କୋକସରା,୩୧।୫(ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି – ନବରଙ୍ଗପୁର ଜିଲା ସୀମାନ୍ତ ଆମପାଣି ଘାଟିରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି । ୨୬ ନମ୍ବର ଜାତୀୟ ରାଜପଥର ଆମପାଣି ଘାଟି ବିରିମୁହାଣ ଛକ ନିକଟରେ ଶନିବାର ବିଳମ୍ବିତ ରାତିରେ ଏକ ଟ୍ରଲର ଏବଂ କୁକୁଡ଼ା ବୋଝେଇ ପିକଅପ୍ ଭ୍ୟାନ୍ ମଧ୍ୟରେ ସାମ୍ନାସାମ୍ନି ଜୋରଦାର ଧକ୍କା ହୋଇଛି । ଧକ୍କା ଏତେ ଜବରଦସ୍ତ ଥିଲାଯେ ଦୁର୍ଘଟଣା ପରେ ପରେ ଉଭୟ ଗାଡ଼ିରେ ନିଆଁ ଲାଗିଯାଇଥିଲା।
ମଝି ରାସ୍ତାରେ ଦୁଇଟି ଯାକ ଗାଡ଼ି ହୁତୁ ହୁତୁ ହୋଇ ଜଳି ଯାଇଥିଲା। ଏହି କାଳରୂପୀ ଦୁର୍ଘଟଣାରେ ବ୍ୟାପକ କ୍ଷୟକ୍ଷତି ଘଟିଥିଲେ ହେଁ ଏକ ବଡ଼ ଆଶ୍ୱାସନାର କଥା ହେଉଛି ଯେ, ଗାଡ଼ିର ଚାଳକ ଓ ସହଯୋଗୀମାନେ ଅଳ୍ପକେ ବର୍ତ୍ତି ଯାଇଛନ୍ତି ଏବଂ ସମସ୍ତେ ସୁରକ୍ଷିତ ଅଛନ୍ତି । ତେବେ ପିକଅପ୍ ଭ୍ୟାନରେ ଥିବା କୁକୁଡ଼ାଙ୍କ ମଧ୍ୟରୁ କିଛି ମାତ୍ରାରେ କୁକୁଡ଼ା ନିଆଁରେ ପୋଡ଼ି ମରି ଯାଇଥିବା ଜଣାପଡ଼ିଛି । ଘଟଣା ସମ୍ପର୍କରେ ଖବର ପାଇ ଆମପାଣି ଥାନା ପୋଲିସ ଏବଂ କୋକସରା ଅଗ୍ନିଶମ ବିଭାଗର କର୍ମଚାରୀମାନେ ତୁରନ୍ତ ଦୁର୍ଘଟଣା ସ୍ଥଳରେ ପହଞ୍ଚିଥିଲେ ।
ଅଗ୍ନିଶମ ବାହିନୀର କଠିନ ପରିଶ୍ରମ ଓ ତତ୍ପରତା ଯୋଗୁଁ ରାସ୍ତା ଉପରେ ଜଳୁଥିବା ଗାଡ଼ିଗୁଡ଼ିକର ନିଆଁକୁ ସମ୍ପୂର୍ଣ୍ଣ ଆୟତ୍ତ କରାଯାଇଥିଲା। ତେବେ ଦୁର୍ଘଟଣାଟି କେଉଁ ପରିସ୍ଥିତିରେ ଏବଂ କେଉଁ କାରଣରୁ ଘଟିଲା, ସେ ନେଇ ଆମପାଣି ଥାନା ପୋଲିସ ଏକ ମାମଲା ରୁଜୁ କରି ଅଧିକ ତଦନ୍ତ ଜାରି ରଖିଥିବା ସୂଚନା ମିଳିଛି ।
