ବେଙ୍ଗାଲୁରୁ,୨୦।୪: ଦକ୍ଷିଣ ବେଙ୍ଗାଲୁରୁର ଏମପି ତେଜସ୍ବୀ ସୂର୍ଯ୍ୟାଙ୍କ ନାମ କର୍ନାଟକ ବିଧାନସଭା ନିର୍ବାଚନ ୨୦୨୩ର ଭାରତୀୟ ଜନତା ପାର୍ଟି(ଭାଜପା) ଷ୍ଟାର ପ୍ରଚାରକ ତାଲିକାରେ ନାହିଁ। ତେଜସ୍ବୀ ଆରଏସଏସର ସ୍ବୟଂସେବକ ଓ ଭାଜପାର ଯୁବ ମୋର୍ଚ୍ଚା ଅଧ୍ୟକ୍ଷ ରହିଛନ୍ତି। ସେ ତାଙ୍କ ମଜଭୁତ ହିନ୍ଦୁତ୍ୱ ରାଜନୀତି ପାଇଁ ଜଣାଶୁଣା। ତେଜସ୍ବୀ ତ୍ରିପୁରାରେ ଦଳର ଷ୍ଟାର ପ୍ରଚାରକ ବୋଲି କୁହାଯାଏ।
ଏବେ ତେଜସ୍ବୀ ନନ୍ଦିନ ଷ୍ଟୋର ଯାଇଥିବା ରାହୁଲ ଗାନ୍ଧୀଙ୍କୁ ଆଲୋଚନା କରିବା, ସୁଦାନରେ କନ୍ନଡଙ୍କ ସୁରକ୍ଷା ପ୍ରସଙ୍ଗ ଉଠାଇବାକୁ ନେଇ ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କୁ ଟାର୍ଗେଟ କରିବାକୁ ନେଇ ଚର୍ଚ୍ଚାରେ ରହିଛନ୍ତି। ଏଥର ଭାଜପାର ଷ୍ଟାର ପ୍ରଚାରକ ତାଲିକାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ରାଜନାଥ ସିଂ, ଅମିତ ଶାହା, ନିତିନ ଗଡକରି, ହିମନ୍ତ ବିଶ୍ୱା ସରମା, ଦେବେନ୍ଦ୍ର ଫଡନଭିସ, ସ୍ମୃତି ଇରନି, ନିର୍ମଳା ସୀତାରମଣ ରହିଛନ୍ତି।
ଏହାକୁ ନେଇ କଂଗ୍ରେସ ତେଜସ୍ବୀଙ୍କୁ ‘ନଫରତି ଚିଣ୍ଟୁ’ କହିବା ସହ ତାଙ୍କ ରାଜ୍ୟରେ ବି ତାଙ୍କୁ କେହି ପଚାରନ୍ତି ନାହିଁ ବୋଲି କହିଛି। ଆଉ ଏବେ ତାଙ୍କ ପାଇଁ ଉଚ୍ଚା ଘୋଡାରୁ ତଳକୁ ଆସିବାର ସମୟ ଆସିଯାଇଥିବା କଥା କହିଛି କଂଗ୍ରେସ। ସୂଚନାଯୋଗ୍ୟ, ତେଜସ୍ବୀ ସୂର୍ଯ୍ୟା ନିକଟରେ ଏକ ଇଣ୍ଡିଗୋ ଫ୍ଲାଇଟର ଏମରଜେନ୍ସି ଏକଜିଟକୁ ଭୁଲରେ ଖୋଲିଦେଇଥିବା ଘଟଣାରେ ବିବାଦରେ ଫସି ଯାଇଥିଲେ। ଏହି କାରଣରୁ ବିମାନ ଯାତ୍ରୀଙ୍କୁ ବିଳମ୍ବର ସାମ୍ନା କରିବାକୁ ପଡିଥିଲା। ସେ ଇଣ୍ଡିଗୋ ଫ୍ଲାଇଟାରେ ଯାତ୍ରା କରୁଥିଲେ। ଏହି ଘଟଣାର ସପ୍ତାହେ ପରେ ଏ ସମ୍ପର୍କରେ ସୂଚନା ଦିଆଯାଇଥିଲା।
