ଇସଲାମାବାଦ/ଓ୍ବାଶିଂଟନ,୨୩।୧ : ତାଲିବାନକୁ ଚାଇନା ଆଧୁନିକ ଅସ୍ତ୍ରଶସ୍ତ୍ର ଯୋଗାଉଛି। ଜାମେଷ୍ଟାଉନ ଫାଉଣ୍ଡେଶନ ଦ୍ୱାରା ପ୍ରକାଶିତ ଲେଖକ ଜାଫର ଇକବାଲ ୟୁସୁଫଜାଇଙ୍କ ପୁସ୍ତକ ‘ଦ ଟ୍ରବୁଲ ଟ୍ରାଙ୍ଗେଲ:ୟୁଏସ୍-ପାକିସ୍ତାନ ରିଲେଶନ ଅଣ୍ଡର ଦ ତାଲିବାନ ଶ୍ୟାଡୋ’ରେ ଉଲ୍ଲେଖ କରାଯାଇଛି। ୟୁସୁଫଜାଇଙ୍କ ଅନୁଯାୟୀ ଚାଇନା ଏହି ପଦକ୍ଷେପ ନେଇଛି କାରଣ ଏକ ଅସ୍ଥିର ଆଫଗାନିସ୍ତାନ ଚାଇନାର ସ୍ବାର୍ଥ ଏବଂ ବେଲ୍ଟ ଆଣ୍ଡ ରୋଡ ଇନିସିଏଟିଭ (ବିଆରଆଇ) ର ସଫଳତାରେ ବାଧା ସୃଷ୍ଟି କରିପାରେ। ରିପୋର୍ଟ ଅନୁଯାୟୀ, ଅନିଶ୍ଚିତତା ଏବଂ ଅଶାନ୍ତି ଆଫଗାନିସ୍ତାନକୁ ଆତଙ୍କବାଦୀଙ୍କ ଗଡ଼ରେ ପରିଣତ କରିପାରେ। ଏହା ଚାଇନାର ଜିନଝିଆଙ୍ଗ ଏବଂ ଚାଇନା-ପାକିସ୍ତାନ ଅର୍ଥନୈତିକ କରିଡର (ସିପିଇସି) ପ୍ରକଳ୍ପକୁ ଟାର୍ଗେଟ କରିପାରିବ। କିନ୍ତୁ ତାଲିବାନ ସଶକ୍ତ ହେଲେ ଚାଇନାର ଲାଭ ହେବ।
ସୂଚନାଯୋଗ୍ୟ, ଡିସେମ୍ବର ୧୨ରେ, ଇସଲାମିକ ଷ୍ଟେଟ ଆତଙ୍କବାଦୀ ସଂଗଠନର ସଦସ୍ୟମାନେ କାବୁଲର ଏକ ହୋଟେଲ ଉପରେ ଆକ୍ରମଣ କରିଥିଲେ ଯେଉଁଠାରେ ଅନେକ ଚାଇନା ନାଗରିକ ରହୁଥିଲେ। ଏହି ଆକ୍ରମଣରେ ୫ ଜଣ ଚାଇନା ନାଗରିକଙ୍କ ସମେତ ୧୮ ଜଣ ଆହତ ହୋଇଥିବାବେଳେ ତିନିଜଣ ଆକ୍ରମଣକାରୀ ସୁରକ୍ଷା ବାହିନୀଙ୍କ ଗୁଳିରେ ନିହତ ହୋଇଥିଲେ। ଆଫଗାନିସ୍ତାନରେ ସମସ୍ତ ପ୍ରକାର ଆତଙ୍କବାଦ ଏବଂ ଉଗ୍ରବାଦକୁ ମୁକାବିଲା କରିବା ପାଇଁ ଚାଇନା ତାଲିବାନକୁ ପର୍ଯ୍ୟାପ୍ତ ସହାୟତା ଯୋଗାଇବାକୁ ନିଷ୍ପତ୍ତି ନେଇଛି ବୋଲି ୟୁସୁଫଜାଇ କହିଛନ୍ତି।
