ନୂଆଦିଲ୍ଲୀ,୨।୩: ଭାରତୀୟ କ୍ରିକେଟ ଦଳରେ ଅନେକ ମହାନ ଖେଳାଳି ଅଛନ୍ତି ଯେଉଁମାନେ ଚୌକା-ଛକା ମାରିବାରେ ସିଦ୍ଧହସ୍ତ। ହେଲେ ଏହି ଦଳରେ ୩ ଜଣ ଏଭଳି ଖେଳାଳି ଅଛନ୍ତି, ଯେଉଁମାନେ ଆଜିଯାଏ ଦିନିକିଆ ଏବଂ ଟି-୨୦ କ୍ରିକେଟରେ ଗୋଟିଏ ବି ଛକା ମାରି ନାହାନ୍ତି। ଆଶ୍ଚର୍ଯ୍ୟ ଲାଗିଲେ ହେଁ କଥାଟି ସତ। ଆସନ୍ତୁ ଜାଣିବା:
୧. କୁଲଦୀପ ଯାଦବ:
ଟିମ ଇଣ୍ଡିଆର ବୋଲର୍ କୁଲଦୀପ ଯାଦବ ଭାରତ ପାଇଁ ଟେଷ୍ଟ, ଦିନିକିଆ ଏବଂ ଟି -୨୦ କ୍ରିକେଟ ଖେଳିଛନ୍ତି। ଟେଷ୍ଟ କ୍ରିକେଟରୁ ଆନ୍ତର୍ଜାତୀୟ ସ୍ତରରେ ଡେବ୍ୟୁ କରିଥିବା କୁଲଦୀପ ଏପର୍ଯ୍ୟନ୍ତ ଗୋଟିଏ ବି ଛକା ମାରି ନାହାନ୍ତି। ସେ ଟେଷ୍ଟରେ ୧୮୫ ବଲର ଖେଳିଥିବା ବେଳେ ଦିନିକିଆରେ ୧୮୮ ଏବଂ ଟି -୨୦ କ୍ରିକେଟ ରେ ୪୮ ବଲ ଖେଳିସାରିଛନ୍ତି। ହେଲେ ଏହି ଖେଳାଳି ଏପର୍ଯ୍ୟନ୍ତ ଛକା ମାରି ନାହାନ୍ତି। ସେ ତିନୋଟି ଫର୍ମାଟରେ ୯୭ ଟି ମ୍ୟାଚ ଖେଳିଛନ୍ତି।
୨. ୟୁଜବେନ୍ଦ୍ର ଚହଲ:
ୟୁଜବେନ୍ଦ୍ର ଚହଲ ୨୦୧୬ରେ ଭାରତ ପାଇଁ ଦିନିକିଆ ଡେବ୍ୟୁ କରିଥିଲେ। ସେବେଠାରୁ ଚହଲ ଗୋଟିଏ ବି ଛକା ମାରିବାକୁ ସକ୍ଷମ ହୋଇନାହାଁନ୍ତି। ସେ ଏପର୍ଯ୍ୟନ୍ତ ଟି -୨୦ କ୍ରିକେଟରେ ୧୧ ବଲ ଖେଳିଛନ୍ତି ଏବଂ ଦିନିକିଆରେ ୯୦ ଟି ବଲ୍ର ସମ୍ମୁଖୀନ ହୋଇଛନ୍ତି। କିନ୍ତୁ ସେଥିରେ ଛକା ନାହିଁ। ସେ ଦିନିକିଆ ଏବଂ ଟି୨୦ରେ ମୋଟ ୧୧୫ ମ୍ୟାଚ୍ ଖେଳିଛନ୍ତି, ଏପର୍ଯ୍ୟନ୍ତ ଟେଷ୍ଟରେ ସୁଯୋଗ ପାଇନାହାନ୍ତି।
୩. ଇଶାନ୍ତ ଶର୍ମା:
ଟି୨୦ ଏବଂ ଦିନିକିଆ କ୍ରିକେଟରେ ଇଶାନ୍ତ ଶର୍ମା ମଧ୍ୟ ଭାରତ ପାଇଁ ଗୋଟିଏ ଛକା ମାରି ନାହାନ୍ତି। ଇଶାନ୍ତ ବର୍ତ୍ତମାନ ଭାରତ ପାଇଁ କେବଳ ଟେଷ୍ଟ ଫର୍ମାଟ ଖେଳୁଛନ୍ତି । ୨୦୦୭ ରେ ଭାରତ ପାଇଁ ଟେଷ୍ଟ ଡେବ୍ୟୁ କରିଥିବା ଏହି ଖେଳାଳି ଏପର୍ଯ୍ୟନ୍ତ ଟେଷ୍ଟ କ୍ରିକେଟରେ ୨୪୦୦ ବଲ୍ ଖେଳିଛନ୍ତି। ଏହାଛଡ଼ା ସେ ତିନୋଟି ଫର୍ମାଟରେ ମୋଟ ୧୯୮ ଟି ଆନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି ।
