ମାଲକାନଗିରି,୮।୧୦(ଡି.ଏନ.ଏ.): ମହିଳାଙ୍କୁ କିପରି ଅଧିକ ସ୍ବାବଲମ୍ବୀ କରାଯିବ ଏବଂ ସେମାନେ ଆତ୍ମନିର୍ଭରଶୀଳ ହୋଇପାରିବେ ସେହି ଲକ୍ଷ୍ୟ ନେଇ ଓଡ଼ିଶା ଜୀବିକା ମିଶନ ଏବଂ ମିଶନ ଶକ୍ତିର ପ୍ରଚେଷ୍ଟାରେ ଉପାନ୍ତ ଅଞ୍ଚଳରେ ପ୍ରତିଷ୍ଠା ହୋଇଛି ଟସର ତାଲିମ କେନ୍ଦ୍ର। ମାଲକାନଗିରି ଜିଲା କାଲିମେଳା ବ୍ଲକ୍ ଅନ୍ତର୍ଗତ ଏମ୍ଭି -୯୦ ଗ୍ରାମସ୍ଥିତ ଦକ୍ଷତା ବିକାଶ କେନ୍ଦ୍ରରେ ହୋଇଥିବା ଟସର ତାଲିମ କେନ୍ଦ୍ରକୁ ଜିଲାପାଳ ବିଶାଲ ସିଂ ଉଦ୍ଘାଟନ କରିଥିଲେ। ଏହି ସମୟରେ ବିଡିଓ ଉମାଶଙ୍କର ଦଳାଇ, କାଲିମେଳା ସରପଞ୍ଚ ପୃଥୀରାଜ ମାଝି, ଓଡ଼ିଶା ଜୀବିକା ମିଶନର ବ୍ଲକ୍ ସଂଯୋଜକ ରତନ ଗୋଲଦାର ଉପସ୍ଥିତ ଥିଲେ। ତାଲିମ କେନ୍ଦ୍ରରେ ୩୦ଟି ମେଶିନ ମାଧ୍ୟମରେ ଟସର କୋଷାରୁ କିପରି ରେଶମ ସୂତା ପ୍ରସ୍ତୁତ କରାଯାଇପାରିବ ସେ ନେଇ ମହିଳାଙ୍କୁ ତାଲିମ ପ୍ରଦାନ କରାଯାଉଛି। କାଲିମେଳା ବ୍ଲକର ବିଭିନ୍ନ ଗ୍ରାମରୁ ୩୦ ଜଣ ସ୍ବୟଂ ସହାୟକ ଗୋଷ୍ଠୀର ମହିଳା ଗତ ୨ ତାରିଖରୁ ତାଲିମ ନେଉଛନ୍ତି। ସେମାନେ ୧ମାସ ଧରି ତାଲିମ ନେବେ ବୋଲି କହିଛନ୍ତି ଓଡ଼ିଶା ଜୀବିକା ମିଶନର ବ୍ଲକ୍ ସଂଯୋଜକ ଗୋଲଦାର। ଛତିଶଗଡ଼ ବିଳାସପୁର ଅଞ୍ଚଳର ଅସ୍ତିବ ମହିଳା ସମିତି ଟସର ତାଲିମ ଦେଉଛି। ଏଥିରେ ସମିତିର ମୁଖ୍ୟ ପୂଜା ବର୍ମା, ମ୍ୟାନେଜର ସଞ୍ଜୀବ କୁମାର, ଟ୍ରେନିଂ ସୁପରଭାଇଜର ରାଜକୁମାର, ଟେକ୍ନିସିଆନ ରାହୁଲ, ଭାରତୀ ସାରଥି, ଗାୟତ୍ରୀ କାଶ୍ୟପ ଓ ଖୁସପ୍ରୀତି କାଶ୍ୟପ ପ୍ରମୁଖ ସାମିଲ ଅଛନ୍ତି। ଛତିଶଗଡ଼ରୁ ଏହି ଟସର କୋଷା ଅଣାଯାଇ କୋଷାଗୁଡ଼ିକୁ ଗରମପାଣିରେ ପକାଯିବା ପରେ ସେଥିରୁ ଟସର ସୂତା ବା ରେଶମ ବାହାର କରାଯାଏ। ସେହି କୋଷାରୁ ମେଶିନ ଦ୍ୱାରା ରେଶମ ବାହାର କରି ସୂତାକୁ ସଂରକ୍ଷିତ ରଖାଯାଏ। ଏହି ସୂତାକୁ ବିଭିନ୍ନ କପଡ଼ା ଓ ଶାଢ଼ି ତିଆରିରେ ବ୍ୟବହାର କରାଯାଏ। ସରକାର ଏହି ଅଞ୍ଚଳରେ ଯଦି ଟସର ଚାଷକୁ ପ୍ରାଧାନ୍ୟ ଦେବେ ତେବେ ସୂତା ପାଇଁ ବାହାର ରାଜ୍ୟ ଉପରେ ନିର୍ଭର କରିବାକୁ ପଡ଼ିବନି ବୋଲି ତାଲିମ ନେଉଥିବା ମହିଳାମାନେ ପ୍ରକାଶ କରିଛନ୍ତି।
