ଚେନ୍ନାଇ,୧୦।୧୦ : ତାମିଲନାଡୁ ବିଧାନସଭାରେ ବିରୋଧୀ ଦଳର ନେତା ଏଡାପାଡି ପାଲାନିସ୍ବାମୀ ମଙ୍ଗଳବାର ଆରିୟାଲୁର ଏବଂ ହୋସୁରରେ ହୋଇଥିବା ବିସ୍ଫୋରଣ ଘଟଣା ଉପରେ ଆଲୋଚନା କରିଛନ୍ତି। ବାଣ ଦୋକାନ ଏବଂ କାରଖାନାଗୁଡ଼ିକରେ ସୁରକ୍ଷା ବ୍ୟବସ୍ଥା କାର୍ଯ୍ୟକାରୀ କରିବାକୁ ସେ ତାମିଲନାଡୁ ସରକାରଙ୍କୁ ଅନୁରୋଧ କରିଛନ୍ତି। ବିସ୍ଫୋରଣ ଘଟଣାରେ ପ୍ରଭାବିତ ଲୋକଙ୍କ ପାଇଁ ଘୋଷିତ ଅନୁକମ୍ପାମୂଳକ କ୍ଷତିପୂରଣ ପରିମାଣ ବୃଦ୍ଧି କରିବାକୁ ଇପିଏସ ରାଜ୍ୟ ସରକାରଙ୍କୁ ମଧ୍ୟ ଅନୁରୋଧ କରିଛି।
ଏହା ସହିତ ଆଜୀବନ କାରାଦଣ୍ଡ ଭୋଗୁଥିବା କଏଦୀମାନଙ୍କୁ ସମୟ ପୂର୍ବରୁ ମୁକ୍ତ କରିବା ସମ୍ପର୍କରେ ବିଭିନ୍ନ ଦଳର ବିଧାୟକମାନେ ବିଧାନସଭାରେ ଏକ ବିଶେଷ ଧ୍ୟାନାକର୍ଷଣ ପ୍ରସ୍ତାବ ଆଣିଥିଲେ। ଏହା ଉପରେ ବିରୋଧୀଦଳର ନେତା ଏଡାପାଡି ପଲାନିସ୍ବାମୀ କହିଛନ୍ତି, କୋଏମ୍ବାଟୁର ବିସ୍ଫୋରଣ ମାମଲାରେ ୩୬ ମୁସଲମାନ କଏଦୀ ଗତ ୨୫ ବର୍ଷ ଧରି ଆଜୀବନ କାରାଦଣ୍ଡ ଭୋଗୁଛନ୍ତି। ମୁଁ ତାମିଲନାଡୁ ସରକାରଙ୍କୁ ଅନୁରୋଧ କରୁଛି ଏହି ବନ୍ଦୀମାନଙ୍କୁ ମାନବିକତା କାରଣରୁ ମୁକ୍ତ କରାଯାଉ।
ଆଜୀବନ କାରାଦଣ୍ଡ ଭୋଗୁଥିବା କଏଦୀମାନଙ୍କୁ ମୁକ୍ତ କରିବା ନେଇ ବିଧାୟକମାନେ ଦେଇଥିବା ବିଶେଷ ଧ୍ୟାନାକର୍ଷଣ ପ୍ରସ୍ତାବ ଉପରେ ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି, ଆଜୀବନ କାରାଦଣ୍ଡ ଭୋଗୁଥିବା କଏଦୀମାନଙ୍କୁ ମୁକ୍ତ କରିବା ଉପରେ ଅନେକ ବିଧାୟକ ନିଜର ପ୍ରତିକ୍ରିୟା ପ୍ରକାଶ କରିଛନ୍ତି। ୨୭୪ ଜଣ କଏଦୀଙ୍କୁ ଚିହ୍ନଟ କରାଯାଇଛି।
ସିଏମ କହିଛନ୍ତି ଆମେ ପ୍ରଥମ ବ୍ୟାଚରେ ୪୯ ଜଣ କଏଦୀଙ୍କୁ ମୁକ୍ତ କରିବାକୁ ଚାହୁଁଛୁ। ଏହି ପ୍ରସଙ୍ଗରେ ରାଜ୍ୟପାଳଙ୍କ ସମ୍ମତୁକୁ ବର୍ତ୍ତମାନ ଅପେକ୍ଷା କରାଯାଇଛି।
