ଝାରସୁଗୁଡ଼ା,୨ା୩(ଆଶିଷ ରଞ୍ଜନ ଦାଶ): ଝାରସୁଗୁଡା ବିମାନବନ୍ଦର ପରିସର ବାହାରେ ଥିବା କୁଟି ଜଙ୍ଗଲଠାରେ ସୋମବାର କୌଣସି କାରଣରୁ ନିଆଁ ଲାଗି ଯାଇଥିଲା। ଏହାକୁ ଆୟତ୍ତ କରିବା ପାଇଁ ୫ ଟି ଦମକଳ ନିୟୋଜିତ ହୋଇଥିବା ବେଳେ ପ୍ରାୟ ୨ ଘଣ୍ଟା ପରେ ନିଆଁ ଲିଭିଥିଲା।
ସୂଚନାନୁସାରେ, ସୋମବାର ପୂର୍ବାହ୍ନରେ ବିମାନବନ୍ଦର ପରିସର ସମ୍ମୁଖରେ ଥିବା କୁଟି ଜଙ୍ଗଲ ଓ ବୁଦା ଗୁଡିକରେ ନିଆଁ ଲାଗିଯାଇଥିଲା। ଧିରେ ଧିରେ ନିଆଁ ଚାରିଆଡେ ବ୍ୟାପିବାରୁ ଭୟଙ୍କର ରୂପ ଧାରଣ କରିଥିଲା। ଏହା ସହିତ ନିଆଁ ଲାଗିଥିବା ସ୍ଥାନରୁ ଝାରସୁଗୁଡା ବୀର ସୁରେନ୍ଦ୍ର ସାଏ ବିମାନବନ୍ଦର ଅତି ନିକଟରେ ଥିବା ବେଳେ ଇଣ୍ଡିଆନ ଅଏଲ କର୍ପୋରେଶନ ଲିମିଟେଡ୍ର ଡିପୋ ମଧ୍ୟ ଅଳ୍ପ ଦୂରରେ ରହିଥିଲା। ଫଳରେ ଘଟଣାସ୍ଥଳରେ ଝାରସୁଗୁଡା ତହସିଲଦାର ସଦାକର କୁମ୍ଭାର ପହଞ୍ଚି ୨ଟି ଅଗ୍ନିଶମ ବିଭାଗର, ଗୋଟିଏ ବିମାନ ବନ୍ଦରର ଏବଂ ୨ ଟି ବେଦାନ୍ତ କମ୍ପାନୀର ଦମକଳ ଦ୍ୱାରା ପ୍ରାୟ ୨ ଘଣ୍ଟା ଧରି ନିଆଁ ଲିଭାଇବା ଦ୍ୱାରା ନିଆଁ ଲିଭାଇ ପାରିଥିଲେ।
ଝାରସୁଗୁଡା ତହସିଲଦାର ସଦାକର କୁମ୍ଭାର କହିଛନ୍ତି ଯେ, କୌଣସି କାରଣରୁ ନିଆଁ ଲାଗିଥିଲେ ମଧ୍ୟ ଏହା ସଚେତନତାର ଅଭାବ ଅଟେ। ଯଦି ଆଜି ନିଆଁକୁ ରୋକା ଯାଇ ନ ଥିଲେ ବିମାନବନ୍ଦର ଓ ଆଇଓସିଏଲ ପରି ସମ୍ବେଦନଶୀଳ ସ୍ଥାନରେ ବିରାଟ ବିପଦ ସୃଷ୍ଟି ହୋଇଥାନ୍ତା। ଏଣୁ ବାହାରେ ନିଆଁ ବ୍ୟବହାର କଲେ ନିଜେ ସଚେତନ ହୋଇ ନିଆଁ ବ୍ୟବହାର ପରେ ଲିଭାଇ ଦେବା ଉଚିତ ବୋଲି କହିଛନ୍ତି। ଏହା ସହିତ ଏହି ନିଆଁ ଲିଭାଇଥିବା ଦମକଳ ବାହିନୀକୁ ଧନ୍ୟବାଦ ଅର୍ପଣ କରିଛନ୍ତି।
