ବଲାଙ୍ଗୀର,୨୯।୪(ସୁନିଲ କୁମାର ମହାନ୍ତି): ବଲାଙ୍ଗୀର ଜିଲା ପୁଇଁନ୍ତଲା ଥାନା ଅନ୍ତର୍ଗତ ପଥର୍ଲା ପଞ୍ଚାୟତ ତଲଗଜ ଗାଁରେ ଏକ କ୍ରସର୍ ସ୍ଥାପନକୁ ନେଇ କ୍ରସର୍ ମାଲିକ ଓ ଗ୍ରାମବାସୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଛି । କ୍ରସର ମାଲିକଙ୍କ ଅଭିଯୋଗ କ୍ରମେ ପୋଲିସ ଗାଁର ୬ ଜଣ ଯୁବକଙ୍କୁ ଉଠାଇ ଆଣିବାରୁ ଗାଁର ଶତାଧିକ ମହିଳା ଓ ପୁରୁଷ ପୁଇଁନ୍ତଲା ଥାନାକୁ ଆସି ଧାରଣାରେ ବସିଛନ୍ତି। ପୋଲିସ ଉଠାଇ ଆଣିଥିବା ୬ ଜଣଙ୍କୁ ନଛାଡିବା ପର୍ଯ୍ୟନ୍ତ ସେମାନେ ସେଠାରେ ବସି ରହିବେ ବୋଲି କହିଛନ୍ତି ।
ଅନ୍ୟପଟେ ତାଙ୍କ ଗ୍ରାମରେ କ୍ରସର୍ ବସାଇଦେବେ ନାହିଁ ବୋଲି ଲୋକେ ଜିଦ୍ ଧରିଛନ୍ତି । ଗ୍ରାମବାସୀମାନେ ତାଙ୍କ ଅଂଚଳରେ କ୍ରସର ନ ବସାଇବାକୁ ପୂର୍ବରୁ ସରକାରଙ୍କୁ ଅନେକ ଥର ଅଭିଯୋଗ ଗୁହାରି କରିଆସିଛନ୍ତି । ତାଙ୍କ ଅଂଚଳରେ କ୍ରସର ବସାଇବା ଦ୍ଵାରା ତିନୋଟି ଗ୍ରାମ ତଲଗଜ, ଲେମ୍ଭୁପାଲି ଓ ମହଲ ପାଲି ଗାଁର ଲୋକେ କ୍ଷତିଗ୍ରସ୍ତ ହେବେ । ସେ ଅଂଚଳର ପରିବେଶ ସନ୍ତୁଳନ ଉପରେ ପ୍ରଭାବ ପଡିବ । ପଥର ଗୁଣ୍ଡ ଗୁଡିକ ପଡ଼ି ଜମି ଗୁଡିକ ନଷ୍ଟ ହୋଇଯିବ ଯାହା ଫଳରେ ଲୋକେ ଜୀବିକା ହରାଇବେ । ଏହା ସହିତ ପଥର ଗୁଣ୍ଡ ଉଡ଼ିବା ଦ୍ଵାରା ଗାଁ ରେ ରହୁଥିବା ଲୋକଙ୍କ ନିଶ୍ୱାସ ପ୍ରଶ୍ୱାସ ନେବାରେ ଅସୁବିଧା ହେବ ଯାହା ପାଳରେ ଗ୍ରାମବାସୀ ରୋଗାକ୍ରାନ୍ତ ହୋଇପଡିବେ ବୋଲି ଗ୍ରାବାସୀମାନେ କହିଛନ୍ତି ।
କ୍ରସର୍ ଆମ ଅଞ୍ଚଳରେ ନ କରିବାକୁ ଆମେ ବିରୋଧ କରି ଆସୁଥିବା ବେଳେ ଜାଣିଶୁଣି ଗାଁରେ ଜୋରଜବରଦସ୍ତ କ୍ରସର ବସାଇବା ପାଇଁ କାମ ଆରମ୍ଭ କରୁଛନ୍ତି । ବୁଧବାର ଆମେ ତାଙ୍କୁ ମନା କରିବାରୁ ଆମ ଗାଁ ଲୋକଙ୍କ ନାଁ ରେ ମିଛ କେସଦେଇ ପୋଲିସ ବଳରେ କ୍ରସର ବସାଇବା ପାଇଁ ଆମ ଲୋକଙ୍କୁ ପୋଲିସ ଥାନାକୁ ଉଠାଇ ଆଣିଛି ବୋଲି କହିଛନ୍ତି । ପୋଲିସର ଜୁଲମକୁ ବିରୋଧ କରି ଗ୍ରାମବାସୀ ପୁଇଁନ୍ତଲା ଥାନାକୁ ଆସି ଘେରାଉ କରିବା ସହ ଥାନା ସମ୍ମୁଖରେ ଦୀର୍ଘ ୫ ଘଣ୍ଟା ଧରି ଧାରଣାରେ ବସିବା ପରେ ପୋଲିସ ଓ ଗ୍ରାମବାସୀଙ୍କ ମଧ୍ୟରେ ଆଲୋଚନା ହୋଇଥିଲା । ଆଲୋଚନା ପରେ ଗାଁରୁ ଉଠାଇ ଆଣିଥିବା ୬ଜଣ ଯୁବକଙ୍କୁ ପୁଇଁନ୍ତଳା ପୋଲିସ ଛାଡ଼ିଥିବା ଜଣାପଡ଼ିଛି ।
