ବଲାଙ୍ଗୀର/ସଇଁତଳା,୩ା୯(ସୁନିଲ ମହାନ୍ତି, ରାଖାଲ ପ୍ରସାଦ ଶତପଥୀ): ବଲାଙ୍ଗୀର ଜିଲାରେ ବେଆଇନ କ୍ରସର୍ ଚାଲିଥିବା ନେଇ ଦୀର୍ଘଦିନରୁ ଅଭିଯୋଗ ହେଇଆସୁଥିଲା। ସଇଁତଳା ତହସିଲଦାର କୌଣସି ଏକ ସୂତ୍ରରୁ ଖବର ପାଇ ପୋଲିସ ସହାୟତାରେ ସଇଁତଳା ବ୍ଲକ କଅଁସର ପଞ୍ଚାୟତ କେଛୋମୁହାଣ କ୍ରସର ଉପରେ ଚଢ଼ାଉ କରିଥିଲେ l ଦୀର୍ଘ ସମୟ ହେଲା ଏଠାରେ ବେଆଇନ ପଥର ଖନନ ସାଙ୍ଗକୁ ବ୍ଲାଷ୍ଟିଂ ହେଉଥିଲା। ଗାଁ ଲୋକେ ଏ ବିଷୟରେ କେବେ ଅଭିଯୋଗ କରି ନ ଥିଲେ। ସଇଁତଳା ତହସିଲଦାର ଏ ବିଷୟରେ ବିଶ୍ୱସ୍ତ ସୂତ୍ରରୁ ଖବର ପାଇବା ପରେ କ୍ରସର ମାଲିକଙ୍କୁ କାଗଜପତ୍ର ମାଗିଥିଲେ। କୌଣସି କାଗଜପତ୍ର ଦେଖାଇ ନ ପାରିବାରୁ ବଲାଙ୍ଗୀର ମାଇନ୍ସ ବିଭାଗକୁ ଖବର ଦେଇଥିଲେ। ଖବର ପାଇ ମାଇନ୍ସ ବିଭାଗ, ପ୍ରଦୂଷଣ ବିଭାଗ ପହଞ୍ଚି କ୍ରସର ଯାଞ୍ଚ କରିଥିଲେ। ବେଆଇନ ଭାବେ ବିଦ୍ୟୁତ୍ ସଂଯୋଗ କରି କ୍ରସର ଚଳାଉଥିବା ଦେଖିବାକୁ ମିଳିଥିଲା। ଘୁନସର ଅଞ୍ଚଳ ଜଣେ ପଥର ମାଫିଆ ବେଆଇନ ଭାବରେ କ୍ରସର ଚଳାଇ ଆସୁଥିବା ଜଣାପଡ଼ିଥିଲା। ତହସିଲଦାର ଓ ପୋଲିସର ମିଳିତ ଚଢାଉ କରାଯିବା ପରେ ନିକଟସ୍ଥ ଡୁଙ୍ଗୁରିପାଲି ପଥର ଖନନଠାରେ କିଛି ବିସ୍ଫୋରକ ସାମଗ୍ରୀ ମଧ୍ୟ ଜବତ କରିଥିଲେ। ଉକ୍ତ କ୍ରସରକୁ ସିଜ୍ କରାଯିବା ସହ ଏନେଇ ତହସିଲଦାର ତଦନ୍ତ ଆରମ୍ଭ କରିଥିବା ଜଣାପଡ଼ିଛି।
