସ୍ତାନ ପ୍ରାୟୋଜିତ ଆତଙ୍କବାଦ ହ୍ରାସ ପାଇଛି। ଏହା ସତ୍ୟ ଯେ, ପାକିସ୍ତାନ ପ୍ରାୟୋଜିତ ଆତଙ୍କବାଦ ନବେ ଦଶକରୁ ଭାରତରେ ଧ୍ୱଂସ ଓ ମୃତ୍ୟୁର ତାଣ୍ଡବ ସୃଷ୍ଟି କରିଥିଲା। ପାକିସ୍ତାନ ଭାରତ ବିରୋଧରେ ଆତଙ୍କବାଦ ଜରିଆରେ ଛାୟାଯୁଦ୍ଧ ଚଳାଇଥିଲା। ମାତ୍ର ପରିସ୍ଥିତି ଏବେ ବଦଳି ଯାଇଛି। ଭାରତର କଠୋର କାର୍ଯ୍ୟାନୁଷ୍ଠାନ ବିଶେଷ କରି ପାକସ୍ତାନ ଅଧିକୃତ କଶ୍ମୀର (ପିଓକେ)ରେ ଆତଙ୍କବାଦୀଙ୍କ ଆଡ୍ଡା ଉପରେ ସେନାର ସର୍ଜିକାଲ ଷ୍ଟା୍ରଇକ ପରେ ଦେଶରେ ଆତଙ୍କବାଦୀଙ୍କ କାର୍ଯ୍ୟକଳାପ ହ୍ରାସ ପାଇଛି। କିନ୍ତୁ ସମ୍ପୂର୍ଣ୍ଣ ଭାବେ ଥମି ନାହିଁ। ପାକିସ୍ତାନରେ ଏବେ ଯେଭଳି ଆତଙ୍କବାଦୀଙ୍କ ହିଂସାକାଣ୍ଡ ଘଟୁଛି, ତାହା ତୁଳନାରେ ଭାରତରେ ଆତଙ୍କବାଦୀଙ୍କ କାର୍ଯ୍ୟକଳାପ କିଛି ନୁହେଁ ବୋଲି କହିଲେ ଅତିରଞ୍ଜିତ ହୋଇ ନ ପାରେ। ତେବେ ଏତିକି କୁହାଯାଇପାରେ ଯିଏ ଅନ୍ୟପାଇଁ ଗାତ ଖୋଳେ ସିଏ ହିଁ ସେହି ଗାତରେ ପଡ଼େ।
ସୌଭାଗ୍ୟ ରଞ୍ଜନ ମହାନ୍ତି
ଗାଙ୍ଗୋତ୍ରୀ ନଗର, ଶିଶୁପାଳଗଡ଼, ମୋ:୭୯୭୮୬୬୬୪୦୩
